Nôngx mênhx zuôr tsuv pâuz

Lênhx tuz hluôk mênhx cxưx Hmôngz sir jos uô bluô nux

Đhâu Hội nôngx mênhx xã Tả Van Chư li heik kriê, pêz muk seiz lênhx hluôk tuz mênhx cxưx Hmôngz Shôngx Seo Sếnh li trâur nuv huôv tsar kinh têr. Pêz pov vax txir ntông tâu tsoz phưz lok six jông thiêz huôv tsar njuôz jông.

          Mnôngs Sếnh thav, pêz tâu pâuz, tix lâuk tâu xênhz zus thiêz hloz lox hâur iz chuôz zis uô kôngz. Viv luz nênhx lok six txov nhêv, tix lâuk Sếnh cơưv tas cxênhx 3 txơưv so ntơưr nhoz tsêr paz niêv txir uô liêx têz. Thâuv zuôr pox niêv, tix lâuk Sếnh pheiz chuôz tsi đros niêv txir nhoz thiêz. Qir thơưx, tix lâuk Sếnh cux tsi pâuz uô li chas chiê huôv tsar kinh têr chuôz zis cov muôx chêx cuk. Jênhv pov trâur nuv huôv tsar tu zus huv đros tiv phaz viv li tix lâuk Sếnh tưz krêz iz qơư tu zus buô, keiz, yik. Taz sik, viv tsi muôx chênhz zênhv tu zus, keiz thiêz buô trâus moz ơưk thiêz tuôs tas.

          Shông 2016, tix lâuk Sếnh qir uô ar têz chiê hlôngr chos ntông nox txir. Uô ntêx thâuv chos, tix lâuk muk ndis shuôk cơưv shâuv chênhz zênhv chos ntông nox txir nhoz iz cxiê thax tsav txơưr chiê lok uô ntơưv tiv phaz. Txos nhiv no, tix lâuk Sếnh chuôz zis muôx 500 ntâu tsoz txir khơưz Tả Van thiêz lê Tai Nung. Xav kror đruôz đraz, iz shông tix lâuk chuôz zis muôx phênhv sâu txix 30-40 tsov đeiv txix muôs txir khơưz, txir juôx trâu niêv ciêz.

          Tiv zix, txix shông 2016, uô tsaz yênhx huôv tsar chos yuôx njuôz sâuv thax tsav, huyện Bắc Hà tưz chox tsoz cát cánh lok chiê pox nhuôk xã Tả Van Chư chos siv. Thâuv têx ziv chuôz zis hâur jos chos chox lok chêx cuk kinh têr siêz, đrâuv chos txir khơưz thiêz txir juôx, Tix lâuk Sếnh chuôz zis tưz truôx siêz đăng cir chos 0,7 hecta tsoz yuôx njuôz cát cánh thiêz tuôr truôx chos txos nhiv no. Chungz fênhx iz shông, tix lâuk sâu tâu 110-150 tsov đeiv. Shông 2022 thiêz hâur shôngk shông 2023, phênhv sâu txix yuôx njuôz, tix lâuk Sếnh sâu tâu 6 tênhr yuôx nhôngs, grê muôs 20 cxênhz đeiv iz cir, sâu lok tâu muôx nhos 120 tsov đeiv.

          Lơưr tix lâuk Sếnh, chiê tsoz yuôx njuôz huôv tsar jông, tsuv chos trơưk tsưr ziv lơưr cán bộ huyện heik kriê. “Cur thiêz pox nhuôk hâur jos tưz tâu cán bộ cxiz kôngz xã, huyện kriê cxaz tsưr ziv chos, tsoz phưz, zuôv qir txos thâuv sâu đê… khov co, tsơưr lươngv xiv huv tsoz yuôx njuôz tâu muôz siêz đuô. Nhiv no, cur chuôz zis tưz muôx luz nênhx jông đuô, muôx cxaz têx theox chênhv tsoz phưz mê nhuôk muk cơưv ntơưr.

Ntu zuôr txos, tix lâuk Sếnh tsênhv muôx tsưr ziv cxiv tsa xiv huv txir khơưz Tả Van yênhx xiv huv OCOP chiê muôs tơưv trâu niêv ciêz thiêz tâu ntâu lênhx nênhs đuô pâuz txos. Zos đoàn viên hluôk, tix lâuk Sếnh zos đeiv iêr, uô ntêx nyuôk sir jos cxaz chuôz têx phongz yaox tưr thik nhiêv têz nhiêv qơư nhoz tiv phaz, tiv zix zos phongz yaox Đoanx hluôk nênhs, cxaz chuôz gôngr côngv đas jos, nhiêx txiêx krêz cêr, uô cêr bê tông zaoz thôngz nôngx cxênhz, vêv xênhz tênhx qơư, yax mông, vênhv tôngv, pheiz kênh chênhz zênhv uô nox, tsiv uô kôngz nuv trâu hluôk nênhs pluôs hâur jos, xã sik đros cxaz chuôz huôv tsar yuôx njuôz đương quy thiêz cát cánh, gôngr phênhv krêz đar mênhv chêx, muôz siêz chêx cuk kinh têr, txu grês cêr pluôs truôx vênhs.

Phênhv “Nôngx mênhx zuôr tsuv pâuz” hnuz no muôx xâuk li no xưz. Phênhv no zos chiz coaz Đeix nta suôz Vn nhoz faz Bắc uô, muôx Tsênhv qơư cxiz kôngz têz qơưk paz txưv./.

                                                         Tsu Vưx- Txâur Vax cxeik nhênhv