Tix lâuk Tsaz A Pao tu zus tưv sha nhuôs

( Hlôngr suôz)

          Nhiv no, chuôz zis tix lâuk Tsaz A Pao nhoz jos 9, Vài Siêu xã Thượng Hà li paz tưv nhiv kruôr tâu lơưr cxôngx qơư tso nhux lol jê tsêr nhoz chiê jav jiês ntux no zuôr txos. Tas nro paz tưv muôx 21 tul, hâur co muôx 10 tul niêv nhux sha nhuôs, iz shông chungz fênhx tix lâuk chuôz zis muôs 3 txos 5 tul. Tâu pâuz shông 1994 tix lâuk Tsaz A Pao đros pox niêv zos Zax Thị Mây txar cxôngx Si Ma Cai lol nhoz ntơưv jos 9 Vài Siêu xã Thượng Hà. Qir thơưx, tix lâuk zus 1 txos 2 tul tưv chiê leix têz. Tov kaz no pov nhoz no muôx ar têz đar, muôx qơư tso nhux. Cxôngx co tix lâuk truôx siêz yưv pênhr huôv tsar tu zus tưv uô hax huv.

          Lơưr tix lâuk Pao mak tu zus tưv tsi lax, đrâuv yưv pênhr qir thơưx, phax tar moz trâu paz tưv mak coaz tsôngv đuô zos nênhs tu zus tsuv gruôs. Tsoz phưz jông nhux thiêx khênhr hloz, chox lol phênhv sâu trâu zuk. Tix lâuk chuôz zis tsês 1 hecta ntâu chiê chos đrox, niêx shông thâuv sâu blêx tas, tix lâuk cux sâu têx hnhaz blês uô jâuz puz nhux nox. Thâuv muôx xor mông qiv hơưv no njiv tix lâuk ho lơưr nhux lol jê tsêr chiê zôngx ziv tsoz phưz, jav ntux no njiv. Khov co muôx têx shông sâuv thax tsav huyện muôx zuôr xar 1000 tul nhux tưv nhux đas trâus tuôs no mak tix lâuk li paz nhux cux tsi trâus zênhr shar tul tsi.

Nhạc cắt

          Tix lâuk Pao puz pâuz, tu zus nhux tưv ntu nhux sha nhuôs tsuv tsov cưv: puz niêv nhux nox jâuz krâur thiêz txir ntông xưk li uô ntêx thâuv nhux sha nhuôs 2-3 luz hlik, puz nox ntâu jâuz cxôngx 20-25 cir; 3,5 txos 4 cir krâur, 3,4 txos 5 cir môngr poz cưk; 5-10 cir txir ntông. Zos nhux tsênhv tu mê nhuôv nhux, nhuôv nhux tsênhv nox mis, taz sik zos nhux tso cuô mis mak tsuv cêv kuôk tsi puz mê nhuôv nhux nox mis, zos nhux, zos nhux tso tsi tâu cuô mis, tsuv muôx mê nhuôv nhux thiêx tso cuô mis mak tso nhuôv nhux đriês jê niêv nhux.

          Đrâuv co, tsuv puz nhux đa đêx hâur niêx hnuz.Tiv zix tsuv uô vêv xênhz jông niêv nhux luz txir mis, viv hâur six hơưv no zôngx ziv trâus caz moz uô o vôngk. Thâuv tso cuô mis tas, tsuv zôngv đêx hur nzuôr luz txir mis thiêz muôz so kruôr.

          Cux cxôngx tu zus tưv mak tix lâuk chuôz zis tưz muôx nox muôx tsês, shông 2012 thâuv grê muôs tưv chuôz ndê, hâur shông tix lâuk Pao muôs 3 tul tưv, iz tul tsiv grê 50 tsov đeiv ntâu, côngv đros chor nhiêx txiêx cxênhx tsês tâu, tix lâuk 2 niêv txir tưz cxiv tâu luz tsêr yiêz jông đuô.

          Chox lul: Tsôngv box..yuô! Phênhv “ Nôngx mênhx zuôr tsuv pâuz” ciêz no tsuôk muôx xâuk li no xưz. Phênhv nôngx mênhx zuôr tsuv pâuz zos Đeix nta suôz VN côngv đros Tsênhv qơư cxiz kôngz têz qơưk uô./.

(VOV-Txâur Vax cxeik nhênhv)