Tiô riân ing Tíu xiâm séa ngăn mơdât Pơreăng Pơlê kong kân Hồ Chí Minh, bú tung môi măng tĭng, pơlê kong kân hiăng tối ai lối 300 ngế tâ pơreăng tơngê lo mơheăm. Tâi tâng tơngê lo mơheăm ing apoăng hơnăm 2025 troh nôkố cho vâ chê 6.000 ngế.

 Xuân tung môi măng tĭng, pơlê kong kơdrâm xuân hiăng tơmâng xo lối 300 ngế tâ tú thê̆n kŏng chêng rơkong. Tung kơxô̆ ngế thĕn kŏng chêng rơkong riân sap apoăng hơnăm 2025 troh nôkố vâ chê 2.300 ngế.

Ăm ‘nâi ing ngế chêh hlá tơbeăng a Hngêi pơkeăng Nhi đồng 2 Pơlê kong kân Hồ Chí Minh, hên ngế hdrêng ki thê̆n ing mâu pơlê kong kân troh vâ pơlât xua nôu pâ tô tuăn tíu pơlât a cheăm kong pơlê ôh tá ai tŭm pơkeăng pơlât ƀă ki rơkê plĕng drêng khăm vâ tối nhên tro tơdroăng châi.

Drêng pơreăng lo xêi hâi kâi tâi, thĕn kŏng chêng rơkong ƀă tơngê lo mơheăm hiăng troh rơnó tâ tú pá vâ ‘nâi hdrối tâng ôh tá châ mơdât.

Ngoh Phạm Đức Tuấn lo ing kong pơlê Bình Phước djâ 2 ngế kuăn 2 hơnăm lăm troh a Pơlê kong kân pơlât, mơhé ‘nâi a kong pơlê tơná ai tŭm pơkeăng ƀă tơdroăng khăm pơlât la troh a Hngêi pơkeăng Nhi đồng 2 ‘nôi nếo tâ hmiân tuăn:

“A Kơpêng khăm tối cho êi krôk po pom pro tơngê, troh akố dế pro hlá mơ-éa khăm tơkuôm vâ ’nâi tơdroăng mê o kŭn kơdrâ tơngê rơxá klêi mê pơlât tơdrêng. Rôh apoăng ối tơmiât to kơdrâ ‘mei tung ngôa la dâng 3-4 chôu kơ’nâi pơxiâm hlo o lo hên mon, mâu vâi nâ thế pâ pơ’lêh kơvâ pơlât a kơvâ pơlât ‘na tâ tú pơreăng ăm khăm ngăn peăng kơvâ mê tối o tro thĕn kŏng chêng rơkong”.

Môi tiah nâ, Lê Thị Huyền (kong pơlê Đồng Nai) xuân djâ dêi kuăn lăm a hngêi pơkeăng 2 hdrối xua hdrối nah tro la oh tá râ pơlât vêh ôh tá koi a hngêi pơkeăng:

“Má pái pơxiâm tơngê la troh hâi má pơtăm nếo troh akố khăm, mơni mâu ƀok thái pơkeăng hlo oh tá râ chiâng ăm ôu pơkeăng tê vâ séa ngăn. Tâi 2 hâi hlo o ôh tá kâi kơdroh hmếo koi hên hlối tro kơdrâ, ối to krôu, ôh tá vâ kâ kế ƀă hlối tơngế mê chiâng djâ o troh a kố nếo. Pơlât hiăng chiá tâ iâ hâi kố o nếo châ vêh a hngêi”.

Thĕn kŏng chêng rơkong hâi teăm ai vaccine, la hiăng ai tơdroăng hnê pơlât, mâu hngêi pơkeăng kong pơlê xuân tơkŭm hriâm, la tôu tuăn hên mâu nôu pâ hdrêng djâ dêi kuăn lăm pơlât a kơphô̆ pro ăm hngêi pơkeăng a mê hên hĭn mơngế pơlât.

Tung pơla mê, ƀok thái pơkeăng Dư Tuấn Quy, Ngế pơkuâ Khoa Nhiễm - Thần kinh- Hngêi pơkeăng Nhi đồng 1 ăm ‘nâi, thĕn kŏng chêng rơkong măng tĭng kố hlo rế tâk. Nôkố ai 18 ngế thĕn kŏng chêng chêng rơkong a kơvâ pơlât a hngêi pơkeăng, riân môi hâi ai 15-20 ngế vâi hdrêng tro châ khăm klêi mê ăm vêh a hngêi, hâi hlo ai ngế ki lâi râ ó.

Hngêi pơkeăng tối tơbleăng hdrối pơreăng mơni kô vêh tâ tú mê hiăng thế rĕng hnê hriâm ăm mâu ngế cheăng ngăn pơkeăng, mâu hngêi pơkeăng râ kong pơlê ƀă malối hbrâ pơkeăng vâ hbrâ ví. Krê pơreăng lo sêi, khoa xuân dế ai 40 ngế tung kơvâ, ai kơdroh tô. La xua ƀok thái pơkeăng hnê tối ăm kuăn pơlê thế lăm pak mơdât lo sêi ăm mâu ngế ki hiăng ƀă vâi hdrêng châ 95% vâ ai trếo ki kâi tơplâ mơdât pơreăng tung kuăn pơlê, kring vế mâu ngế ai tung châ tơ’lêi châi plâi nuih, châi gơgốu, ŭm tung châ.

Ƀok thái pơkeăng Quy xuân hnê tối tơ’nôm, pơla sap khế 4 troh khế 6 cho pơxiâm ai ngế tâ pơreăng thĕn kŏng chêng rơkong ƀă klêi mê tơngê lo mơheăm. Xua mê, xuân thế hbrâ rơnáu, vâ ai ivá kâi tơplâ mơdât ƀă pơreăng, pâk ƀă tŭm túa tơdroăng châi ki lâi ki ai vaccine hbrâ mơdât.

“Pơreăng xêi kal thế pơtối hbrâ mơdât, malối mâu kong pơlê kal thế rĕng pêi pro. A hnê tối thế pâk mơdât drêng vâi hdrêng dế 6 khế, ki hdrối thế chôu pâ ƀă pêi pro tơdroăng mê vâ ngế hdrêng ki hdrối nah tro, kal tơtrŏng mâu ngế ki ai tơdroăng châi tung châ. Drêng hiăng ai trếo ki mơdât pơreăng tung kuăn pơlê ôh tá ai ngế lo xêi nếo mê cho hiăng tâi pơreăng. Má 2, a hnê tối pro ti lâi vâ kuăn pơlê ‘nâi sap khế 4 troh khế 6 rơnó ki tâ tú thĕn kŏng chêng rơkong vâ hbrâ mơdât. Kuăn pơlê kal thế tơmâng khât tâ ƀă ôh tá chiâng tơngôu ƀă mâu pơreăng ki tâ tú ki ê môi tiah tơngê lo mơheăm, lo kơtuâ ‘mêi. Mâu pơreăng ki lâi ai vaccine hbrâ mơdât thế tối vâ kuăn pơlê pâk, ƀă tối tơbleăng hdrối xua tơnêi têa pin tơnêi têa ki tô pơreăng tơ’lêi tâ tú plâ hơnăm”.

A hngêi pơkeăng Nhi đồng 2, Ƀok thái pơkeăng Nguyễn Đình Qui ăm ‘nâi, pơla kố tơngê lo mơheăm, thĕn kŏng chêng rơkong ai tâk ƀă mâu ngế cheăng khăm pơlât ngăn xuân tô tuăn drêng 3 túa pơreăng kô tâ tú tơdrêng môi hdrôh:

 “Krê pơreăng lo xêi tê xuân hiăng pôu prĭng ko, nôkố ai tơ’nôm tơngê lo mơheăm nếo kơtăn kố 2-3 măng tĭng hlo tâk hên, pơxiâm ing mơ’nui khế kố tơhĕn kŏng chêng rơkong pơxiâm tâ tú. A tô tuăn xâu pái pơreăng mê tơvât hên môi hdroh mê chiâng tơbrêi ăm mơngế ki cheăng ngăn pơkeăng. Nôkố ăm hlá tơbeăng mơdêk hnê tối vâ mâu nôu pâ vâi hdrêng hbrâ mơdât”.