Ôi ntri (20/5), ta Nhih pah kan Chính phủ, Thủ tướng Phạm Minh Chính ƀư tơm Tâm nchră ntrŭt ntrôl hun hao ntuh kơl năm 2025. Nchroh ndơ̆ trok ntơm bah bôk năm tât 30/04 năm aơ lah rlău 128 rbăn rmen prăk, geh rlău 15 % trong nchrăp Thủ tướng Chính phủ jao, ndrel khay dja năm 2024 n’gluh 110 rbăn rmen prăk, geh rlău 16 %. Ndrĭ, mpeh rnoh khlay, năm 2025 n’gluh âk rlău ndrel khay dja năm 2024 nklăp 18 rbăn rmen prăk, yơn rnoh n’gluh tơm prăk rđĭl đah tơm prăk Thủ tướng Chính phủ jao ri đêt lơn. Lah ta rnôk tâm nchră, Thủ tướng Phạm Minh Chính an lah: He dôl gŭ tâm ăp nar khay lịch sử, đah nuih n’hâm “ndăn ngăch, rât nănh” yơn ntuh kơl mô dơn mô “ndăn ngăch, rât nănh” ma nar lơn ma mbrơi nkai.

Lah rjăp ăp suan ntrôl mhe dôl ntrŭt ntrôl kơt: khoa học công nghệ, rgâl mhe, rgâl mbrô, wăng sa  sĭt jêng tay, wăng sa nuĭh gĭt blău, wăng  sa êng bah dih ngih dak…mhe dôl ntơm, mô hŏ geh nău dơi ri ân rdâk nâp tay, n’hao dăng, ntrŭt ntrôl suan dăng way ơm, tâm nê geh ntrŭt ntrôl ntuh kơl. Thủ tướng dăn đă nkhôm, rnê, n’gâng kan ta ntŭk, ăp n’gâng kan n’gluh tơm prăk ntuh kơl geh âk, nkre dăn đă rhuăt  luh nău tă ơm gĭt kan, ƀư kloh nău dơn kan mpôl, ăp nuĭh geh tât, nsing ta nê gay n’gluh trong nkra tâm di gay ntrôl dăng n’gluh tơm prăk let năp tay.