Sa Pa phax tar no trâu shux xênhz hâur têx hnuz no njiv hênhr

Ntux pok huôz thiêz no njiv hênhr, 400 ntâu lênhx shux xênhz hâur tsêr cơưv cxênhx 2 Phan Si Păng, thị xã Sa Pa cux tuôx muk cơưv ntơưr, sir jos đros uô têx hâux lưv xưk li cxiê hnuz. Nzông Xênhv Thox, shux xênhz lớp 9A heik: “Niêx hnuz tuôx cơưv, cur tâu chor cưk kriê ntơưr heik kriê cov hnar tril yo sor, trâu khâu thov khưv, khâu ntâuz hur si. Hâur tsêr lớp cux muôx meir ntê sor hur si, viv li pêz tso siêz tuôx nhoz cơưv ntơưr”.

Cxuô lớp cơưv puôr lênhx muôx kror trôngx ntov thêir chuô txiêk thiêz saz hâur tsêr cux muôx meir ntê sor hur si. Lơưr cưk kriê Phạm Thúy Hà, phưv thơưx seiz car tsêr cơưv cxênhx 2 Phan Si Păng, ntơưv tsêr cơưv tsênhv muôx 170 ntâu lênhx shux xênhz nox nhoz hâur tsêr cơưv niêv txir zus mor, chênhr viv li iz chas taz por kriê thiêz cơưv txux chi, tsêr cơưv tsênhv sir jos txoz cxơưx pluôk nox, qơư pư trâu chor nhuôs hâur têx hnuz no njiv thiêz: “Têx qar tsêr pư pêz puôr lênhx bax muôx meir ntê sor hur si chiê têx jiês no njiv hênhr chor nhuôs thiêx tâu ntê. Pêz cux muôz cxaz nzir iz luz txax 2 đeiv pav sor. Iz chas co, chor nhuôv têx pluôk nox, pêz bax uô txâuk têx jâuz mor cxix cxuô, thâuv zuôr txos six nox mor li pheiz têx jâuz mor trâu nhuôv shux xênhz nox thiêx sor”.

Đros thiêz thax tsav tox siêz Sa Pa, lơưr cui tinhv, hâur têx hnuz no njiv hênhr, tsuv tso shux xênhz so ntơưr. Taz sik, zơưv Trần Ngọc Cừ, Phưv tsar Phongx zoz zux thị xã Sa Pa heik pâuz, viv Sa Pa zos thax tsav qơư phiv liv, ntux txơưr txar ntâu, chênhr zos li heik co, tsi zos thâuv tưs cux uô trơưk đreiv cui tinhv, tsuv seiz yênhx luz tsêr cơưv bax uô têx hâux lưv phax tar no njiv li chas trâu shux xênhz cuv huv đros. Muôx kênh thax tsav qơư no njiv hênhr hâur ntâu hnuz, zos tso shux xênhz so ntêr li ntơư cux tsi jông: “Viv nhoz no tsi thôngx li luôs 2 chas thax tsav, zos tso shux xênhz so ntơưr, pêz cux tsi muôx six hơưv, hnuz nhôngs kriê nzir têx txux chi trâu chor nhuôs. Chênhr viv li, pêz tsuv khưx phưx txix taz por muôx qơư nhoz truôx tuk, tril yo sor trâu shux xênhz hnar đros trâu têx tsưr ziv phax tar no xưz”.

Shông cơưv 2023-2024, Sa Pa muôx 64 luz tsêr cơưv, 25 cxênhz ntâu lênhx shux xênhz. Thax tsav tox siêz muôx ntâu tsôngv box heir nênhs tsơưs no cux tsênhv yuôr ntâu qơư txov nhêv, hâu nov ntơưv qơư thiêz ngênhx zoz zux thâuv tưs txos cheix ntux no, puôr lênhx hu lơưk chor nênhx siêz jông sik đros paz têx pav vor, tsôngk tril yo sor, thov khưv, zav nox uz no....tuôx trâu shux xênhz chiê têx nhuôs tso siêz tuôx cơưv ntâuz ntơưr./.

An Kiên-Riê Lâux cxeik, nhênhv