Txix hnuz xiêz 01/7/2025 gôngr BHXH 15 shông tâu sơưv nhiêx hli so lâul

1.Txo grêk tsơưs six hơưv, hnuz nhôngs thêv BHXH chiê tâu sơưv nhiêx hli so lâul

Trơưk li Chei BHXH shông 2014, iz hâur têx cui tinhv chiê nênhs lox tôngv tâu sơưv nhiêx hli so lâul zos tsuv muôx txâuk 20 shông thêv BHXH tror zar sâuv. Taz sik, trơưk li Grê 66, Chei BHXH 2024 cui tinhv txix hnuz xiêz 01/7/2025, six hơưv, hnuz nhôngs thêv BHXH chiê tâu sơưv nhiêx hli so lâul zuôr txo grêk yuôr 15 shông. Co zos iz tsênhv chei muôx liv, muôz jông six hơưv đuô trâu chor nênhs lox tôngv thêv BHXH lur đuô, lar heik zos têx lênhx uô hâux lưv tsi yuô truôx tuk lok sik njiz trâus phiv liv lok thêv cov txâuk 20 shông nhiêx BHXH.

2. Six hơưv, hnuz nhôngs tâu sơưv nhiêx hli so lâul

Chiê tâu sơưv nhiêx hli so lâul trơưk cui tinhv yiêz txix hnuz xiêz 01/7/2025, nênhs lox tôngv tsuv muôx txâuk hnuz nhôngs, ntâuz ntơưr uz no lơưr cui tinhv ntơưv Grê 64, Chei BHXH 2024, tsênhv tsênhv zos txâuk shông so lâul trơưk cui tinhv thiêz muôx txâuk 15 shông thêv nhiêx BHXH tror zar sâuv.

3. Phênhv tâu sơưv nhiêx hli so lâul txix hnuz xiêz 01/7/2025

Trơưk li cui tinhv ntơưv Grê 66, Chei BHXH, phênhv nhiêx hli so lâul niêx hli nênhs lox tôngv tâu sơưv li heik sâuv tâu xav li đrav kaz:

a) Đros thiêz lox tôngv pox niêv:

Nhiêx hli so lâul tâu sơưv bâuv 45% xav kror đruôz đraz nhiêx hli uô qơư khov thêv BHXH bâuv iz zav li 15 shông thêv nhiêx BHXH, đhâu ntơư nzir iz shông thêv mak xav cxaz 2%, tâu ntâu yax bâuv 75%;

b) Đros thiêz lox tôngv txir nênhx:

Nhiêx hli so lâul tâu sơưv bâuv 45% xav kror đruôz đraz nhiêx hli uô qơư khov thêv BHXH bâuv iz zav li 20 shông thêv nhiêx BHXH, đhâu ntơư nzir iz shông thêv mak xav cxaz 2%, tâu ntâu yax bâuv 75%.

Txơưv six hơưv, hnuz nhôngs thêv BHXH txo grêk tsơưs 15 shông, phênhv nhiêx hli so lâul tâu sơưv zuôr tâu xav trơưk li tas nro six hơưv, hnuz nhôngs thêv BHXH thiêz xav kror đruôz đraz nhiêx hli thêv BHXH. Taz sik ziv thêv tâu nhiêx BHXH ntêr shông mak ziv tâu ntâu.

Chênhr zos li heik co, nênhs lox tôngv tsuv pâuz tsênhz lok têx mông no, qênhz yuôx shuôs six hơưv, hnuz nhôngs zuk thêv nhiêx BHXH thiêz bax tsưr ziv jông chiê tâu sơưv têx nhiêx hli so lâul./.

Thu Thùy-Riê Lâux cxeik, nhênhv