Điện Biên: Cận “choi hanh” hẳư nghê dệt húk khít nho lai khòng chựa côn Lao nẳng Na Sàng 2

-----------------

Nghê tắm hút khít nho lai lỏ nghê ngươn lang cặt kiên té chạu té lài ma cắp pi nọng chựa côn Lao nẳng Điện Biền. Hák va, bản mương mả khày, nghê tắm hút khít nho lai nị cọ mi xương chi chuốp mụt luội xìa, côn dần cọ báu ék cạt kiên cắp nghê nị lẹo, pưa chương hang dệt ók báu khài đảy.

Nhẳn danh luông cận hà cuồng vịa chự hiềm ngươn lang vằn hoá khặn chăn khòng pi nọng chựa nọi côn, pì 2004 Cờ quàn cạt kiên Quốc tế Nhật Bản cạt kiên cắp Uỷ bàn dần mương tỉnh Điện Biền tẳng tánh dự án choi dừa mả khày nghê tắm húk khít nho lai nẳng bản Na Sàng 2. Té nặn, HTX tắm húk khít nho lai Na Sàng 2 đảy tánh ók, cắp 30 thành viền. té nặn ma họt khay, vịa tắm húk khít nho lai khòng pi nọng chựa côn Lao nẳng nị cọ mi lài khù piến thái, chương hang dệt ók mi lài bón ma xáo xự.

Nghê tắm húk khít nho lai khòng chựa côn Lao cọ tẳng cốc xáo hà đảy bón khài chương hang dệt ók khòng riềng chảu. Hák va khay nị luông dệt nhăng lệch nọi, pưa phân lài côn dần chơ bang vịa chắng tắm húk. PỌm cắp nả vịa nặn lỏ hê tạ đảy luông cạt kiên mẳn cặt té vịa dệt ók chương hang họt bón khài chương hang, xương nặn nghê nị cọ nhăng hê đảy tẹt tiêng. Húk khít nho lai khòng pi nọng chựa côn Lao cọ mi khù lák xưa vẹt sắư pưng chựa côn ứn nẳng bón, pưng hún ngau đảy tắm cuồng phải lâng mi hún hươn chua, hún tồ chạng, báu cọ hún tồ xừ. KHảm cài lài pì bườn chuông hong cuồng puồng kìn khòng pi nọng chựa côn Lao, họt khay tàng chương hang húk khít nho lai khòng pi nọng cọ đảy lài côn hụ họt. Hák va vạy hẳư tàng chương hang nị pày họt mư lài côn xủ dống xưa mắư hư nhăng cận hà luông choi hanh lài xưa mắư té chu cấp chu ngành cuồng nả vịa xáo hà bón khài chương hang dệt ók tẹt tiêng./.

ꪹꪁꪷꪙ ꪋꪮꪥ ꪵꪭꪉ ꪻꪬ ꪹꪉꪸ ꪔꪣꪾ ꪬꪀꪴ ꪄꪲꪒ ꪑꪷ ꪩꪱꪥ

ꪹꪉꪸ ꪔꪣꪾ ꪬꪀꪴ ꪄꪲꪒ ꪑꪷ ꪩꪱꪥ ꪨꪷ ꪹꪉꪸ ꪹꪉꪙ ꪩꪱꪭ ꪁꪱꪒ ꪁꪙꪸ ꪵꪔ ꪹꪋꪱ ꪵꪔ ꪨꪱꪥ ꪣꪱ ꪀꪚꪰ ꪝꪲ ꪙꪮꪉ ꪹꪋ ꫛ ꪩꪱꪫ ꪘꪉꪰ ꪒꪙꪸ ꪚꪙꪸ. ꪬꪱꪀ ꪫꪱ, ꪚꪱꪙ ꪹꪣꪉ ꪢꪱ ꪼꪄ, ꪹꪉꪸ ꪔꪣꪾ ꪬꪴꪀ ꪄꪲꪒ ꪑꪷ ꪩꪱꪥ ꪘꪲ ꪁꪷ ꪣꪲ ꪹꪏꪉ ꪊꪺꪚ ꪣꪒꪴ ꪩꪺꪥ ꪎꪸ, ꫛ ꪹꪤꪷꪙ ꪁꪷ ꪹꪚꪱ ꪵꪮꪀ ꪁꪱꪒ ꪁꪙꪸ ꪀꪚꪰ ꪹꪉꪸ ꪙꪲ ꪵꪩꪋ , ꪹꪝ ꪹꪋꪉ ꪭꪱꪉ ꪹꪥꪸꪒ ꪮꪀꪀ ꪹꪚꪱ ꪄꪱꪥ ꪼꪒ.

ꪐꪽ ꪵꪥꪉ ꪩꪺꪉ ꪹꪁꪷꪙ ꪬꪱ ꪀꪺꪉ ꪫꪀꪸ ꪬꪣꪸ ꪹꪭꪙ ꪩꪱꪉ ꪪꪽ ꪬꪫꪱ ꪅꪽ ꪋꪽ ꪄꪮꪉ ꪝꪲ ꪙꪮꪉ ꪹꪋ ꪙꪮꪥ ꫛ, ꪜꪲ 2004 ꪹꪀꪷ ꪀꪫꪱꪙ ꪁꪱꪒ ꪁꪸꪙ ꪀꪺꪀ ꪹꪔꪸ ꪑꪰꪒ ꪚꪱꪙ ꪁꪱꪒ ꪁꪸꪙ ꪀꪚꪰ ꪮꪫꪲ ꪚꪱꪙ ꪹꪤꪷꪙ ꪹꪣꪉ ꪔꪉꪲ ꪒꪙꪸ ꪚꪙꪸ ꪵꪔꪉ ꪮꪀꪀ ꪤꪳ ꪮꪱꪙ ꪋꪮꪥ ꪹꪤ ꪢꪱ ꪼꪄ ꪹꪉꪸ ꪔꪣꪝ ꪬꪴꪀ ꪄꪲꪒ ꪑꪷ ꪩꪱꪥ ꪙꪉꪰ ꪚꪱꪙ ꪙꪱ ꪎꪱꪉ 2. ꪵꪔ ꪙꪽ ꪹꪭꪷꪚ ꪔꪱꪀ ꪎꪱ ꪔꪣꪾ ꪬꪀꪴ ꪄꪲꪒ ꪑꪷ ꪩꪱꪥ ꪚꪱꪙ ꪘꪱ ꪎꪱꪉ 2 ꪼꪒ ꪵꪔꪉ ꪮꪀꪀ , ꪀꪚꪰ 30 ꪵꪖꪉ ꪪꪙꪸ. ꪵꪔ ꪙꪽ ꪣꪱ ꪭꪮꪒ ꪼꪅ ꪫꪀꪸ ꪔꪣꪾ ꪬꪀꪴ ꪄꪲꪒ ꪑꪷ ꪩꪱꪥ ꪄꪮꪉ ꪝꪲ ꪙꪮꪉ ꪹꪋ ꫛ ꪩꪱꪫ ꪘꪉꪰ ꪘꪲ ꪁꪷ ꪣꪲ ꪨꪱꪥ ꪄꪴ ꪜꪙꪸ ꪖꪱꪥ ꪹꪋꪉ ꪭꪱꪉ ꪹꪥꪸꪒ ꪮꪀꪀ ꪣꪲ ꪨꪱꪥ ꪚꪮꪙ ꪣꪱ ꪎꪱꪫ ꪏꪳ.

ꪹꪉꪸ ꪔꪣꪾ ꪬꪀꪴ ꪄꪲꪒ ꪑꪷ ꪩꪱꪥ ꪄꪮꪉ ꪝꪲ ꪙꪮꪉ ꪹꪋ ꫛ ꪩꪱꪫ ꪁꪷ ꪔꪉꪰ ꪶꪀꪀ ꪎꪱꪫ ꪬꪱ ꪼꪒ ꪚꪱꪙ ꪄꪱꪥ ꪹꪋꪉ ꪭꪱꪉ ꪹꪥꪸꪒ ꪮꪀꪀ. ꪬꪱꪀ ꪫꪱ ꪼꪅ ꪙꪲ ꪩꪺꪉ ꪹꪥꪸꪒ ꪑꪰꪉ ꪹꪩꪸꪀ ꪙꪮꪥ , ꪹꪡꪷꪙ ꪨꪱꪥ ꫛ ꪹꪤꪷꪙ ꪹꪋꪷ ꪚꪱꪉ ꪫꪀꪸ ꪊꪉꪰ ꪔꪣꪾ ꪬꪴꪀ. ꪝꪮꪣ ꪀꪚꪰ ꪘꪱ ꪫꪀꪸ ꪙꪽ ꪨꪷ ꪹꪭ ꪕꪱ ꪼꪒ ꪩꪺꪉ ꪁꪱꪒ ꪁꪸꪙ ꪢꪽ ꪁꪒꪰ ꪵꪔ ꪪꪀꪸ ꪹꪥꪸꪒ ꪮꪀꪀ ꪹꪋꪉ ꪭꪱꪉ ꪬꪮꪒ ꪫꪀꪸ ꪄꪱꪥ ꪹꪋꪉ ꪭꪱꪉ. ꪄꪱꪣ ꪀꪱꪥ ꪨꪱꪥ ꪜꪲ ꪹꪚꪙ ꪋꪺꪉ ꪭꪮꪉ ꪀꪺꪉ ꪜꪺꪉ ꪀꪙꪲ ꪹꪓꪷꪥ ꪤꪴ ꪄꪮꪉ ꪝꪲ ꪙꪮꪉ ꪹꪋ ꫛ ꪩꪱꪫ , ꪭꪮꪒ ꪼꪅ ꪔꪱꪉ ꪹꪋꪉ ꪭꪱꪉ ꪬꪴꪀ ꪄꪲꪒ ꪑꪷ ꪩꪱꪥ ꪄꪮꪉ ꪝꪲ ꪙꪮꪉ ꪁꪷ ꪼꪒ ꪨꪱꪥ ꫛ ꪭꪴ ꪬꪮꪒ. ꪬꪱꪀ ꪫꪱ ꪼꪫ ꪔꪱꪉ ꪹꪋꪉ ꪭꪱꪉ ꪙꪲ ꪼꪜ ꪬꪮꪒ ꪣꪳ ꪨꪱꪥ ꫛ ꪎꪴ ꪶꪤꪉ ꪹꪏ ꪻꪢ ꪭꪳ ꪹꪁꪷꪙ ꪬꪱ ꪩꪺꪉ ꪋꪮꪥ ꪵꪭꪉ ꪵꪔ ꪋꪴ ꪹꪀꪷꪚ ꪋꪴ ꪵꪈꪉ ꪀꪺꪉ ꪘꪱ ꪫꪀꪸ ꪎꪱꪫ ꪬꪱ ꪚꪮꪙ ꪄꪱꪥ ꪹꪋꪉ ꪬꪱꪉ ꪵꪕꪒ ꪕꪉꪸ.