Hiềm chự vằn hoá chựa nọi côn té pưng lớp ép xừ Tay

          Cứ 7 chơ tênh cưn mự thứ 7 cánh mự dặng hạng tuận, cài 50 nọng pùn tuổi té 6 họt 14 pì nẳng bản Bó, phường Chiêng Àn, thành phố Sơn La tọp hôm ma nẳng lớp ép xừ Tay đảy say Quàng Văn Hặc, cán bộ vằn hoá ma dặng hưu bók hẳư pưng nọng. Vạy nhẳn pao hẳư lớp ép men lịch, chự mẳn đảy số học sình ma ép, cấp uỷ, chi bộ bản tạ khù ngai đì hẳư say cánh tro dọn hội trương hươn vằn hoá bản vạy ép. Nọk pưng nọng lỏ lụk nọng khòng phủ Tay, lớp ép nhăng mi pưng nọng lỏ chựa côn Kèo dú cuồng bản cọ pọm ma ép. Toi ép lớp ép nị, say cánh tro pọm mòng cong hiềm chự đảy quam pák, xừ tẻm khòng chựa côn chảu.

          Pọm cắp lớp bók xừ tay khòng lung Quàng Văn Hặc, mi lớp ép nưng mắư đảy lung Lường Văn Pản, côn hụ chang ma tang xừ tay cọ chiên bók hẳư 20 học viền pùn tuổi té 18 họt 65 pì. Pưng pả lung chăm va ké côn lẹo, hák va cọ pốt vịa vang càn ma lớp ép tục po cắp mòng cong hiềm chự đảy quam pák, xừ tẻm cánh nen vằn hoá khòng chựa côn chảu.

Nen vằn hoá khòng phủ Tay cọ mi lài tàng lài dong. Khù dạk cha khòng say cánh tro nẳng nị lỏ pưng nọng hụ pák quam kèo lài xưa quam khòng chựa côn chảu, say bók khòng lớp cọ báu mi chuyên ngành ma tang sư phạm. Hák va cắp hùa chằư nắt xương khòng chảu, pưng say cọ pâng xắư tài liệu giáo trình bók xừ tay khòng Trung tâm giáo dục Thường  xuyên tỉnh Sơn La vạy bók xòn hẳư học viền, dệt xương xư hẳư học viền hụ ngai, chứ cặt. Pưng say cọ dòm lài dan chơ kẻ khày cánh dịch ók quam phổ thông vạy pưng nọng hụ chảnh xưa. Cứ xương nặn, lằng dáo 3 bườn ép, pưng học viền khòng lớp cọ hụ đôn hụ tẻm, san học viền cọ hák nghiên cứu cánh đôn pưng quam khắp xừ khòng phủ Tay xương: “ Xống chu xòn xào” “ tản chụ siết xường”, Khùn lu nang Ủa”.

          Pưng lớp ép hák muôn chằư chiên cái bok xòn nẳng bản Bó cọ đáng muôn chôm pưa va pưng say bók cọ mặc muôn nắt xường, báu mi tàng ngơn choi dừa đằư, học sình ma ép phằư cọ xắc chằư vạy xáo hà xừ tẻm khòng chựa côn chảu khòng chua pảu đơi pú chiên cái hai vạy. Khù púc chuân pi nọng chính lỏ mòng cong cóp pặc hôm hanh hiềm chự xừ tẻm, quam pák khòng chựa côn chảu./.

               Lường Hạnh- Lường Huyền dịch

ꪬꪣꪸ ꪋꪳ ꪪꪽ ꪬꪫꪱ ꪹꪋ ꪙꪮꪥ ꫛ ꪵꪔ ꪝꪉꪳ ꫄ꪨꪚ ꪵꪮꪚ ꪎꪳ ꪼꪕ

          ꪁꪳ 7 ꫄ꪋ ꫃ꪕꪉ ꪁꪙꪳ ꪣꪳ ꪖꪳ 7 ꪵꪀꪉ ꪣꪳ ꪤꪉꪰ ꪭꪱꪉ ꪕꪺꪙ, ꪀꪱꪥ 50 ꪙꪮꪉ ꪜꪴꪙ ꪔꪺꪙ ꪵꪔ 6 ꪭꪮꪒ 14 ꪜꪲ ꪘꪉꪰ ꪚꪱꪙ ꪚꪷ, ꪹꪠꪉ ꪋꪉꪸ ꪮꪱꪙ ,ꪵꪗꪉ ꪶꪠ ꫄ꪎꪙ ꪨꪱ ꪕꪮꪚ ꪶꪭꪣ ꪣꪱ ꪘꪉꪰ ꫄ꪨꪚ ꪵꪮꪚ ꪎꪳ ꪼꪕ ꪼꪒ ꪼꪏ ꪁꪫꪱꪉ ꪪꪽ ꪭꪀꪰ ꪀꪱꪙ ꪶꪛ ꪪꪽ ꪬꪫꪱ ꪢꪱ ꪥꪉꪰ ꪭꪫꪲ ꪚꪮꪀ ꪻꪬ ꪝꪉꪳ ꪙꪮꪉ. ꪼꪫ ꪐꪽ ꪝꪱꪫ ꪻꪬ ꫄ꪨꪚ ꪵꪮꪚ ꪵꪣꪙ ꪩꪀꪲ, ꪋꪳ ꪢꪽ ꪼꪒ ꪶꪎ ꪭꪮꪀ ꪎꪉꪲ ꪣꪱ ꪵꪮꪚ ,꫄ꪀꪚ ꪮꪫꪲ, ꪋꪲ ꪶꪛ ꪚꪱꪙ ꪕꪱ ꪄꪴ ꪉꪱꪥ ꪒꪲ ꪻꪬ ꪼꪏ ꪵꪀꪉ ꪋꪷ ꪥꪮꪙ ꪶꪭꪥ ꪹꪋꪉ ꪹꪭꪙ ꪪꪽ ꪬꪫꪱ ꪼꪫ ꪵꪮꪚ. ꪙꪮꪀ ꪝꪉꪳ ꪙꪮꪉ ꪨꪷ ꪩꪴꪀ ꪙꪮꪉ ꪠꪴ ꪼꪕ ,꫄ꪨꪚ ꪵꪮꪚ ꪑꪉꪰ ꪣꪲ ꪝꪉꪳ ꪙꪮꪉ ꪨꪷ ꪹꪋ ꫛ ꪵꪀꪫ ꪤꪴ ꪀꪺꪉ ꪚꪱꪙ ꪝꪮꪣ ꪣꪱ ꪵꪮꪚ. ꪕꪮꪥ ꪵꪮꪚ ꫄ꪨꪚ ꪵꪮꪚ ꪙꪲ, ꪼꪏ ꪵꪀꪉ ꪋꪷ ꪝꪮꪣ ꪢꪮꪉ ꪁꪮꪉ ꪬꪣꪸ ꪋꪳ ꪼꪒ ꪁꪫꪱꪣ ꪜꪱꪀ ,ꪎꪳ ꪵꪔꪣ ꪄꪮꪉ ꪹꪋ ꫛ ꪹꪊꪱ.

          ꪝꪮꪣ ꪀꪚꪾ ꫄ꪨꪚ ꪚꪮꪀ ꪎꪳ ꪼꪕ ꪄꪮꪉ ꪩꪉꪴ ꪁꪫꪱꪉ ꪪꪽ ꪭꪀꪰ, ꪣꪲ ꫄ꪨꪚ ꪵꪮꪚ ꫜ ꪻꪢ ꪼꪒ ꪩꪴꪉ ꪁꪫꪱꪉ ꪪꪽ ꪜꪱꪙ ꫛ ꪭꪴ ꪋꪱꪉ ꪣꪱ ꪕꪱꪉ ꪎꪳ ꪼꪕ ꪁꪷ ꪋꪙꪸ ꪚꪮꪀ ꪻꪬ 20 ꪭꪮꪀ ꪪꪙꪸ ꪜꪴꪙ ꪔꪺꪥ ꪵꪔ 18 ꪭꪮꪒ 65 ꪜꪲ. ꪝꪉꪳ ꪜꪱ ꪩꪴꪉ ꪋꪣꪾ ꪫꪱ ꪵꪀ ꫛ ꪵꪩꪫ , ꪬꪱꪀ ꪫꪱ ꪁꪷ ꪶꪜꪒ ꪫꪀꪸ ꪫꪱꪉ ꪀꪱꪙ ꪣꪱ ꫄ꪨꪚ ꪵꪮꪚ ꪕꪴꪀ ꪝꪷ ꪀꪚꪾ ꪢꪮꪉ ꪁꪮꪉ ꪬꪣꪸ ꪋꪴ ꪼꪒ ꪎꪳ ꪵꪔꪣ ꪁꪫꪱꪣ ꪜꪱꪀ ꪵꪀꪉ ꪵꪙꪙ ꪪꪽ ꪬꪫꪱ ꪄꪮꪉ ꪹꪋ ꫛ ꪹꪊꪱ.

          ꪵꪙꪙ ꪪꪽ ꪬꪫꪱ ꪄꪮꪉ ꪠꪴ ꪼꪕ ꪁꪷ ꪣꪲ ꪨꪱꪥ ꪔꪱꪉ ꪨꪱꪥ ꪥꪮꪉ. ꪄꪴ ꪤꪱꪀ ꪋꪱ ꪄꪮꪉ ꪼꪏ ꪵꪀꪉ ꪋꪷ ꪘꪉꪰ ꪘꪲ ꪨꪷ ꪝꪉꪳ ꪙꪮꪉ ꪭꪴ ꪜꪱꪀ ꪁꪫꪱꪣ ꪵꪀꪫ ꪨꪱꪥ ꪹꪏ ꪁꪫꪱꪣ ꪄꪮꪉ ꪹꪋ ꫛ ꪹꪊꪱ, ꪼꪏ ꪚꪮꪀ ꪄꪮꪉ ꫄ꪨꪚ ꪁꪷ ꪹꪚꪱ ꪣꪲ ꪋꪫꪙꪸ ꪵꪈꪉ ꪣꪱ ꪕꪱꪉ ꪏꪳ ꪡꪱꪣ. ꪬꪱꪀ ꪫꪱ ꪀꪚꪾ ꪬꪺ ꪻꪊ ꪘꪒꪰ ꪹꪎꪉ ꪄꪮꪉ ꪹꪊꪱ ꪝꪉꪳ ꪼꪏ ꪁꪷ ꫄ꪝꪉ ꪼꪎ ꪤꪱꪫ ꪊꪉꪲ ꪚꪮꪀ ꪎꪳ ꪼꪕ ꪄꪮꪉ ꪊꪴꪉ ꫄ꪔꪣ ꪤꪱꪫ ꪥꪴꪀ ꪹꪖꪉ ꪎꪫꪙꪸ ꪔꪉꪲ ꫄ꪎꪙ ꪨꪱ ꪼꪫ ꪚꪮꪀ ꪻꪬ ꪭꪮꪀ ꪪꪙꪸ, ꫃ꪥꪒ ꪹꪏꪉ ꪏꪳ ꪻꪬ ꪭꪮꪀ ꪪꪙꪸ ꪭꪴ ꪉꪱꪥ ꪊꪳ ꪁꪒꪰ. ꪝꪉꪳ ꪼꪏ ꪁꪷ ꪤꪮꪣ ꪨꪱꪥ ꪥꪱꪙ ꫄ꪋ ꪵꪀ ꪼꪄ ꪵꪀꪉ ꪥꪲꪀ ꪮꪮꪀ ꪁꪫꪱꪣ ꪶꪠ ꪶꪖꪉ ꪼꪫ ꪝꪉꪳ ꪙꪮꪉ ꪭꪴ ꪵꪊꪉ ꪹꪏ. ꪁꪳ ꪹꪏꪉ ꪙꪽ, ꪨꪉꪰ ꪤꪱꪫ 3 ꪹꪚꪙ ꪵꪮꪚ ꪝꪉꪳ ꪭꪮꪀ ꪪꪙꪸ ꪄꪮꪉ ꫄ꪨꪚ ꪁꪷ ꪭꪴ ꪶꪒꪙ ꪭꪴ ꪵꪔꪣ , ꪏꪱꪙ ꪭꪮꪀ ꪪꪙꪸ ꪁꪷ ꪬꪱꪀ ꪈꪙꪸ ꪀꪫꪲ ꪵꪀꪉ ꪶꪒꪙ ꪝꪉꪳ ꪁꪫꪱꪣ ꪄꪚꪾ ꪎꪳ ꪄꪮꪉ ꪠꪴ ꪼꪕ ꪹꪏꪉ: ꪶꪎꪉ ꪋꪴ ꪎꪮꪙ ꪎꪱꪫ ,ꪔꪱꪙ ꪋꪴ ꪎꪒꪸ ꪹꪎꪉ ,ꪄꪴꪙ ꪩꪴ ꪙꪱꪉ ꪮꪺ.

          ꪝꪉꪳ ꫄ꪨꪚ ꪵꪮꪚ ꪬꪱꪀ ꪣꪺꪙ ꪻꪊ ꪋꪙꪸ ꪀꪱꪥ ꪚꪮꪀ ꪎꪮꪙ ꪘꪉꪰ ꪚꪱꪙ ꪚꪷ ꪁꪷ ꪒꪱꪉ ꪣꪺꪙ ꪶꪋꪣ ꪹꪝ ꪫꪱ ꪝꪉꪳ ꪼꪏ ꪚꪮꪀ ꪁꪷ ꪣꪀꪰ ꪣꪺꪙ ꪘꪒꪰ ꪹꪎꪉ ,ꪹꪚꪱ ꪣꪲ ꪔꪱꪉ ꫄ꪉꪙ ꪋꪮꪥ ꪹꪤ ꪻꪒ ,ꪭꪮꪀ ꪎꪉꪲ ꪣꪱ ꪵꪮꪚ ꪻꪠ ꪁꪷ ꪎꪀꪰ ꪻꪊ ꪼꪫ ꪎꪱꪫ ꪬꪱ ꪎꪳ ꪵꪔꪣ ꪄꪮꪉ ꪹꪋ ꫛ ꪹꪊꪱ, ꪄꪮꪉ ꪋꪺ ꪹꪜꪱ ꫄ꪓꪥ ꪜꪴ ꪋꪙꪸ ꪀꪱꪥ ꪭꪱꪥ ꪼꪫ. ꪄꪴ ꪜꪴꪀ ꪋꪺꪙ ꪝꪲ ꪙꪮꪉ ꪊꪉꪲ ꪨꪷ ꪢꪮꪉ ꪁꪮꪉ ꪀꪮꪚ ꪝꪀꪰ ꪶꪭꪣ ꪵꪭꪉ ꪬꪣꪸ ꪋꪳ ꪎꪳ ꪵꪔꪣ ,ꪁꪫꪱꪣ ꪜꪱꪀ ꪄꪮꪉ ꪹꪋ ꫛ ꪹꪊꪱ.

ꪹꪩꪉ ꪬꪫꪙꪸ ꪥꪀꪲ