Nău nchrăp kan ƀư ndơ dŏng kĩ thuật ta nkual ƀon lan gŭ, ntŭk gŭ mhe ta xã Đạ Huoai, n’gor Lâm Đồng lah ngoăy tâm âk nău kan tơm khlăy kơl an nău hăn nsong gŭ dâm an ƀon lan bâh trong têh Tân Phú- Bảo Lộc. Nău kan geh lĕ rnoh ntuh ƀư rlău 150 rmen prăk. Ndrel đah nău khuch tât yor trôk mih âk, nău pah kan dôl geh ƀư mbrơi yor geh mâp âk nău jêr tâm nău kan ntrơn ntŭk gŭ ƀon lan, ntŭk gŭ mhe aơ an gĭt, ntŭk kan dơn kan lĕ nchrăp tŏng ăp ndơ dŏng, máy mok, nuĭh kan, mbra ntrôl ngăch nău kan rnôk geh nău kŏ văk geh doh rklaih.

 “Aƀaơ nuĭh pah kan kâp kan ta ntŭk kan geh dŭt đê̆ lah 60 nuĭh, ƀư kan lĕ rngôch ăp nău ƀư. Kanŭng geh kâp duh trôk, pah kan geh rĭ nuĭh dơn leo kan mbra ƀư dâl. Tât lơ 31/12 lĕ geh ƀư lôch pă jao an ăp rnăk ƀon lan ta ntŭk gŭ mhe”.

Năm 2025, lĕ rnoh prăk ntuh kơl nsum bâh n’gor Lâm Đồng lah 18.700 rmen prăk. Tâm 7 khay, lam n’gor geh pă an klâp ma 30% nău nchrăp. Yor sŏk pă prăk mbrơi lah mâp âk nău kŏ văk ta trong ntrơn ntŭk gŭ. Aƀaơ, âk nău kan, ntŭk kan lĕ ƀư lôch sƀ, hồ sơ, nău way ƀư yơn ntŭk ntrơn ƀon lan ê hŏ ƀư lôch jêng mô dơi ƀư.

Wa Hồ Văn Mười, Kruanh UBND n’gor Lâm Đồng an lah, gay ma ƀư lôch nău nchrăp pă prăk ntuh kơl nsum năm 2025 geh rlău 95%, n’gor an geh nău nsrôih âk ngăn. Tâm nĕ, nău kan ntrơn ntŭk gŭ an ƀon lan lah du nău kan dŭt khlăy, an geh lĕ n’gâng kan chính trị ndrel lăp kan.

 “Nău tă gĭt blău kan bâh cán bộ ntrơn ntŭk gŭ an ƀon lan lah du nău dŭt khlăy. Nuĭh i jur pah kan ma nău ngơi, nău kan mô tâm di lah mô dơi. Yor nĕ, an geh săch kon nuĭh, pă dăp nuĭh kan, hăn pah kan rgŏ jă lah nuĭh dơi hăn. Rnôk pah kan rgŏ jă ntrơn ntŭk gŭ an geh lah lĕ trong kan chính trị lăp kan.