Châ mơjiâng sap ing tơdroăng ‘mot tơkŭm mâu bêng Tân An, Tân Thiện, Bình Tân ƀă cheăm Tân Bình dêi pơlê kong krâm La Gi (kong pơlê Bình Thuận hdrối nah), bêng La Gi kơphô̆ tíu xiâm kơpong kĭng têa kơxĭ dêi kong pơlê Lâm Đồng, pơ’leăng mâ mơngế lối 60 rơpâu ngế. Kuăn pơlê hên kơdrâm, kuăn pơlê lăm troh pro mơ-éa hên, la mâu tơdroăng cheăng pơrá châ pêi pro tơniăn, tro, kuăn pơlê hâk vâ. Pôa Tôn Thất Nhật, a bêng La Gi ro rih ăm ‘nâi:

“Kuăn pơlê đi đo rơhêng vâ maluâ mâu tơdroăng ki kal pơrá vâ rĕng, tơ’lêi. Vâ pro châ tiô tơdroăng kuăn pơlê vâ mê á hlo bêng hiăng pêi pro tro tơdroăng ki mê. Xo ah hmôi, bêng athế pơtối chêh pro tơleăng mâu mơ-éa rĕng, tơ’lêi hlâu môi tiah kố cho tơdroăng ki ro, tơdroăng ki tro”.

Xuân môi tiah kơpong tíu pêi cheăng, cheăng chêh pro pơkâ tơleăng mâu mơ-éa a mâu cheăm kơpong hngế hngo, kơpong hdroâng kuăn ngo dêi kong pơlê Lâm Đồng pơrá hlo tơniăn hlâu, tơdjêp tơdrăng ƀă tíu cheăng dêi tơnêi têa. Pôa Bùi Quốc Huân, Kăn hnê ngăn Vi ƀan cheăm Lạc Dương, kong pơlê Lâm Đồng, cheăm ki ai lối 86% pơ’leăng mâ mơngế cho hdroâng kuăn ngo ăm ‘nâi, troh nhôkố, cheăm hiăng séa ngăn, xing xoăng, pơkâ ƀă tơbleăng pro 378 mơ-éa tung tíu cheăng tơdjuôm. Tâi tâng mâu mơ-éa kố pơrá châ tíu cheăng môi tíu dêi cheăm pơkâ tơleăng teăm tơdrêng drêng kuăn pơlê kal vâ.

“Măng tĭng apoăng ngin tơdah xo 51 to hồ sơ, tung mê ai 17 to hồ sơ tơdah xo ing troăng pơtroh ƀă hyôh internet, ki hên cho ‘na kơvâ tơnêi tơníu, hô̆ tịch ƀă chứng thưk. Tung pơla pơkâ tơleăng, kuăn pơlê troh pâ thế tơbleăng mâu tơdroăng dịch vŭ mê ngin hiăng pêi châ tơdroăng mê. Nhŏng o hiăng ‘nâi, hlê hnoăng cheăng pơkâ tơleăng hồ sơ, mơ-éa tơná. Kơmăi kơmok, troăng pơtroh châ rak vế tro tơniăn”.

Rơtế ƀă 16 to kơ koan, tíu pêi cheăng, khu râ kơvâ cheăng râ kong pơlê, tung tâi tâng 124 to cheăm, bêng, kơpong pêi cheăng dêi kong pơlê Lâm Đồng pơrá hiăng châ pro tơdâng tơ’mô mâu troăng hơlâ chêh pro mơ-éa, xúa phần mềm pơkuâ ngăn mơ-éa ki nếo, pêi châ tơdroăng púi vâ tro má môi tung tơdroăng tơdah xo ƀă chêh pro hồ sơ ăm kuăn pơlê. Tiô Khu ngăn cheăm bêng ƀă hnoăng cheăng dêi mâu kăn ƀô̆ kong pơlê Lâm Đồng, sap ing hâi lơ 1/7, rêm hâi pơrá ai lối 1 rơpâu to hồ sơ nâp tơdrêng ƀă pơtroh ing troăng hyôn internet a mâu kơ koan, tíu pêi cheăng vâ tơkôm chêh pro pơkâ tơleăng. Lâm Đồng châ mơnhên tối cho môi tung tôp 5 to kong pơlê djâ troăng ahdrối tung lâp tơnêi têa tung tơdroăng ki tơdah xo, chêh pro mơdrếo mơ-éa tung mâu hâi apoăng pêi cheăng kăn pơkuâ 2 râ.