Ntênhk txi côngv Bàn Vương-paz sik côngv jông côngv thôngx Cho liêz

           Ntênhk txi côngv Bàn Vương tsik so tâu tsưr tsix trâu chor ntu zov chênhr hâur shông thâuv côngv thôngx, chuôz xênhv, chuôz zis muôx xor xưv lox (txix hnuz 15/10-30/12 hli ntux). Lơưr Mênhx cxưx Cho liêz, Bàn Vương zos nênhs muôx côngz xênhz tơưv 12 chuôz xênhv mênhx cxưx Cho, chox car chor mênhx cxưx Cho hla đhâu têx phiv liv, yênhx lix jêx jok, kriê txux chi uô nênhx, uô nox thiêz tuôr tsês têx phongx cxưx. Viv li, ntênhk txix côngv Bàn Vương tâu tsưr tsix lok six jông, hêik tơưv ndo txiêx pâux njis, ndo txos pox côngz zơưv côngz, thor Bàn Vương paz trâu têx tuz nhuôs, sơưr đơưk muôx đas jos, tsik muôx moz gênhl, uô nênhx shir phaz.

          Zơưv Triệu Đức Thanh, kuz Chủ tịch Ủy ban tỉnh Hà Giang (kuz), lênhx nênhs nhênhz chơưv vênhx huôv Cho xar Hồ Thầu, tỉnh Tuyên Quang puz pâuz: Khov lơưr yênhx zav Cho mak six hơưv tsưr tsix Ntênhk txi côngv zuôr sik txơưr, taz sik Ntênhk txi côngv Bàn Vương mak tâu tsưr tsix jông iz zav. Mênhx cxưx Cho Liêz mak 5 shông tsưr tsix iz jiês, taz sik muôx têx chuôz xênhv mênhx cxưx Cho liêz mak 9 shông mav txi côngv iz jiês, muôx chuôz xênhv mak 12 shông mak txi côngv iz jiês: “Ntênhk txi côngv Bàn Vương zos hêik txos mênhx cxưx Cho li kror chax chês, hêik ndo txos 12 chuôz xênhv mênhx cxưx Cho pox côngz zơưv côngz. Ntênhk txi côngv Bàn Vương chiê thor cov muôx ntux paz, têx kôngz lôngk jông, têx tuz nhuôs mênhx cxưx Cho luz nênhx tsâu sor, shir phaz. Zos jiês chiê cxuô lênhx nênhs siz njiz, xênhz huôx côngv thôngx paz muôx sik côngv siêz jông, đros co zos chiê kruôz kriê lok chax chês trâu cxênhx hluôk, kriê trâu chor hluôk pâuz txos têx phongx cxưx, tsưr ziv tsưr tsix ntênhk”.

          Chiê tsưr tsix ntênhk txi côngv Bàn Vương, tsuv bax iz tuk buô; iz tuk kêiz; 12 gơưv nduôr blêx; 1 poz cxur xuôk ntâuk đơưz krưr; ntơưr chêr; 2 huz chơưr.

            Qơư txi côngv Bàn Vương mak tsik so tâu xêir tsov tsưr tsix ntơưv qơư tiêx đar hâur jok zôngx ziv trâu sơưr đơưk muk lok. Uô ntêx tsưr tsix ntênhk, tuk txir nênhz choz zok hâux lưv trâu iz cxiê lênhx txir nênhx Cho muk hâur har jôngr txiêr chor shôngz lox, ndax lok uô qơư trâu cxuô zav chiê txi côngv. Sâuv qơư txi côngv no tâu lo têx ntơưr liêz njuôz, đuôz txi côngv, ntâu chuôz zênhx txơưr tâu uô txix têx shôngz… Hâur co tsuv muôx đuôz txi côngv Bàn Vương thiêz chor nênhs tsuv txi côngv txơưr. Đuôz Bàn Vương chiê txi côngv tâu đêi ciês hâur luz đraz qơư txi côngv. Ntênhk txi côngv muôx ntâu kror tsuv uô li hêik trâu pox côngz zơưv côngz pâuz, muôz cxuô zav chiê txi côngv, thor pox côngz zơưv côngz paz, txos thor ntux paz, kôngz lôngk jông thiêz sâu tau ntâu, jêx jok tssâu sor, sơưr đơưk muôx đas jos, tsik muôx moz gênhx, cơưv ntâuz ntơưr tâu trơưk li siêz xar. Zơưv Triệu Tiến Quyên, nhoz xar Hồ Thầu, tỉnh Tuyên Quang puz pâuz tsênhv njiêz txi côngv ntênhk Bàn Vương: “Hnuz no zos hnuz jông, muôx txưv têx tuz nhuôs 12 zav mênhx cxưx Cho lok ntơưv no txi côngv ndo txos Bàn Vương, thor ho lok txêik jênhv chor tuz nhuôs li têx txi côngv, thor Bàn Vương por hưv trâu pox nhuôs jêx jok Cho truôx tuk, uô tâu nox tâu hnar, nhux tưv, kêiz buô pur guôx, têx kôngz lôngk jông thiêz sâu tâu ntâu”.

          Đhâu txi côngv Bàn Vương, pox côngz, zơưv côngz, chor nênhs tsuv txi côngv thiêz 12 chuôz xênhv Cho, chor txir nênhz zuôr hlơưr têx shaz ntơưr, zax khâuv chênhz khâuv thiêz hêik jax xa Bàn Vương, pox côngz zơưv côngz tror muk. Txuôk lơưr zos đhiê pax vuôs li: đhiê pax vuôs cxov huôz cik, đhiê pax vuôs tsưz. Lơưr co, 6 lênhx txir nênhz zuôr jux juk tror đhiê chor pax vuôs cxôngx nzor, zos iz kror tsuv muôx hâur ntênhk txi côngv Bàn Vương. Ntênhk hôiv muôx tas nro chor nênhs lâul, hluôk nênhs, pox niêv thiêz nhuôv zâu đros cxaz chuôz. Đhâu co, paz trâu chor hluôk nênhs pâuz tâu txos zuk mênhx cxưx chax chês. No cux zos tsưr ziv kruôz kriê trâu têx tuz nhuôs pâuz ndo txos zuk pox côngz zơưv côngz. Tix lâus Lý Chòi Chán, jok Phìn Hồ Thầu, xar Thông Nguyên, tỉnh Tuyên Quang hêik: “Đhâu ntênhk txix côngv Bàn Vương paz trâu têx tuz nhuôs mênhx cxưx Cho pâuz nzir lok zuk pox côngz zơưv côngz, uô tsâus pox côngz zơư côngz tưz xênhz tơưv 12 xênhv Cho. Zos cxênhx hluôk mak pêz sơưr đơưk tsuv pâuz tuôr tsês, phuôx huiz mênhx cxưx têx tsiv gri jông, paz muôx nzir vênhx huôv trâu cxuô mênhx cxưx Việt Nam têx vênhx huôv jông”.

         Tsôngv box Cho liêz li tênhk txi côngv Bàn Vương muôx ntâu tsiv gri li co viv li tâu tsôngv box tuôr tsês jông. Thiêz shông 2022, kror ntênhk no tưz tâu Bôv Vênhx huôv, Thể thao thiêz Du lịch tso trâu hâur bê ntơưr di sản vênhx huôv phi vật thể têz qơưk./.

Thiều Nghiệp-Lik Thox cxêik nhênhv