Ntux yiêz nzor ntơưv tsêr kho moz

           Têx suôz thav, hêik luk đrông ntưk no tsik zos ntơưv iz qơư tsar đrênhk yêz thâux xa kruô hâur têx hnuz jê Tsiêz, mak zos ntơưv Tsêr kho moz chor nênhs lâul-Paz đas jos tỉnh Lào Cai. Paz muôx ntux yiêz lok txos ntơưv yênhx qar kho moz-qơư muôx chor nênhs moz pluôs, mênhx cxưx tsơưs nênhs tsênhv tsuv nhoz chiê kho moz ntêr hnuz. Tsaz yênhx “Ntux yiêz siz hluz – Tsiêz Sor siêz” chênhr zos chor jiês yêz tuôx paz trâu lơưr muôx tâu Tsiêz nzor đuô.

           Pêz luz hli no, pos Lù Thị Bình (xar Phong Hải) li hâux lưv zos muk lok trâu tsêr kho moz chiê sêiz jor tuk txir trâus tuôs chêr. Txoz cxơưx txos nox hnar, yuôx kho moz tưz uô phiv li ntâu txos trâu lênhx pox niêv muôx luz nênhx txos nhêv no, uô trâu pos tsik car xar txos Tsiêz hlo. Taz sik hnuz no, txêik tâu têx hax huv zos chor bác sĩ muôz paz, têx kror cêr cxơưx co xưk tưz grêk tsơưs ntâu: “Uô tsâus tsêr kho moz tưz paz trâu chor nênhs pluôs li pêz muôx tâu Tsiêz cxix cxuô, zos tiêk muk tsêr mak cur cux tsik muôx tsiêz no…”.

         Zos tiêk pos Bình nhiv kruôr muôx oz pêz hli nhoz hâur tsêr kho moz, mak xưk pos Đặng Thị Mai, tsêr kho moz xưk li tưz zos zuk luz tsêr tiv oz. Pir đros pôngz siêz, pos tưz shir phaz đuô thâuv muôx chor bác sĩ sir jos đros paz. Pluôs mor ntux yiêz ciês ntơưv tsêr kho moz tưz paz trâu pos shir phaz thiêz sor siêz đuô: “Tsiêz no zos Tsiêz tiv 4 pos nox tsiêz ntơưv tsêr kho moz, thâuv txos kaz shông tưs cux muôx pluôs mor ntux yiêz trâu chor nênhs moz, uô tsâus chor bác sĩ thiêz nênhs siêz jông ntâu hênhr”.

         Pos Mai têx suôz luôs lok sik pos Bình cêr shir phaz chênhr zos têx kror tsiv gri lox paz cxơưz cxiz chor nênhs uô hâux lưv chơưv kho moz. Đros niêv tix Nông  Thị Hậu thiêz Tôv côngz xưv xar hôiv tsêr kho moz, lơưr tưz tsik zos uô hâux lưv njuôk kho moz xưz, mak sir jos tsik chiê lênhx tưs trâus tso tsês tov kaz: “Tas nro chor nênhs uô côngz xưv xar hôiv li pêz puôr pênhx pov shir phaz thâuv tưz uô tâu têx kror jông trơưk siêz xar, đros sir jos viv pêx xênhv, paz trâu lơưr truôx siêz, sir jos hla cov đhâu ntu phiv liv tiv zix hâur zuk luz nênhx”.

         Ntux yiêz Nênhl shông 2026 tsênhv lok zuôr txos. Tưz tsik zos muôx têx pax txir đuôx, pax mai, ntux yiêz tsênhv muôx nhoz hâur chor nênhs kho moz ntơưv no têx suôz luôs, cêr nênhx shir phaz. Co zos têx kror siêz jông, siz hluz, siz paz chiêz paz cxơưz cxiz, paz muôx cêr shir phaz jông tiv zix trâu sơưr đơưk./.

An Kiên-Lik Thox cxêik nhênhv