Ta rơh tâm mâp, bar hê Thủ tướng tâm ban ŭch rnê nău tâm boh kan têh khlăy, tâm rnglăp na nê̆ n’hanh tâm kơl lĕ rngôch Việt Nam-Lào an geh hun hao ueh tay, nâp nâl n’hanh săk rnglăy ta ăp trong kan tâm ba năp nơh. Tâm kơl nău kan wăng sa, tăch rgâl , ntuh kơl an ntrôl dăng tay n’hanh geh âk nău rgâl mhe dŭt ueh. Tăch rgâl bar ding tâm tâm pe khay bôk năm 2024 geh 476,8 rkeh đôlar, hao 12% đah khay aơ năm 2023. Tâm kơl ta ăp trong kan êng kơt ntĭm nti, văn hóa, khoa học kĩ thuật, pâl nđaih n’hanh tâm nđur ƀon lan...geh ntrôl dăng tay tĭng trong n’hao an geh săk rnglăy n’hanh ueh.

Di rơh aơ, 2 hê Thủ tướng lĕ ndrel tâm ban ŭch tâm mbơh ăp nău kan n’hao ăp trong kan na nê̆ gay ma mbơh tơih geh săk rnglăy ăp nău tâm ton gâl têh n’hanh nău geh bâh rơh rƀŭn nchră tal 46 Ủy ban bar chính phủ Việt Nam-Lào. Bar ding lĕ tâm ban ŭch n’hao tâm rgop 2 n’gâng kan wăng sa, ngăn lah mpeh nău kan, tơm prăk, ndơ dŏng ntung trong, ŭnh nar, viễn thông, pâl nđaih, kơl rdâk njêng n’gâng kan wăng sa đăp mpăn, leo kan êng, gĭt kan, nsrôih lăp kan ndrel đah lam ntur neh têh hvi, ngăn ngên n’hanh săk rnglăy.

Bar hê Thủ tướng tâm ban ŭch an geh tâm rgop tay na nê̆, tâm kơl ndrel ta ăp rơh tâm mâp nău wăng sa ta nkual n’hanh lam ntur neh kơt ASEAN, LHQ n’hanh ăp nău kan ta nkual dak me Mê Công. Thủ tướng Phạm Minh Chính lah na nê̆ Việt Nam an geh kơl tay n’hanh kơl an Lào mât dơi leo kan ăp nău kan lam ntur neh khlăy tâm năm 2024, tâm nĕ geh nău kan ƀư kruanh ASEAN.