Viv li chak chor nênhs muôs huv ntơưv Lào Cai cơư trôngx tsik muôs hax huv?

           Xar muôx iz ciêz no, ntâu kror qơư muôs hax huv ntơưv thành phố ntus đriv Lào Cai cơưv kror trôngx jông tsês, tsik muôs têx hax huv. Kror no pov lok six jông xưk li iz cxiê thax tsav muôs hax huv txơưr ntơưv Vĩnh Tường (Vĩnh Phúc) lok sik Ninh Hiệp (Hà Nội). Trơưk niêv tix Phan Thị Quỳnh, nhoz phường Kim Tân, thành phố Lào Cai, hnor tiêk chor lưx lươngv muôx vax huôv tsênhv sir jos xưv lik chor hax huv cxâuv chêi viv li chor ziv chuôz zis muôs hax huv tưz cxơưx hlo, cơưv kror trôngx tsês cov ngaz tuk: “Tas nro ciêz Kim Tân, Cốc Lếu, Gốc Mít, lok sik ciêz Phố Mới puôr lênhx cơư kror trôngx tas hur si, phênhv ntâu puôr lênhx zos chor hax huv Trung Quốc tsik muôx ntâuz ntơưr; xav tas nro chor qơư muôs hax huv uô khax, khâu, chuôz zênhx tênhv, chuôz zênhx sir zôngv… cux cơư kror trôngx hur si, tsuôk yuôr chor qơư muôs jâuz, grêix mak cux tsênhv muôs viv lênhx tưs cux tsuv zuôr lok nox”.

              Lơưr zơưv Phạm Khắc Phương, Trưởng Ban Sêiz car Ciêz Cốc Lếu, thành phố Lào Cai, đhâu muôx tsik tsơưs txuz sâuv thax tsav trâus xưv lik đros muôx chinhr quyền thax tsav qơư têx ntâuz ntơưr chox kriê, piz txix zar hnuz kêix 26/5, chor ziv chuôz zis kinh doanh ntơưv ciêz tưz so tas hur si tsik kriz qơư muôs têx hax huv, taz sik đhâu oz pêz hnuz tưz tror kriz qơư chiê muôs têx hax huv. Zơưv Phương puz pâuz, chor hax huv muôs ntơưv ciêz Cốc Lếu tsik zos tas nro puôr lênhx zos hax huv Việt Nam mak muôx ntâu hax huv txix Trung Quốc, tâu chox lok đhâu ntus đriv viv li tsik zos hax huv tưs cux muôx cxix cxuô têx ntâuz ntơưr. No têx jâuz zos qir tiv chor nênhs muôs hax huv txơưv pâuz tiêk tsênhv zos ntu sir jos xưv lik têx hax huv tsik zos chêi, hax huv chuôr, taz sik txơưv tsik muôx ciês têx hax huv li hêik co lok sơưr đơưk cux cxơưx hlo: “Zos tiêk chor cơ quan muôx vax huôv tuôx tưz tsik zos xưv lik chor hax huv chuôr, hax huv tsik zos chêi mak xưv lik tas nro chor hax huv li têx hax huv pâuz tsik tsênhz qơưk uô, lok sik tsik muôx ntâuz ntơưr viv li sơưr đơưk lok six nyêi”.

             Lơưr zơưv Đỗ Du Bắc, Chi cục trưởng Chi cục Sêiz car ciêz đrôngs tỉnh Lào Cai, jiês qênhz yuôx no zos kriz uô sêi, tsuv uô jông lơưr têx cui tênhv lok pov muôx têx uô cxâuv lok sik muôx hêik pâuz, pênhr uô cxâuv… mak lưx lươngv muôx vax huôv thiêx qênhz yuôx. Kror chor chuôz zis kinh doanh cơư trôngx tas hur si chiê tir tar chor cơ quan muôx vax huôv qênhz yuôx zos kror uô trơưk chôngz lênhx nênhs siêz xar xưz, tsik tâu jênhv pâuz cxix cxuô lok chêi têz qơưk: “Zos fênhx sir jos uô tsik so li no mak cur xar tiêk chor ziv chuôz zis kinh doanh cux tsuv nriêr pâuz chiê kho đuô muôs têx hax huv cov huv zos lơưr chêi têz qơưk têx cui tênhv”.

            Ntơưv jiês uô hâux lưv đros đoanx côngz xưv Bôv Kôngz nuv thiêz Tênhv qơư cik txos jiês tổng qênhz yuôx, zơưv Nguyễn Thành Sinh, Phưv Chủ tịch Ủy ban tỉnh Lào Cai hêik pâuz, xav txix hnuz 15/5 uô lơưr Thủ tướng Chinhr phuv công tênhv sôr 65 txos nhiv no, lưx lươngv muôx vax huôv ntơưv Lào Cai tưz xưv lik muôx 90 ntâu txuz zuôr muôs têx hax huv txưr, hax huv chuôr, hax huv uô cxâuv chêi sở hữu trí tuệ, hax huv tsik zos chêi. Têx hax huv uô cxâuv phênhv ntâu zos chor grêix jov mok lok zos xúc xích, co tơư kêiz, khâu, tsôngk yo…, hâur co muôx 2 txuz sir zôngv hóa chất muôx tưx uô chor câuk tâuv njuôz trâus muôz tik cêr cxâuv: “Lào Cai cux xav jênhv phax tar hax huv chuôr, tsik zos chêi zos jênhv vưv tsênhv njiêz tsuv sir jos uô sâuv thax tsav, viv li côngz xưv no cux tâu kriz uô tsik so. Ciês hâur hli kriz uô, uô lơưr Chỉ thị 13 thiêz Thủ tướng Chính phuv li Công tênhv mak Lào Cai lok six sir jos uô ntov jông”./.

An Kiên-Lik Thox cxêik nhênhv

Lục Yên (Yên Bái) chuôz tsar ntâu tsưr ziv chiê txu grês qênhx shênhx mê nhuôk trâus pôngz đêx

          Hâur shôngk shông 2025, ntơưv jos 9, xã Tân Lĩnh, huyện Lục Yên (Yên Bái) muôx yưv txuz pôngz đêx uô ntâu lênhx nênhs lok six pôngz siêz. Co zos iz lênhx mê nhuôk, chiv chir muk gra đêx tov pas đêx lok cxov caz jiêv. Hmôngr tsi jông plav tơư thiêz pôngz trâu hâur pas đêx, thâuv nriêr pov mak tưz lis lơưv. Txix hâux lưv co, chính quyênx xã Tân Lĩnh tưz zuôr chênhz zênhv thiêz krêz uô ntâu tsưr ziv txos qơư đuô chiê phax tar txiêz nanv trâus saz, pôngz đêx trâu mê nhuôk. Zơưv Triệu Văn Chiến, Phưv Chủ tịch UB xã Tân Lĩnh puz pâuz: “ Chính quyênx tiv phaz tưz vênhv tôngv têx chuôz zis, chox kriê têx tsưr tsix, đoanx thêv xor their têx pas đêx thiêz cxok fiêx canhv pov đros mê nhuôk. Thôngx cxix yax six vênhv tôngv, yax mông têx chuôz zis heik zuk li tuz nhuôk tsi muk tov têx pas đêx, tul đêx uô si thâuv tsi muôx nênhs hloz đros muk, chox mê nhuôk muk shâuv uô luôv đêx chiê phax tar pôngz đês”.

          Xã Tô Mậu, huyện Lục Yên nhoz buôk tul đêx Chảy, ho muôx cxix luôk têx tul đêx ntâu, njuôs xav muôx yưv qênhx shênhx pôngz đêx siêz. Txix shông 2021 txos nhiv no, xã tưz muôx 8 lênhx nênhs trâus pôngz đêx tuôs, hâur co muôx 5 lênhx zos mê nhuôk zâu. Tiv zix zos txuz hâux lưv muôx yưv shông 2023, thâuv 2 tul mê nhuôk xênhz shông 2011 đros nênhs cxênhz jê muk khơưk tơưs, thâuv nênhs hloz tsênhv max uô hâux lưv, têx mê nhuôk co uô si jê ntus đêx thiêz plav tơư pôngz trâu hâur tul đêx ntưs lox. Zơưv Lương Văn Khiên, Chủ tịch UB xã Tô Mậu puz pâuz: “ Xã pheiz côngz cán bộ công chức phưv txơưx vênhv thix mê nhuôk zâu, lưx lươngv công an xã yax six yax mông phax tar pôngz đêx thiêz txiêz nanv trâus saz sâuv thax tsav hâur têx jiês khiêz phêv jêx jos, đhâu mạng xã hội Zalo, Facebook...”

          Tsi taz chính quyênx thiêz đoanx thêv, ntâu chuôz zis sâuv thax tsav huyện Lục Yên cux tưz chuv tôngv uô têx tsưr ziv phax tar pôngz đêx trâu zuk mê nhuôk. Tix lâuk Đinh Văn Khải nhoz jos Làng Mường, xã Tô Mậu, huyện Lục Yên puz pâuz cxaz: “ Mê nhuôk mak tul tưs cux li ntơưv, pov đêx mak xar muk txov. Cur chuôz zis cux muôx pas đêx viv li cur xor their tas iz ndis thâuv tưs thor cur thiêx li puz mê nhuôk muk jê pas đêx”.

          Lơưr pos Nông Thu Hà, Phưv Chủ tịch UB huyện Lục Yên, tỉnh Yên Bái: Huyện tưz cxiv tsa tsưr ziv huôx tôngv tsênhv tsênhz, hâur co tsov cưv txos yax mông, zaoz zux pênhr xưv uô nênhx thiêz tsưr tsix têx huôx tôngv cheix ntux sor jông trâu me nhuôk. “ Huyện tưz muôx ntâuz ntơưr chox kriê têx chiz coaz chuyên môn, têx tiv phaz chuôz tsar qênhz yuôx têx huôx tôngv hâur cheix so sor, cux xưk li sik côngv đros  niêv txir, têx đoanx thêv muôx têx qơư uô si, tsưr ziv uô si jông trâu mê nhuôk”

          Pôngz đêx mak zuôr phax tar tâu zos cxuô lênhx nênhs, cxuô ziv chuôz zis thiêz tas nro côngv thôngx sik đros siêz siêz xar tsưv ziv. Mê nhuôk tsuv tâu kriê cxaz, tâu seiz njôngr cov jông, tiv zix zos tâu nhoz uô nênhx hâur iz tênhx qơư jông thiêz muôx txơưx jênhv. Thâuv nênhs hloz chuv tôngv phax tar, cxuô lênhx mê nhuôk chiv chir pâuz por vêv trâu zuk, mak cheix ntux sor thiêx li tsênhz tsênhz zos iz luz cheix so sor taz por, shir phaz./.

Thừa Xuân- Txâur Vax cxeik nhênhv