Drêng trêi hngêi ton xuân ối tơprâ tơprĕng klêi kơ’nâi tro têa lu mơhiu tơhnâp, ngoh Nguyễn Thế Kiên (thôn Chánh Hữu, cheăm Ngô Mây, kong pơlê Gia Lai) thâ rơtế kăn ƀô̆, mâu mô đô̆i Hngêi trung hnê mơjiâng mô đô̆i (Quân đoân 34) mơjiâng pro ‘na ki meăm thép, hbrâ ok prêi xi mong hmố pro trăng ƀê tông ăm toăng hngêi nếo.

Mơhot roh má 13 pro hngêi ngoh Kiên tơtêa kuâ. Tá hâi teăm rơnêu, têa lân lu kân plong mot mơhiu tâi tâng. Châ Tơnêi têa tŏng gum 60 rơtuh liăn, ai mô đô̆i gum mơjiâng pro hngêi, ngoh tơmiêt vâ mung tơ’nôm 40 rơtuh liăn nếo vâ bê 100 rơtuh liăn mơjiâng pro hngêi krá kâk. Ngoh Nguyễn Thế Kiên tối, toăng hngêi nếo kô ai 30m2 ai pơtâ ƀêtông krá:

‘’Mô đô̆i pêi tá hiêm mơno. Mô đô̆i gum on veăng á pro hngêi krá kâk, lĕm tâ hngêi hdrối nah. Nôkố pro ƀă xi mong prêi hmố trăng cho krá tâ rơxông hdrối nah hngêi râ má 4. Nôkố rôe meăm thép pro, têa lân lu mê to a râ a ‘ngêi, ôh tá tông tơmeăm lăm tíu ê xếo.’’

Xuân a thôn Chánh Hữu, mô đô̆i Hngêi trung hnê mơjiâng mô đô̆i Quân đoân 34 dế gum rơpŏng ngoh Ngoh Ngô Đình Vị mơjiâng pro hngêi. Toăng hngêi tung kơtâu kŭn, tơnêi a’nâi xua mê mô đô̆i hiăng pơto tơnêi pro trếi a’ngêi, mơdêk tơdroăng ki vâ tơkâ hluâ têa lân lu. Kố kô cho toăng hngêi kân lĕm rơdâ, xua pakĭng 60 rơtuh liăn Tơnêi têa tŏng gum, ngoh hiăng ai tâi tâng 120 rơtuh liăn kơdĭng vâ rôe tơmeăm ki pro hngêi, ƀă mô đô̆i gum ki hên cho hâi mơjiâng pro. Cho ngế meăn pro hngêi xua mê ngoh Vị veăng pêi chiâng tung tơdroăng mơjiâng pro hngêi. Ngoh rơrêk:

‘’Mâu tăm ối tung mêi tung tô hlo hơ-ui ‘nâng. Kong mêi, á tối mâu tăm pơtê iâ ‘nôi, laga xuân xâp ếo mêi vâ pêi cheăng. Tơmeăm kâ têa ô, mâu tăm ôh tá xúa ki klâi ôh. Mâu tăm vêh gum rơpŏng, á phiu ro ‘nâng. Rơpŏng kơnôm veăng gum ki lâi, mô đô̆i pêi ki mê. Mơni, rơpŏng kô pro tung 45 hâi.’’

Tung ‘’Tơdroăng pêi Quang Trung’’ roh kố, Quân đoân 34 châ pơcháu mơjiâng 70 toăng hngêi kơpong têa lân lu dêi kong pơlê Gia Lai ƀă 30 toăng hngêi a kơpong têa lân lu kong pơlê Dak Lak. Klêi kơ’nâi tơdah pơkâ, Quân đoân 34 hiăng mơhnhôk lối 600 kăn ƀô̆ mô đô̆i rơtế tơmeăm mơjiâng pro thâ prôk troh mâu cheăm, pơcháu rêm tíu cheăng pơkuâ mâu kơpong ki nhên, tơrŭm krá tơniăn ƀă khu râ kăn pơkuâ mâu pơlê ƀă mâu rơpŏng hngêi thâ pơkâ pêi ƀă rup kŏng pêi tơdrêng hlối.

Đăi tă Phạm Hồng Sơn, Phŏ Cheăng kal kí Hngêi trung hnê mơjiâng Mô đô̆i Quân đoân 34, tơdah hnoăng cheăng a cheăm Ngô Mây, kong pơlê Gia Lai tối ăm ‘nâi; tâi tâng khu pơrá châ troh pêi cheăng vâ tơniăn châ tơƀrê ƀă tơdroăng mơjiâng pro. Đông lêng châ pơkâ kêi đeăng mâu toăng hngêi hdrối hâi lơ 20/1/2026, vâ kuăn pơlê teăm tơdrêng tơdah Têt tung toăng hngêi nếo.

‘’Tơdroăng mơjiâng pro cheăm ƀă rơpŏng chiu pôu râng hnoăng cheăng tâi tâng tíu pêi cheăng kô tŏng gum ngế meăn pro ƀă khu tông xui tơmeăm mơjiâng pro. Ô kâ mê đông lêng kô tơniăn tro tiô pơkâ dêi đông lêng. Ngin tơkŭm po tơniăn tơdroăng tŏng gum parŏng kal tơkŭm môi tíu ƀă djâ troh mâu tíu cheăng dêi mâu tôh a mâu hngêi kuăn pơlê vâ nhŏng o kâ hmê, tơniăn ivá vâ pêi pro lĕm tro lĕm tơdroăng cheăng dêi tơná.’’

Ƀă mâu rơpŏng klêi trâm mơhot têa lân lu, mâu toăng hngêi krá kâk dế chôa ‘lâng chiâng ôh tá xê to tíu ki rêh ối tơniăn nếo, mê ối cho tíu hgiên hiêm mơno gum kơdroh iâ lup tơmeăm khoăng xua kong prâi pro. Tung rêm mơnât, rêm toăng hngêi pơrá ai mâu têa kơxôu ƀă hiêm mơno dêi mâu Mô đô̆i Pôa Hồ, tơ’nôm môi xôh mơnhên tơdroăng tuăn pâ khu lêng – kuăn pơlê krá tơniăn tung tơdroăng xía vâ kân, ôh tá lôi kơbố parŏng./.