ꪜꪱꪉ ꪶꪭꪥ ꪀꪱꪥ ꪩꪙꪲ ꪙꪣꪾ ꪄꪮꪉ ꫛ ꫄ꪏ ꪒꪉꪷ ꪔꪉꪲ ꪁꪮꪙ ꪕꪣꪴ

        ꪜꪱꪉ ꪶꪭꪥ ꪀꪱꪥ ꪩꪙꪲ ꪙꪣꪾ ꪄꪮꪉ ꫛ ꫄ꪏ ꪒꪉꪷ ꪶꪠꪉ ꪕꪴ ꫄ꪣ ꪶꪥꪉ ꫄ꪩꪉ ꪼꪄ ꪮꪮꪀ ꪀꪺꪉ 3 ꪣꪳꪌ ꪣꪳ ꪶꪀꪀ ꪵꪅꪫꪀ ꫛ ꪵꪀ ꪀꪺꪉ ꪚꪱꪙ ꪝꪮꪣ ꪼꪜ ꪬꪱ ꪚꪷ ꪙꪣꪷ. ꫄ꪋ ꪬꪱ ꫃ꪬꪙ ꪚꪷ ꪙꪣꪾ, ꫛ ꪵꪀ ꪀꪺꪉ ꪚꪱꪙ ꪤꪱꪫ ꪻꪬ ꪠꪴ ꪋꪱꪥ ꪄꪙꪳ ꪜꪱ ꪹꪣ ꪔꪒꪷ ꪼꪣ ꪼꪫ ꫃ꪥꪒ ꪩꪙꪲ ꪙꪣꪾꪼꪫ ꫛ ꪵꪀ ꫃ꪤꪒ ꪭꪒꪲ ꪂꪎꪷ ꪹꪊꪱ ꪚꪷ ꪙꪣꪾ ꪻꪬ ꪵꪠꪚ ꪹꪮꪱ ꪙꪣꪷ ꪀꪱꪥ ꪩꪙꪲ ꪣꪱ ꪚꪱꪙ.

          ꪣꪳ ꪖꪳ 2ꪶ ꪠꪴ ꪑꪉꪲ ꪼꪒ ꫛ ꪵꪀ ꪀꪺꪉ ꪚꪱꪙ ꪤꪱꪫ ꪫꪀꪸ ꪕꪮꪙ ꪠꪱꪒ ꪖꪱꪉ ꪵꪔ ꪚꪱꪙ ꪹꪣ ꪬꪮꪒ ꪚꪷ ꪙꪣꪾ, ꪵꪩꪫ ꪠꪴ ꪋꪱꪥ ꪨꪷ ꪹꪣ ꪔꪒꪷ ꪼꪣ ꫃ꪤꪒ ꪩꪙꪸ ꪙꪣꪾ ꪹꪮꪱ ꪙꪣꪷ ꪼꪜ ꪀꪱ ꪚꪱꪙ. ꪘꪉꪷ ꪚꪷ ꪙꪣꪾ, ꪝꪲ ꪙꪮꪉ ꪄꪒꪴ ꫃ꪜꪘ ꪚꪮꪘ ꪩꪉꪳ ꪙꪣꪾ, ꪎꪱꪘ ꪊꪱꪁ ꪚꪱꪫ ꪄꪙꪳ ꪹꪣ ꪀꪱ ꪜꪱ ꪹꪩꪀ ꪹꪮꪱ ꪩꪣꪾ ꪼꪣ ꪥꪱꪫ ꪏꪳ , ꪹꪚꪱ ꪏꪚꪳ ꪹꪚꪱ ꫃ꪜꪙ ꪶꪚꪉ ꫃ꪜꪙ ꪵꪣꪉ ꪼꪫ ꪹꪮꪱ ꪣꪱ ꫃ꪤꪒ ꪩꪙꪲ, ꪩꪙꪲ ꪙꪣꪾ ꪼꪒ ꪄꪙꪸ ꪵꪫ ꫃ꪤꪒ ꪀꪚꪾ ꪨꪱꪥ ꪬꪙꪴ ꪹꪉꪱ ꪅꪽ ꪊꪽ ꪵꪀꪉ ꪔꪉꪷ ꪼꪫ ꪘꪉꪷ ꪔꪱꪈ ꪬꪺ ꪙꪣꪾ. ꪯꪽ ꪨꪷ ꫃ꪎꪣ ꪎꪱꪥ ꪀꪱꪥ ꪥꪙꪸ ꪵꪔ ꪹꪊꪱ ꪚꪷ ꪙꪣꪷ ꪀꪱꪫ ꫄ꪣꪥ ꪢꪱ ꫄ꪚꪉ ꪒꪴ ꪊꪉꪳ ꪢꪱꪥ ꪻꪬ ꪩꪺꪉ ꫃ꪏꪒ ꪏꪳ ꪄꪮꪉ ꫛ ꫄ꪤꪙ

          ꪣꪳ ꪖꪳ 3 ꪨꪷ ꪣꪳ ꪊꪉꪲ ꪄꪮꪉ ꪜꪱꪉ ꫃ꪥꪒ ꪭꪒꪲ ꪀꪱꪥ ꪩꪙꪲ ꪙꪣꪾ. ꪋꪴ ꫛ ꪀꪺꪉ ꪚꪱꪘ ꪕꪮꪚ ꪬꪮꪣ ꪣꪱ ꪘꪉꪷ ꪹꪭꪙ ꪶꪭꪥ ꪭꪮꪚ ꪄꪮꪉ ꪚꪱꪙ. ꫛ ꪹꪖꪱ ꪵꪀ ꪎꪉꪷ ꪎꪮꪙ, ꪜꪽ ꪫꪀꪸ ꪻꪬ ꪋꪴ ꫛ. ꪨꪉꪷ ꪙꪽ ꪣꪲ ꪕꪷ ꫛ ꪵꪀ ꪼꪒ ꪹꪣ ꪕꪮꪥ ꪀꪱ ꪚꪷ ꪙꪣꪾ, ꪜꪺ ꪹꪣ ꪕꪮꪥ ꪶꪔ ꪶꪮꪙ ꫜ ꪼꪫ ꫃ꪥꪒ ꪭꪒꪲ. ꪹꪣ ꪭꪮꪒ ꪚꪮꪙ ꫛ ꪵꪀ ꪀꪺꪉ ꪚꪱꪙ ꪹꪮꪱ ꪜꪺꪉ ꪼꪣ ꪠꪱ ꪼꪣ ꪜꪱꪫ ꪼꪫ ꪶꪜꪀ ꪚꪷ ꪙꪣꪾ ꪮꪮꪀ, ꪶꪜꪀ ꪼꪫ ꪹꪚꪱ ꪻꪬ ꪐꪉꪲ ꪹꪐ ꪶꪔꪀ ꪻꪎ ꫃ꪤꪒ ꪮꪺꪥ ꪢꪙꪲ ꪚꪷ ꪙꪣꪾ. ꪝꪲ ꪙꪮꪉ ꪔꪒꪷ ꪁꪷ ꪶꪔ ꪶꪮꪙ, ꪹꪮꪱ ꪚꪉꪷ ꪼꪣ ꪜꪱꪫ ꪔꪷ, ꫛ ꫄ꪏ ꪒꪉꪾ ꫄ꪩꪉ ꪈꪣꪾ , ꪬꪒꪲ ꫃ꪎꪙ ꪀꪱꪥ ꪩꪙꪲ ꪙꪣꪾ ꪼꪒ ꪹꪮꪱ ꪹꪩꪒ ꪶꪔ ꪶꪮꪙ ꪢꪱ ꫃ꪎꪙ ꪊꪉꪷ ꪋꪲ ꪻꪎ ꪎꪉꪸ ꪵꪀꪉ ꪚꪙꪴ ꪼꪢ , ꪻꪬ ꪹꪄꪱ ꪠꪱꪥ ꫃ꪜꪙ ꪨꪱꪥ ꫃ꪔꪣ ꪹꪩꪱ ꫃ꪔꪣ ꪥꪸ, ꪉꪺ ꪁꪫꪱꪥ ꪢꪱ ꪵꪝ ꫃ꪔꪣ ꪩꪱꪉ , ꪋꪴ ꫛ ꪬꪱꪫ ꪵꪭꪉ , ꪚꪷ ꪙꪣꪾ ꪼꪨ ꫄ꪩꪉ ꪹꪚ ꪱꪠꪱꪒ ꪎꪸ ꪼꪩ , ꪶꪔ ꪶꪙꪀ ꪶꪔ ꪘꪴ, ꪶꪔ ꪜꪱ ꪹꪚꪱ ꪣꪱ ꪀꪒꪷ ꪭꪮꪙ ꪀꪷ ꪹꪄꪱ.

          ꫄ꪋ ꪕꪱꪣ ꪵꪩꪫ ꪮꪱꪥ ꪹꪖꪱ ꫛ ꪵꪀ ꪖꪮꪀ ꪹꪩꪒ ꪶꪮꪙ ꪻꪎ ꪚꪷ ꪙꪣꪾ, ꪹꪩꪒ ꪶꪮꪙ ꪁꪫꪱ ꪻꪎ ꪙꪣꪾ ꪼꪨ ꪼꪜ ꪕꪮꪥ ꪩꪙꪲ ꪀꪱꪥ ꪼꪜ ꪀꪱ ꪚꪱꪙ. ꪔꪱꪉ ꪨꪱ ꪩꪙꪲ ꪙꪣꪾ, ꪣꪲ ꪠꪴ ꪑꪉꪲ ꫜ ꪔꪮꪙ ꫄ꪩꪭ ꫄ꪅꪥ ꪨꪷ ꪣꪸ ꪮꪱꪙ ꫛ ꪵꪀ ꪀꪺꪉ ꪚꪱꪙ , ꪔꪷ ꪹꪮꪱ ꪙꪣꪾ ꪣꪲ ꪹꪩꪒ ꪶꪮꪙ ꪜꪽ ꪻꪬ ꪕꪉꪳ ꪋꪍ ꪹꪭꪙ. ꪋꪴ ꫛ ꪝꪮꪣ ꪹꪮꪱ ꪙꪣꪾ ꪙꪽ ꪼꪜ ꪖꪮꪀ ꪻꪎ ꪼꪬ ꪹꪨꪱ ꪎꪱ ꪵꪀꪉ ꪼꪎ ꪚꪉꪷ ꪙꪣꪷ ꪹꪢ ꪹꪭꪙ ꪼꪪ ꫃ꪤꪒ ꪹꪄꪱ ꪀꪙꪲ.

          ꫛ ꪵꪀ ꪀꪺꪉ ꪚꪱꪙ ꫄ꪣꪥ ꪋꪴ ꫛ ꪵꪔ ꪹꪖꪱ ꪵꪀ ꪙꪮꪣ ꪙꪮꪥ , ꪕꪮꪚ ꪶꪬꪣ ꪘꪉꪷ ꪹꪭꪙ ꪶꪭꪥ ꪭꪮꪚ ꪀꪙꪲ ꪣꪺꪙ ꪵꪀꪠ ꪭꪸ ꫄ꪣꪉ ꪭꪒꪲ ꪀꪱꪥ ꪩꪙꪲ ꪙꪣꪾ. ꪢꪮꪥ ꪋꪺ ꪹꪭꪙ ꪜꪺ ꪢꪱ ꪕꪮꪥ ꪁꪣꪾ ꪀꪙꪸ ꪄꪮꪉ ꪹꪭꪙ ꪹꪊꪱ ꪝꪮꪣ ꪀꪙꪲ ꪹꪨ ꪱꪀꪙꪲ ꪵꪄꪱ, ꪕꪚꪾ ꪁꪮꪉ ꪕꪚꪾ ꪶꪀꪉ ꪄꪚꪾ ꪵꪏ. ꪣꪳ ꪶꪭꪥ ꪡꪮꪙ ꪹꪙꪉ ꪣꪺꪙ ꪬꪮꪣ ꪹꪝ ꪣꪲ ꪙꪣꪾ ꪣꪱ ꪭꪮꪒ ꪚꪱꪙ.

          ꪼꪄ ꪙꪲ ꪜꪱꪉ ꪶꪭꪥ ꪀꪱꪥ ꪩꪙꪲ ꪙꪣꪾ ꪑꪉꪷ ꪼꪒ ꪝꪲ ꪙꪮꪉ ꫄ꪏ ꪒꪉꪷ ꪘꪉꪷ ꪨꪱꪥ ꪶꪠꪉ ꪄꪮꪉ ꪕꪴ ꫄ꪣ ꪶꪥꪉ , ꪔꪉꪲ ꪁꪮꪙ ꪕꪣꪴ ꫄ꪩꪉ ꪋꪳ ꪬꪣꪸ, ꪀꪚꪾ ꪻꪠ ꪁꪮꪉ ꪚꪷ ꪙꪣꪾ ꫄ꪋ ꪻꪒ ꪁꪸ ꪣꪲ, ꪡꪱ ꪋꪱꪉ ꪵꪒꪒ ꪊꪱꪉ ꪶꪠꪙ ꪋꪴ ꪹꪭꪙ ꪝꪮꪣ ꪣꪲ ꪜꪺꪉ ꪀꪙꪲ ꪩꪺꪉ ꪤꪴ ꪮꪣꪲ ꪝꪷ, ꪹꪄꪱ 6ꪔꪣ ꪶꪝꪥ ꫃ꪔꪣ ꪥꪸ, ꪉꪺ ꪁꪫꪱꪥ ꪎꪒꪷ ꪎꪒꪲ ꫃ꪔꪣ ꪩꪱꪉ , ꪋꪴ ꫛ ꪭꪀꪷ ꪵꪝꪉ ꪮꪙꪸ ꪹꪎꪉ ꪀꪽ. ꪯꪽ ꪨꪷ ꪩꪺꪉ ꫃ꪥꪒ ꫜ ꪼꪫ ꪝꪲ ꪙꪮꪉ ꪁꪱꪒ ꪎꪱꪙ ꪝꪮꪣ ꪀꪽ ꪼꪜ ꪋꪳ ꪚꪮꪙ ꪙꪣꪾ ꪀꪙꪲ ꪒꪙꪲ ꪤꪴ, ꪼꪜ ꪋꪳ ꪹꪮꪱ ꪚꪷ ꪙꪣꪾ ꪄꪮꪉ ꪹꪊꪱ.

                                                          TTTN - ꪹꪩꪉ ꪵꪭꪉ

          Pang hội cai lin nặm khong côn Xơ Đăng tỉnh Kon Tum

          Pang hội cái lin nặm khong côn Xơ Đăng phổng Tu Mrông lâng khày ók cuông 3 mự. Mự cốc khọe, côn ké cuông bản pọm pày ha bó nặm. Chơ ha hên bó nặm, côn ké cuông bản giao hảu phủ trai khửn pá mưa tắt mạy dệt lin nặm vạy côn ké dệt hịt xo chảu bó nặm hảu phép àu nặm cái lin ma bản.

          Mự thứ 2, phủ nhinh đảy côn ké cuông bản giao vịa tọn phát tang té bản mưa họt bó nặm, lẹo phủ trai lỏ mưa tắt mạy dệt lin nặm àu nặm pày cá bản. Nẳng bó nặm, pi nọng khút pên bón lưng nặm, san trai báo khửn pá mưa àu mạy póng ma long dệt lin cái àu nặm. Pi nọng lựa àu lăm dao, xư báu xựp ma dệt lin, lin nặm đảy khiên vẻ dệt chăn cắp pưng tang co mạy, tô pá, pí lôm cánh tẳng vạy nẳng tang hùa nặm. Ặn lỏ xểm sái cái diên té chảu bó nặm cánh cáo mơi ma bấng đu nặm sàư chaư xư khong côn dân.

          Mự thứ 3 lỏ mự chính khong pang dệt hịt cái lin nặm. Chu côn cuông bản tọp hom ma tục nả pọm tà nẳng hươn hội họp khong bản. Côn thảu ké sắng xon, păn vịa hảu chu côn. Lăng nặn, mi to phủ trai đảy phép mưa toi côn ké cá bó nặm, pùa mưa toi tô ổn nưng vạy dệt hịt. Mưa họt bón, côn ké cuông bản àu puông pha mạy pào vạy pốc bón lưng nặm, báu hảu nhính nhửa tốc sáư dệt uối min bó nặm. Pi nọng tắt con tô ổn àu lựơt sáư bẳng mạy pào. Côn Xơ đăng lâng ngắm, hịt xên cái lin nặm đảy àu lượt tô ổn ma xên chắng chi sàư xiểng cánh bun mày, hảu khảu phải pên lài têm lạu têm dia, ngua quai mả pe têm lang, chu côn hảo hanh, bó nặm lày lâng báu khát xia lay, tô nộc, tô nù, tô pá báu ma cặt hon co khảu.

          Chơ tam lẹo, ải thảu thók lượt ổn sáư bó nặm. Lượt qua sáư nặm lày pày toi peo lin cái ma cá bản. Tang lả lin nặm, mi phủ nhinh nưng tỏn lâng khơi lỏ mia ải thảu côn ké cuông bản, to àu nặm mi lượt ổn păn hảu tựng chua hươn. Chu côn pọm àu nặm nặn thók sáư hay lảu xá, cánh sáư bẳng nặm àu mưa hươn vạy dệt khảu nặm căm kin.

          Côn ké cuông bản mơi chu côn, té thảu ké, nóm nọi, tọp hôm nẳng hươn hội họp kin muôn, khék hịa mâng hịt cái lin nặm. Mỏi chua hươn pua ma toi căm kin khong hươn chảu pọm kin lảu, kin khảu tặp cọng, tặp cống, khắp xe. Mự hội phọn nương muôn hòm pưa mi nặm ma họt bản.

          Khay nị pang hội cái lin nặm nhăng đảy pi nọng Xơ đăng nẳng lai phổng khong Tu Mrông, tỉnh Kon Tum lâng chự hiêm, cắp pháư cong bó nặm chơ đàư cọ mi, phạ chang đét chang phôn chu hươn pọm mi puông kin luông dú ím po, khảu têm pội têm dia, ngau quai, sắt sính têm lang, chu côn hặc panh ín xương căn. Ặn cọ luông dệt nưng vạy pi nọng cạt san pọm căn pảy chự bón nặm kin đin dú, pảy chự àu bó nặm khòng chảu./.

                                                          TTTN - Hạnh dịch