Cưk kriê thiêz shux xênhz tox siêz Sơn La chuv tôngv por vêv đas jos hâur têx hnuz ntux no njiv

Nhoz siêz 1 cxênhz 500 yiv pir đros ntus đêx hiêr, xã Tà Xùa, huyện Bắc Yên (Sơn La) zos thax tsav yax six trâus zênhr shar hnhar tiv ntux no njiv. Têx hnuz no, jêx tưv nhoz Tà Xùa khênhr muôx nhos 10 tưv, shux xênhz li têx huôx tôngv xênhz huôx thiêz cơưv ntơưr nhoz no njiz ntâu phêv liv. Shux xênhz Mùa Thị A, cơưv lớp 9, tsêr cơưv cxênhx 1 thiêz cxênhx 2 Tà Xùa, huyện Bắc Yên pheiz kênh: “2-3 hnuz no ntux lok six no njiv, cur tsuv hnar cov sor chiê tsi trâus moz, tsi tsuv so ntơưr, muk cơưv ntơưr tâu cxix cxuô”.

          Tsêr cơưv cxênhx 1 thiêz cxênhx 2 Tà Xùa nhiv no muôx 800 ntâu lênhx shux xênhz; hâur co, iz đraz ntâu shux xênhz nox nhoz ntơưv tsêr cơưv. Ciês thâuv txos cheix ntux nas, tsêr cơưv tưz kho đuô qơư nox nhoz trâu shux xênhz, taz por đas jos trâu têx mê nhuôk shux xênhz hâur têx hnuz jêx tưv grês kis. Zơưv Lê Văn Hòa, hiệu trưởng tsêr cơưv cxênhx 1 thiêz cxênhx 2 Tà Xùa, huyện Bắc Yên puz pâuz: “Đros qơư nox nhoz, tsêr cơưv pheiz 8 lênhx shux xênhz nhoz hâur 1 phongx. Têx hnuz ntux fênhx yax mak iz lênhx 1 luz txax. Têx hnuz cheix ntux no mak 2 lênhx pư iz txax, muôx 2 đeiv pav puô, 2 đeiv pav vor”.

          Zos xưk li shux xênhz khối cxênhx 1 thiêz cxênhx 2 tâu têx cưk kriê chuv tôngv por vêv đas jos; mak 330 ntâu lênhx mê nhuôk zâu nhoz Tà Xùa ho tâu têx cưk kriê tsoz phưz jông đuô. Tsêr cơưv cxênhx mê nhuôk zâu Tà Xùa cux tưz qênhz yuôx, kho đuô têx qơư cơưv trâus puôk tsuôx nhoz 6 tsêr cơưv; cxaz nzir têx zav pav sor chiê mê nhuôk vor. Pos Nguyễn Thị Thanh Nga, Hiệu trưởng tsêr cơưv cxênhx mê nhuôk zâu Tà Xùa, huyện Bắc Yên heik: “Tsêr cơưv taz por phax tar chuô njơưx, sor si, lớp cơưv pov cêr, chiê mê nhuôk cơưv ntơưr, pư hâur tsêr cơưv. Nox so ntơưv tsêr cơưv taz por nox sor hâuk bâu. Thôngx cxix, tsi tsưr tsix têx huôx tôngv chêx chôngk đrâuv jôngr hâur têx hnuz ntux no njiv; yax six thôngz xor mông đros shux xênhz li niêv txir lok mê nhuôk li đas jos”.

          Bắc Yên zos huyện tox siêz nhoz tỉnh Sơn La, muôx 42 tsêr cơưv txix cxênhx mê nhuôk zâu txos cxênhx 2, đros 20 cxênhz ntâu lênhx shux xênhz. Tox siêz ar cxaz, tsôngv box nhoz tsi chêx chôngk, qênhx shênhx qiv hơưv tsi so uô zênhr shar ntâu txos cưk kriê thiêz shux xênhz nhoz no li hâux lưv kriê thiêz cơưv ntơưr. Nganhx zaoz zux thiêz thox cxov huyện Bắc Yên tưz chuv tôngv têx tsưr phax tar têx jiês ntux no njiv. Zơưv Nguyễn Hữu Sơn, Phưv tsar phongx zaoz zux thiêz thox cxov huyện Bắc Yên, tỉnh Sơn La puz pâuz: “Qiv hơưv shông no muôx ntâu jiês ntux no njiv, cux uô phêv liv trâu têx tsêr cơưv hâur hâux lưv bax qơư nox so sor si trâu shux xênhz; trik yo, pav...Phongx tưz chox kriê têx taz viv chuv tôngv uô têx tsưr ziv phax tar no trâu shux xênhz; tsov lơưr qênhx shênhx ntơưv tiv phaz, têx taz viv chuv tôngv hlôngr six hơưv cơưv ntơưr, tso shux xênhz so ntơưr trơưk cui tênhv”.

          Hâur ntu zuôr txos, njuôs pov zuôr tror muôx têx jiês ntux no njiv nhoz Sơn La cux xưk li têx tỉnh tox siêz faz Bắc. Têx qơư zaoz zux nhoz tox siêz tsuv chuv tôngv krêz uô têx tsưr ziv phax tar ntux no huv đros, taz por đas jos trâu cưk kriê thiêz shux xênhz./.

(Lê Hạnh- Txâur Vax cxeik nhênhv)