Têx cưk yuôx nhoz tox siêz Điện Biên li têx sir jos tsoz phưz đas jos trâu tsôngv box

          2 luz hlik hâur shôngk shông no, xã Pa Tần thiêz Nà Khoa, huyện Nậm Pồ, tỉnh Điện Biên yênhx qơư moz kruô piêk huôv xênhz thâuv pov muôx chôngz lênhx nênhs trâus moz. Chiê phax tar moz, lưx lươngv y tế đros chính quyênx tiv phaz tưz sir jos uô hâux lưv yênhx hnuz hmo.

          Tix lâuk Hà Đức Thắng, Phưv tsar qơư y tế xã Pa Tần puz pâuz: Têx lênhx nênhs trâus moz kruô piêk phênhv ntâu pov nhoz têx jos Nậm Thà Là, Huổi Khương thiêz Huổi Tre, xã Pa Tần; đuô li zos nhoz chor jos Huổi Lụ 3, xã Nậm Nhừ thiêz Huổi Lụ 1, xã Nà Khoa. Chiê phax tar moz cik đêz đar, tsuv uô lơưr chính quyênx tiv phaz li chox kriê, cán bộ y tế ntơưv 2 xã tưz chêx chôngk cêv kuôk, tsuôk yuôx tuô caz moz ntơưv thax tsav muôx nênhs moz nhoz uô nênhx. Thôngx cxix sik côngv đros têx lưx lươngv txơưr muk trâu yênhx jêx jos, yênhx ziv chuôz zis chiê yax mông lok cxax yuôx phax moz thiêz tsưr ziv phax tar moz trâu tsôngv box… Khov co, moz kruô piêk ntơưv no jux jus tâu phax tar, tsôngv box truôx siêz khưr uô nox. Tix lâuk Shôngx A Phùa, Tsar jos Huổi Khương, xã Pa Tần heik:

          “Cur jos muôx moz kruô piêk huôv xênhz, tsôngv box cux lok six cxơưx. Tâu têx y bác sĩ thiêz chính quyênx tiv phaz tsov cưv muk vênhv tôngv tsôngv box phax tar moz gênhk, tsi chiê cik đêz đar trâu cxuô thax tsav qơư”

          Tsi taz sir jos phax tar moz huôv xênhz, têx y bác sĩ ntơưv Điện Biên tsênhv truôx siêz nhoz jêx jos, chox têx jix vuv y tế jông txos ciês yênhx jêx jos tox siêz chiê muôz siêz đas jos trâu tsôngv box. Têx bác sĩ Tsêr kho moz 7/5, Công an tỉnh Điện Biên li jiês muk uô côngz xưv ntơưv jos Huổi Va B nhoz xã Háng Lìa, huyện Điện Biên Đông muôx 20 cei cêr lok six lax muk viv puôr lênhx zos cêr ar, ar nxaz, ntux lok nas mak cêr bluô, muôx ntâu ntu tsuv muk tơư.

          Trung tá Đào Thành Uỷ, Phưv giám đốc Tsêr kho moz 7/5, puz pâuz: Jos Huổi Va B muôx zuôr xar 100 ziv chuôz zis, đros 50% ntâu ziv zos chuôz zis pluôs. Muôx tsi txâuk nox, txâuk hnar, viv li tsôngv box tsi tâu tsov cưv txos hâux lưv tsoz phưz zuk li đas jos. Pâuz tâu luôk hâux lưv no, txơưv phêv liv txos tưs, têx y bác sĩ hâur taz viv cux xav tênhv tsuv muk txos ciês ntơưv qơu chiê seiz njuôs, muôz siêz đas jos trâu pox nhuôk.

          “Xã tox siêz tsôngv box nhoz tsi chêx chôngk viv li tsơưs tâu zôngv têx jix vuv y tế tsoz phưz đas jos jông. Viv li hâur têx jiês pêz muk uô côngz xưv pêz thâuv tưs cux xar muk heik kriê tsưr ziv tsoz phưz đas jos trâu tsôngv pox nhuôk nhoz têx thax tsav txov nhêv co”.

          Niêv lâuk Vax Thị Sinh, tsôngv box nhoz jos Huổi Va B puz pâuz, niêv lâuk thiêz pox nhuôk lok six shir phaz thiêz jông siêz thâuv tâu têx y bác sĩ tuôx txos ciês jêx jos chiê seiz njuôs thiêz kho moz, muôz yuôx tsi zuôr nhiêx txiêx, tâu yax mông, heik kriê tsưr ziv nox nhoz huv vêv xênhz, tsưr ziv phax tar moz muôx chêx cuk…

          “ Cêr lax muk lok, tâu têx y bác sĩ tuôx txos ciês ntơưv jêx jos seiz njuôs moz, muôz yuôx tsi zuôr nhiêx txiêx mak pêz lok six jông siêz, kriê pêz tsưr ziv nox hâuk, tsoz phưz đas jos nhoz uô nênhx jông...”

          Zơưv Phạm Giang Nam, Giám đốc Sở y tế tỉnh Điện Biên puz pâuz: Nhiv no nganhx y tế tiv phaz tsênhv chêx chôngk cxuô pênhr jos chiê muôz siêz tsơưr lươngv y tế trâu tiv phaz, hâur co zuôr chêx chôngk yưv pênhr lok cơ sở cxuô zav, chuôz zênhx ytế thiêz kriê cxaz chuyên môn trâu têx nhân viên y tế. Nhiv no 100% qơư y tế hâur tỉnh puôr lênhx muôx têx bác sĩ; 96% qơư y tế muôx têx pox niêv paz txeik mê nhuôk; zuôr xar 70% xã, phường, thị trấn tax ploz tsênhr têz qơưk lok y tế xã… No zos têx kror zov chênhr chiê uô jông côngz xưv por vêv, tsoz phưz thiêz muôz siêz đas jos trâu tsôngv box, tiv zix zos tsôngv box nhoz têx thax tsav tsenhv yuôr ntâu phêv liv, tox siêz, ntus đriv.

          “Txix têx y tế tiv phaz nhiv no tâu yưv pênhr, huôv tsar uô gôngr phênhv trâu luôs hâux lưv tsoz phưz đas jos tsôngv box, tiv zix zos ntơưv têx xã tox siêz, ntus đriv. Njuôs xav tas shông 2025 no, 100% qơư y tế zuôr muôx txâuk tsêr, chuôz zênhx njuôk kho moz lơưr Bộ y tế cui tênhv./.

Vũ Lợi- Txâur Vax cxeik nhênhv