Troh veăng ai mâ ƀă pơkuâ po rôh trâm mâ mâu kăn Kuô̆k hô̆i mâu hneăng hdrối, pôa Tô Lâm, Kăn xiâm pơkuâ hnê ngăn cheăng Đảng tối rơdêi, 80 hơnăm hvái ngăn, troăng prôk mơnhông dêi Kuô̆k hô̆i Việt Nam cho môi troăng prôk ki krá, rơkê ƀă ôh tá pơtê pơhlêh nếo. Sap ing rôh pôk kăn xiâm hâi lơ 06-01-1946, rôh pôk kăn tơniăn krê apoăng dêi tơnêi têa pin, Kuô̆k hô̆i hiăng pơkâ mâu tơdroăng ki kal má môi dêi tơnêi têa: ing Luât, mơjiâng tơdroăng luât ăm môi tơnêi têa tơniăn krê; pơkâ troăng prôk, troăng tŏng gum kân; séa ngăn tơdroăng cheăng dêi kơ koan cheăng tơnêi têa; tơdrêng amê hlối tơbleăng tơpui kâ kuô̆k hô̆i, veăng gum mơnhông tíu ối tơnêi têa a mâu kong têa tung lâp plâi tơnêi.

Pin ôu eăng Kuô̆k hô̆i ôh ti xê môi tiah mơjiâng troăng pơkuâ xiâm tơnêi têa, mê ki hdrối tâ cho môi Toăng hngêi ối tơdjuôm dêi mâu mâu kuăn pơlê – hiăng pôu a kơxah hnoăng cheăng ki hngăm la kơnía git: tơmâng kuăn pơlê tơpui, tơpui nâl tơpui dêi kuăn pơlê, rak ki pơxúa păng ‘nâng dêi kuăn pơlê”

Tối tơbleăng troh lối 2.200 ngế kăn ki veăng hôp a rôh hôp ‘na mâu tơdroăng ki ƀlêi chiâng xuân môi tiah mâu tơdroăng pơkâ mơnhông tơnêi têa tung la ngiâ, malối cho tơdroăng mơeăm pêi ƀlêi chiâng Pơkâ Hneăng mâu kăn Đảng lâp tơnêi têa rôh má 13 ƀă hbrâ tro vâ tơkŭm po ƀlêi chiâng Hneăng hôp khu kăn lâp tơnêi têa rôh má 14 dêi Đảng, khŏm pêi pro ƀlêi chiâng péa tơdroăng xiâm 100 hơnăm ki Đảng hiăng mơ’no. Kăn xiâm pơkuâ hnê ngăn cheăng Đảng tối nhên ‘na 3 túa tơmiât pêi nhên mê cho khŏm mơeăm hnoăng pơkuâ, tâi tâng tơnêi tơníu, rak vế hơniâp lĕm, tơniăn tung pơlê pơla, châ tơdroăng púi vâ rế hía rế hên ‘na tơdroăng rêh ối liăn ngân dêi kuăn pơlê. Kố xuân cho ki xiâm má môi dêi Đảng, dêi Chuh nghiah xah hô̆i. ‘Na klâ xoăng khu tơrŭm dêi khu pơkuâ tơdroăng kal kí, vêh tơkŭm po tơdroăng dêi tơnêi têa vâ mơnhông, pôa Tô Lâm, Kăn xiâm pơkuâ hnê ngăn cheăng Đảng ăm ‘nâi:

Ivá pêi cheăng dêi mâu khu tơrŭm, kơ koan, tíu pêi cheăng tung tơdroăng kal kí 3 râ, malối cho râ cheăm pêi cheăng tơ’mô, tơdrăng, pêi châ tơdroăng púi vâ dêi kuăn pơlê, gum kuăn pơlê tro tâ, tơ’lêi tâ. Tơrŭm pơla Tơnêi têa, râ kong pơlê ƀă râ cheăm dế rế hía rế vâ tơƀrê tung môi tíu pêi cheăng nếo. Tơdroăng tơkŭm, xing xoăng kơ koan cheăng hiăng gum tơdroăng pơkuâ pơlê pơla, pơkuâ kong pơlê tơƀrê tâ, rơkê tâ, pơhlêh rơdêi ƀă trâu hngế, tro ƀă ki ai khât tâ, kuăn pơlê châ gum rĕng tâ, tro tâ”.

A rôh trâm mâ, Pôa Trần Thanh Mẫn, Kăn xiâm hnê ngăn Kuô̆k hô̆i mơnê Đảng xiâm, Khu pơkuâ tơdroăng kal kí, Khu pơkuâ ngăn Đảng mâu hneăng; mơnê ‘na tơdroăng tơrŭm, loi, rơtế prôk, môi tuăn khât, teăm, tơƀrê dêi Chin phuh, mâu kơ koan cheăng luât, Măt trâ̆n Tơnêi têa, mâu khu râ, kơvâ cheăng, mâu kong pơlê ƀă Kuăn pơlê lâp tơnêi têa; tối hiâm mơno nhuô̆m ‘na mâu hnoăng pleăng ki kơnía git dêi mâu kăn Kuô̆k hô̆i dêi mâu hneăng. Pôa Trần Thanh Mẫn, Kăn xiâm hnê ngăn Kuô̆k hô̆i rơhêng vâ, mâu Kăn Kuô̆k hô̆i đi đo rak tơrŭm cheăng krá tơniăn ƀă Đảng, Tơnêi têa ƀă Kuăn pơlê.

“Pơtối pleăng dêi tơdoăng cheăng ăm Kuô̆k hô̆i ăm tơdroăng cheăng kăch măng khên tơnôu kân dêi Đảng, dêi hdroâng mơngế pin, môi tiah pôa Tô Lâm, kăn xiâm pơkuâ hnê ngăn cheăng Đảng hiăng pơchuât hdrối nah: “Hvái ngăn vâ prôk troh – mơnê vâ chôu vế ƀă pơtối pêi”. Mot tung hneăng ki nếo, tơnêi têa pin dế trâm mâu rôh tơ’lêi hlâu kân, la xuân ôh tá iâ xơpá, pơloăng. Kuô̆k hô̆i kô pơtối pêi pro mâu troăng hơlâ pơkâ dêi Đảng, tơmâng mâu rơkong tơpui tối dêi kuăn pơlê ƀă Khu mơdró kâ; rơtế prôk ƀă Chin phuh, tơrŭm krá tơniăn ƀă mâu kơ koan tơrŭm cheăng, pêi pro tơƀrê tơdroăng cheăng mơjiâng luât, séa ngăn kơtăng, pơkâ mâu tơdroăng ki kal dêi tơnêi têa. Mơnhông hiâm mơno pơhlêh nếo, tơmiât pêi rơkê, tơniăn, tơrŭm; troăng pơkâ pơhlêh teăm mâu Pơkâ dêi Đảng, ăm troăng pơkâ dêi Đảng châ mot tung tơdroăng rêh ối”.

Rôh kố, Pôa Trần Thanh Mẫn, Kăn xiâm hnê ngăn Kuô̆k hô̆i hiăng diâp Kỷ niệm chương “Xua tơdroăng cheăng Kuô̆k hô̆i Việt Nam” ăm pôa Tô Lâm, Kăn xiâm pơkuâ hnê ngăn cheăng Đảng, Pôa Lương Cường, Kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn tơnêi têa, mâu kăn pơkuâ Đảng, Tơnêi têa, Chin phuh, Măt trâ̆n Tơnêi têa Việt Nam hneăng hdrối, ƀă kăn pơkuâ Kuô̆k hô̆i xuân hiăng diêp Kỷ niệm chương “Xua tơdroăng cheăng Kuô̆k hô̆i Việt Nam” ăm mâu kăn Kuô̆k hô̆i dêi mâu hneăng hdrối.