NÔNGX MÊNHX ZUÔR TSUV PÂUZ

Tsôngv pox nhuôs hmor yuô. Tix lâus Dựng Xênhv Vax nhoz jok Đội 4, xar Bản Liền, huyện Bắc Hà, tỉnh Lào Cai uô bluô nux txix chos yuôx zêx. Zâuv sơưr đơưk đros nriêr pâuz tix lâus têx tsưr ziv uô nox no.

Dựng Xênhv Vax uô bluô nux txix chos yuôx zêx

Shông 2004, Dựng zuôr pox niêv thiêz phêiz chuôz. Thâuv co tix lâus chuôz zis zos iz hâur chor chuôz zis pluôs nhoz hâur jok, yênhx shông tsuôk pâuz chos poz cưk thiêz uô blêx liêx. Ndo txos thâuv ntu tsênhv txov nhêv, Dựng hêik, thâuv ntêx, jok Đội 4, xar Bản Liền, tsoz yuôx zêx tsik tâu chos muôs uô hax huv li nhiv no. Ntu co tiv têx yuôx zêx co tsik muôx suôz bê viv li pox nhuôs chor yuôx zêx chos thiêz uô tâu cux muôs tâu tsơưs, gri muôs kik. Pêx xênhv khưr yênhx shông taz sik phênhv sâu txix yuôx zêx cux tsik tâu luôx tưs.

Chor shông 2005-2006, tâu têx qơưk paz đros chor nhiêx chuôz zis cxênhx txuôs tâu, tix lâus oz niêv txir tưz cuêz tênhv chos 6 ha yuôx zêx sâuv chuôz zis chor ar tox trông tso không lơưr tsưr ziv uô yuôx zêx hur chiê muôx tâu têx yuôx zêx tax tsơưr lươngv, iz thênhv jux juk paz uô trâu yuôx zêx tiv phaz muôx suôz bê. Đhâu ntâu shông tsoz phưz thiêz kriz đar thax tsav chos, nhiv no tix lâus Dựng chuôz zis tưz muôx zuôr xar 20 ha yuôx zêx, hâur co 15 ha tsênhv jông sâu đê, ciês chiv yuôx zêx shông 2017 tix lâus chuôz zis sâu tâu xar muôx 200 triệu đêiv.

Tưz tsik zos chos thiêz muôs yuôx zêx njuôz li chor chuôz zis txơưr đuô, tix lâus chuôz zis yưv pênhr zuôr pêz luz mêir ciz yuôx zêx, txix tsưr ziv chiv chir chos, sâu đêx thiêz ciz yuôx zêx uô huv li ploz tsênhr. Đros cxiv uô qơư uô xênhz yar, tix lâus Dựng tsênhv muk ndis shuôk têx tsêr mêir thiêz ntâu qơư têx tsưr ziv uô, thiêz muôz zuk têx yuôx zêx chox muk muôs piêr pâuz trâu ntâu qơư. Jux juk, tsơưr lươngv yuôx zêx zos tix lâus chuôz zis uô tưz tâu khav tênhv, uô tâu bâuv chak mak muôs tas bâuv co. Đros gri muôs txix 85.000-120.000 đêiv iz cir yuôx zêx kruôr. Đuô li tix lâus qơư uô yênhx shông tsênhv ntiêr nzir 6 txos 8 lênhx côngz nhân lox tôngv đêx yuôx zêx, ciz yuôx zêx, paz muôx tâu hâux lưv uô trâu lox tôngv nhoz tiv phaz. Nhiv no chor chuôz zis hâur jok, hâur xar thiêz ntâu nênhs uô lax luôv, ntâu chuôz zis nhoz têx qơưk txơưr đuô cux nriêr tuôx tix lâus tsêr chiê zuôr yuôx zêx kruôr.

Nhạc cắt

Muôx nzir pênhr, Dựng tror yưv pênhr uô vax tsêr cxuô zav, zuôr nzir têx chuôz zênhx uô yuôx zêx yiêz, kriz đar qơư uô xênhz yar. Iz shông, Dựng chuôz zis uô tâu 5 tấn yuôx zêx kruôr. Cux khov muôx pênhr Dựng tưz chos nzir 2 ha txir hơưk, zus 5 tuk tưv sha mê nhuôs, 14 tuk yil, thôngx cxix muôz trâu 4 chuôz zis tsênhv txov nhêv hâur jok đros tu zus lơưr tsưr ziv siz phêiz. Đhâu co paz trâu ntâu ziv chuôz zis hâur jok hla đhâu cêr pluôs.

Zơưv Xưv Xênhv Vax, phưv chủ tịch UBND xar Bản Liền puz pâuz: Dựng Xênhv Vax li tsưr ziv chos thiêz uô yuôx zêx zos iz hâur têx tsưr ziv uô paz muôx tâu chêx cur kinh têr siêz sâuv thax tsav xar. Tix lâus Dựng tsik so uô ntêx hlo, cxaz chuôz trâu têx huôx tôngv, phongz yaox jêx jok thiêz xar tso tơưv. Chiê cxơưz cxiz chor chuôz zis hâur xar sir jos huôv tsar tsoz yuôx zêx gra siêz luz nênhx, Ntu zuôr txos cấp ủy chính quyền tiv phaz tưz muôx tsênhv chêi paz trâu pêx xênhv lok pênhr, zuz nôngz, kỹ thuật thiêz chuôz zênhx; thôngx cxix zok nriêr qơư muôs têx hax huv uô tâu ntơưv tiv phaz.

Car xar, car uô, txix iz chuôz zis pluôs, tix lâus Dựng Xênhv Vax chuôz zis tưz sir jos yênhx ziv chuôz zis bluô nux hâur xar.

Phênhv “Nôngx mênhx zuôr tsuv pâuz” hnuz no zos Đaix TNVN sik côngv đros tsênhv qơư cxơưz cxiz uô kôngz têz qơưk uô./.

(Lik Thox cxêik nhênhv)