ꪛꪱꪥ ꪖꪱꪣ ꪩꪴꪉ ꫃ꪩ ꪪꪽ ꪀꪫꪲꪥ ꪠꪷ ꪊꪴ ꪕꪉꪲ ꪮꪫꪲ ꪚꪱꪙ ꫄ꪥꪙ ꪹꪣꪉ ꪔꪉꪲ ꪒꪙꪸ ꪚꪙꪸ

ꪣꪱ ꪕꪱꪉ ꪜꪱꪉ ꪶꪭꪥ ꪚꪮꪀ ꪚꪱꪙ ꪜꪲ 2017

          ꪖꪱꪣ: ꪋꪉꪸ ꪩꪴꪉ ꪹꪕ ꪙꪲ ꪨꪷ ꪹꪕ ꪖꪳ 4 ꪜꪱꪉ ꪶꪭꪥ ꪚꪮꪀ ꪚꪱꪙ ꪼꪒ ꪔꪲꪉ ꪒꪙꪸ ꪚꪙꪸ ꪶꪔ ꪊꪀꪳ, ꪶꪀꪀ ꪵꪅꪫ ꪎꪷ ꪩꪴꪉ ꪻꪬ ꪭꪴ ꪄꪴ ꪻꪢ ꪄꪮꪉ ꪜꪱꪉ ꪶꪭꪥ ꪜꪲ ꪙꪲ ꪨꪷ ꪄꪴ ꪎꪉꪰ?

ꪕꪮꪚ: ꪁꪳ ꪕꪮꪥ ꪥꪱꪙ ꪢꪮꪥ ꪜꪲ ꪹꪕ ꫜ ꪒꪙꪸ ꪚꪙꪸ ꪶꪔ ꪊꪀꪳ ꪜꪱꪉ ꪶꪭꪥ ꪚꪮꪀ ꪚꪱꪙ. ꪜꪲ ꪙꪲ ꪏꪴꪣ ꪄꪮꪥ ꪶꪔ ꪊꪀꪳ ꪏꪱꪙ ꪫꪀꪸ ꫃ꪥꪒ ꪻꪢ ꪶꪀꪀ ꪵꪅꪫ ꪨꪷ ꪖꪲ “ ꫛ ꪅꪽ ꪚꪮꪀ ꪚꪱꪙ” ꪖꪲ ꪎꪉꪲ ꪶꪋꪣ ꪖꪲ ꪣꪱ ꪵꪔ 8 ꪔꪉꪲ ꪼꪔ ꪚꪀꪰ. ꪯꪽ ꪙꪲ ꪨꪷ ꪫꪀꪸ ꫃ꪥꪒ ꪼꪫ ꪏꪴꪣ ꪄꪮꪥ ꫄ꪤꪥ ꪖꪫꪸ ꪢꪱ ꪕꪱꪉ ꪙꪣꪾ ꪒꪙꪲ ꪠꪴ ꫛ ꪒꪙꪸ ꪚꪙꪸ; ꪎꪮꪉ ꪣꪱ ꪁꪷ ꪵꪣꪙ ꪥꪱꪙ ꪼꪫ 8 ꪔꪉꪲ ꪼꪔ ꪚꪀꪰ ꪼꪜ ꪣꪱ ꪮꪙꪲ ꪣꪺꪙ ꪵꪮꪚ ꪭꪮꪀ ꪀꪲꪉ ꪈꪣꪸ ꪘꪉꪰ ꪀꪽ ꪼꪫ ꪜꪴꪀ ꪝꪺ ꪫꪀꪸ ꫃ꪥꪒ ꪤꪴ ꪩꪲꪀ. ꪖꪳ 2 ꪨꪷ ꪀꪺꪉ ꪜꪱꪉ ꪶꪭꪥ ꪚꪮꪀ ꪚꪱꪙ ꪜꪲ ꪙꪲ ꪏꪴꪣ ꪄꪮꪥ ꪶꪔ ꪊꪀꪳ ꪝꪉꪳ ꪫꪀꪸ ꫃ꪥꪒ ꪪꪽ ꪬꪫꪱ, ꫃ꪖ ꪖꪱꪫ ꪋꪴ ꪹꪋ ꫛ. ꪜꪲ ꪙꪲ ꪁꪷ ꪹꪕ ꪶꪀꪀ ꪵꪅꪫ ꪏꪴꪣ ꪄꪮꪥ ꪶꪔ ꪊꪀꪳ ꪵꪄꪉ ꪖꪲ ꪄꪲ ꪵꪎ ꪀꪫꪱꪉ ꪔꪱꪉ ꪹꪋꪉ. ꪹꪫꪱ ꪄꪙꪳ ꪹꪉꪙ ꪩꪱꪉ ꪹꪭꪉ ꪻꪎ ꪄꪮꪉ ꪜꪴꪙ ꪩꪱꪙ ꪮꪱꪥ ꪝꪲ ꪼꪜ ꪀꪮꪀ ꪎꪴ ꪵꪎ ꪔꪱꪉ ꪹꪋꪉ ꪭꪱꪉ ꪋꪺꪉ ꪭꪮꪉ ꪊꪙꪸ ꪥꪀꪸ ꪒꪙꪸ ꪚꪙꪸ ꪠꪴ.

          ꪖꪱꪣ: ꪜꪱꪉ ꪶꪭꪥ ꪚꪮꪀ ꪚꪱꪙ - ꪋꪳ ꪵꪄꪀ ꪁꪷ ꪣꪺꪙ! ꪚꪮꪀ ꪚꪱꪙ ꪨꪷ ꪔꪱꪉ ꪚꪮꪀ ꪣꪲ ꪘꪉꪰ ꪒꪙꪸ ꪚꪙꪸ ꪵꪀꪉ ꪝꪉꪳ ꪔꪉꪲ ꪼꪔ ꪚꪀꪰ. ꪎꪷ ꪩꪴꪉ ꪻꪬ ꪭꪴ ꪔꪷ ꪘꪱ ꪵꪀꪉ ꫄ꪬꪉ ꪭꪲ ꪣꪱ ꪔꪉꪲ ꪣꪲ ꫃ꪀ ꪵꪬꪫꪀ ꪼꪜ ꪋꪳ ꪔꪱꪉ ꪀꪷ ꪙꪲ ꪹꪏꪉ ꪏꪳ?

          ꪕꪮꪚ: ꪚꪮꪀ ꪚꪱꪙ ꪨꪷ ꪔꪱꪉ ꪚꪮꪀ ꪋꪽ ꫄ꪩꪉ ꪼꪄ ꪀꪺꪉ ꪣꪺ ꪎꪺꪙ. ꪕꪮꪥ ꪄꪮꪥ ꪯꪽ ꪙꪲ ꪨꪷ ꪔꪱꪉ ꪚꪮꪀ ꪋꪽ ꫄ꪐꪒ ꪶꪠꪉ ꪼꪔ ꪚꪀꪰ, ꪒꪙꪸ ꪚꪙꪸ ꪨꪷ ꪶꪠꪉ ꪣꪲ ꪨꪱꪥ ꪚꪮꪀ ꪚꪱꪙ. ꪼꪫ ꪚꪮꪀ ꪚꪱꪙ ꪅꪽ ꪋꪽ ꪼꪄ ꪹꪙꪉ ꪘꪉꪰ ꪒꪙꪸ ꪚꪙꪸ ꪵꪔꪨꪱꪥ ꪜꪲ ꪣꪱ, ꪒꪙꪸ ꪚꪙꪸ ꪶꪔ ꪊꪀꪳ ꪜꪴꪀ ꪀꪷ ꪚꪮꪀ ꪚꪱꪙ. ꪀꪚꪾ ꪤꪱꪫ 5 ꪝꪽ ꪀꪷ ꪩꪚꪸ ꪭꪣꪲ ꪕꪱꪉ ꪵꪔ ꪵꪗꪉ ꪶꪠ ꪒꪙꪸ ꪚꪙꪸ ꪠꪴ ꪼꪜ ꪭꪮꪒ ꪝꪴ ꪠꪱ ꪒꪲꪙ-ꪜꪱꪀ ꪕꪱꪉ ꪹꪄꪱ ꪣꪱ ꪀꪺꪉ ꪔꪉꪲ. ꪵꪩꪫ ꪏꪴꪣ ꪄꪮꪥ ꪁꪷ ꪜꪴꪀ ꪚꪮꪀ ꪚꪱꪙ ꪕꪺ ꪵꪗꪉ ꪶꪠ ,ꪹꪋꪉ ꪵꪮꪚ ꪵꪀꪉ ꪝꪉꪳ ꪭꪫꪙꪸ, ꪎꪱ. ꪒꪙꪸ ꪚꪙꪸ ꪕꪒꪰ ꪜꪴꪙ ꪹꪚꪱ ꪼꪒ ꪔꪒꪰ ꪜꪣꪾ ꪀꪷ ꪚꪮꪀ ꪚꪱꪙ ꪵꪀꪉ ꪹꪚꪱ ꪼꪒ ꪜꪴꪀ ꪉꪱ ꪕꪮꪣ ,ꪪꪱ ꪜꪴꪀ ꪉꪱ ꪕꪮꪣ ꪨꪱꪥ ꫛ ꪋꪲ ꪹꪣ ꪔꪒꪰ ꪉꪱ ꪚꪱꪙ ꪣꪱ ꪵꪋ ꪤꪱ ꪼꪫ ꪜꪴꪀ. ꪭꪱꪉ ꪜꪲ ꪔꪉꪲ ꪁꪷ ꫄ꪀꪚ ꫄ꪉꪙ ꪻꪬ ꪝꪉꪳ ꪭꪫꪙꪸ, ꪖꪲ, ꪵꪗꪉ ꪶꪠ ꪏꪳ ꪹꪋ ꪀꪷ ꪚꪱꪙ ꪣꪱ ꪜꪴꪀ. ꪙꪮꪀ ꪙꪽ ꪮꪮꪀ ꪒꪙꪸ ꪚꪙꪸ ꪁꪷ ꪮꪺꪙ ꪝꪱ ꪋꪴ ꫄ꪀꪚ ꫄ꪊꪚ ꪙꪣꪾ ꪼꪜ ꪋꪳ ꪀꪷ ꪚꪮꪀ ꪚꪱꪙ ꪘꪉꪰ ꪵꪗꪉ ꪶꪠ ꪒꪙꪸ ꪚꪙꪸ ꪠꪴ ꪵꪀꪉ ꪭꪫꪙꪸ ꪒꪙꪸ ꪚꪙꪸ, ꪼꪫ ꪕꪱꪀ ꪮꪮꪀ ꪶꪠꪉ ꪚꪮꪀ ꪚꪱꪙ ꪅꪽ ꪋꪽ ꪜꪴꪀ ꪋꪺꪙ ꪨꪱꪥ ꪵꪅꪀ ꪣꪱ ꪤꪱꪣ ꪒꪙꪸ ꪚꪙꪸ.

          ꪖꪱꪣ: ꪼꪒ ꪭꪴ, ꪀꪺꪉ ꪥꪱꪙ ꪶꪔ ꪊꪀꪳ ꪜꪱꪉ ꪶꪭꪥ ꪚꪮꪀ ꪚꪱꪙ ꪜꪲ 2017, ꪒꪙꪸ ꪚꪙꪸ ꪣꪲ ꫃ꪀ ꪵꪬꪫꪀ ꪹꪮꪱ ꪚꪮꪀ ꪚꪱꪙ ꪶꪩꪉ ꪼꪜ ꪜꪴꪀ ꪘꪉꪰ ꪖꪴ ꪶꪒ ꪬꪱ ꪶꪙꪥ. ꫄ꪁꪙ ꪫꪀꪸ ꪙꪲ ꪋꪲ ꪼꪒ ꫄ꪊꪚ ꪙꪣꪾ ꪹꪏꪉ ꪏꪳ?

          ꪕꪮꪚ: ꪒꪙꪸ ꪚꪙꪸ ꪁꪱꪒ ꪁꪙꪸ ꪀꪚꪾ ꪖꪴ ꪶꪒ ꪭꪱ ꪶꪙꪥ ꪼꪫ ꪜꪴꪀ 500 ꪀꪷ ꪚꪮꪀ ꪚꪱꪙ ꪩꪚꪸ ꪭꪣꪲ ꪕꪱꪉ ꪪꪷ ꪉꪫꪙꪸ ꪤꪱꪚ ꪵꪔ ꪹꪁꪱ ꫄ꪐꪒ ꫄ꪕꪙ ꪮꪮꪀ ꪼꪜ ꪠꪉꪸ ꪵꪎ ꪚꪙꪲ ꪶꪙꪥ ꪚꪱꪥ. ꪯꪽ ꪙꪲ ꪨꪷ ꪫꪀꪸ ꫃ꪥꪒ ꪼꪫ ꪹꪮꪱ ꪚꪮꪀ ꪚꪱꪙ ꪶꪩꪉ ꪼꪜ  ꪖꪴ ꪶꪒ ꪭꪱ ꪶꪙꪥ. ꪫꪀꪸ ꪜꪴꪀ ꪀꪷ ꪚꪮꪀ ꪚꪱꪙ ꪩꪚꪸ ꪭꪣꪲ ꪕꪱꪉ ꪪꪷ ꪉꪫꪙꪸ ꪤꪱꪚ ꪁꪷ ꪼꪫ ꪻꪬ ꪋꪴ ꪹꪋ ꫄ꪤꪙ ꪹꪣꪉ ꪵꪀꪉ ꪨꪱꪥ ꪛꪱꪙ ꪹꪡꪉ ꫃ꪕꪉ ꪵꪠꪙ ꪒꪙꪲ ꪚꪙꪸ ꪢꪱꪥ ꪶꪀꪉ ꪅꪴꪙ ꪻꪐ ꪨꪺꪉ ꪄꪮꪉ ꪒꪱꪥ ꪹꪔꪉ ꪪꪷ ꪉꪫꪙꪸ ꪤꪱꪚ ꪀꪚꪾ ꪩꪱꪉ ꪵꪝ ꫃ꪏꪉ ꪏꪱ ꪒꪙꪸ ꪚꪙꪸ ꪠꪴ; ꪎꪮꪉ ꪢꪱ ꪹꪫꪱ ꪄꪙꪳ ꪬꪺ ꪻꪊ ꪊꪳ ꫄ꪮꪙ ꪄꪮꪉ ꫄ꪤꪙ ꪹꪣꪉ ꪒꪙꪸ ꪚꪙꪸ ꪶꪒꪥ ꪀꪚꪾ ꪒꪱꪥ ꪹꪔꪉ.

          ꪖꪱꪣ: ꪼꪒ ꪭꪴ ꪝꪉꪳ ꪫꪀꪸ ꫃ꪤꪒ ꪊꪉꪲ ꪄꪮꪉ ꪜꪱꪉ ꪶꪭꪥ ꪋꪲ ꪼꪄ ꪮꪮꪀ ꪀꪱꪉ ꪹꪚꪙ 3, ꪵꪀꪉ ꪪꪱ ꪜꪱꪉ ꪶꪭꪥ ꪋꪲ ꪨꪱ ꪭꪲ ꪭꪮꪒ ꫃ꪢꪒ ꪹꪚꪙ 5. ꫄ꪁꪙ ꪫꪀꪸ ꫃ꪥꪒ ꪨꪉꪰ ꪀꪱꪉ ꪹꪚꪙ 3 ꪨꪷ ꪋꪲ ꪶꪔ ꪊꪀꪳ ꪝꪉꪳ ꪫꪀꪸ ꫃ꪥꪒ ꪎꪉꪰ, ꪋꪉꪸ ꪩꪉꪴ?

          ꪕꪮꪚ: ꪜꪱꪉ ꪶꪭꪥ ꪚꪮꪀ ꪚꪱꪙ ꪜꪲ ꪙꪲ ꪫꪲ ꪼꪄ ꪜꪱꪉ ꪀꪺꪉ ꫄ꪕꪉ ꪁꪙꪳ ꪣꪳ 12.3. ꪹꪊꪉ ꪊꪉꪲ ꪋꪲ ꪼꪒ  ꪋꪀꪳ ꪹꪋꪱ ꪠꪱꪒ ꪄꪙꪳ ꪡꪮꪉ ꪒꪙꪸ ꪒꪱꪥ ꪁꪫꪱꪣ ꪜꪱꪀ ꪫꪒꪲ ꪘꪱꪣ ꪵꪀꪉ ꪊꪫꪙꪸ ꪬꪉꪸ ꪫꪒꪸ ꪘꪱꪣ. ꪝꪉꪳ ꪫꪀꪸ ꫃ꪥꪒ ꪀꪺꪉ ꪜꪱꪉ ꪶꪭꪥ ꪚꪮꪀ ꪚꪱꪙ ꪵꪀꪉ ꪕꪺꪙ ꪪꪽ ꪬꪫꪱ ꪤꪴ ꪩꪲꪀ ꪄꪮꪉ ꪒꪙꪸ ꪚꪙꪸ ꪋꪲ ꪼꪒ ꪶꪔ ꪊꪀꪳ ꪵꪔ ꪣꪳ 11 ꪁꪣꪾ ꪭꪮꪒ ꪣꪳ 15.3 ꪀꪚꪾ ꪨꪱꪥ ꪫꪀꪸ ꫃ꪥꪒ. ꪨꪉꪰ ꪣꪳ 15.3 ꪋꪲ ꪣꪲ ꪝꪉꪳ ꪫꪀꪸ ꫃ꪥꪒ ꪪꪽ ꪬꪫꪱ ꪘꪉꪰ ꪝꪉꪳ ꪭꪫꪙꪸ, ꪵꪗꪉ ꪶꪠ ꪭꪮꪒ ꪝꪉꪳ ꪚꪱꪙ. ꪭꪮꪒ ꪥꪱꪙ ꪅꪽ ꪅꪱꪉ ꪶꪚꪙ ꪹꪎꪉ ꪩꪱꪉ ꪵꪝ ꪒꪙꪸ ꪚꪙꪸ ꪠꪴ ꪼꪫ ꪚꪮꪀ ꪎꪮꪙ ꪹꪉꪙ ꪩꪱꪉ ꪹꪭꪉ ꪭꪀꪰ ꪚꪱꪙ ꪵꪝꪉ ꪹꪣꪉ ꪻꪬ ꪜꪴꪙ ꪜꪱꪙ ꪨꪱꪙ ꪘꪮꪣ; ꪎꪮꪉ ꪣꪱ ꪁꪷ ꪵꪣꪙ ꪥꪱꪙ ꪼꪫ ꪜꪴꪀ ꪋꪺꪙ ꪵꪄꪀ ꪤꪴ ꪩꪲꪀ ꪢꪱ ꪁꪱ ꪒꪙꪸ ꪚꪙꪸ.

          ꪎꪷ ꪥꪮꪙ ꫄ꪮꪙ ꪩꪴꪉ!