A mâu ngo, mâu kơdrum krui ƀŏng drêh ngiât châ pêt, rêm rôh khía apoăng rơnó pê luâ, ăm hlo ki plâi kơtóu hên hơnăm kố pơtối rak a kơlo ki tơniăn. Tiô tối hdrối tơmối ôm hyô rôh lơ 2/9 troh a Khánh Hòa tâk hên dế po rôh tơ’lêi châ tê ôh ti xê to krui ƀŏng kơtôu ngiât mê ối hên mâu tơmeăm pêi lo ing chiâk deăng ki ê dêi kơpong kong ngo tê tơdrêng a cheăm, pro ivá vâ mơjiâng mâu tíu tơrŭm cheăng tung la ngiâ.

Pôa Đoàn Văn Hưởng, Kăn pơkuâ Khu pêi cheăng tơrŭm pêi chiâk deăng Khánh Thành (cheăm Khánh Thành, kong pơlê Khánh Hòa) tối:

“Hơnăm kố, sap ing apoăng rơnó troh nôkố, kong prâi ngăn tơdjuôm gá chía tơniăn. Kong mê iâ mê tơdroăng rak ngăn hdrê loăng plâi gá chía tơniăn. Têt hơnăm kố, nôkố dế tung pơla hneăng ki rak ngăn, ngăn tơdjuôm xiâm gá lĕm khât. Mơdĭng mơđah tơbleăng tơmeăm pêi lo ing chiâk deăng, malối cho krui ƀŏng kơtôu ngiât, xuân po tro khế. Tiô tối hdrối cho hâi lơ 2 khế 9, khu tơrŭm cheăng xuân ai tŭm plâi krui vâ tê ăm kơchơ mơdró”.

Krui ƀŏng kơtôu ngiât Khánh Vĩnh nôkố ôh ti xê tê to a kơchơ kân mê ối châ mâu khu mơdró kâ pro têa rơmâ krui ƀŏng, kơtôu krui ƀŏng pro hngíu. Mâu khu mơdró kâ mơnhên tối, kố cho rôh tơ’lêi má môi vâ rế hía rế ăm plâi kố chiâng tơmeăm OCOP krê dêi kơpong kong ngo. Jâ Nguyễn Thị Ngân, Kăn pơkuâ Kŏng ti tê plâi pôm ƀă tơmeăm pêi lo ing chiâk deăng ngi kong têa ê Ngân Nguyễn ăm ‘nâi:

“Drêng mâu tơmeăm châ tiô pơkâ OCOP, tơkéa vâ tối cho prôk tiô troăng kế tơmeăm krúa, hưh cơ, mê mâu khu mơdró kâ ƀă tíu ki tê mơdró pơxiâm tăng troh mâu tíu pêi cheăng môi tiah ‘na ngin kố. Vâi tăng mâu tơmeăm ai xiâm rêi pêt, mơjiâng pro tơniăn, tơmeăm krúa ƀă ki kơnâ xiâm vâ chiâng tơrŭm ton xŏn. Pơtih mâu kế tơmeăm lĕm sap ing krui ƀŏng môi tiah têa rơmâ pro ing krui ƀŏng, kơtôu krui ƀŏng hngíu, lơ xúa vâ pế chế pơrá dế châ vâi kal vâ ‘nâi”.

Tung pơla kong pơlê Khánh Hòa po rơdâ tơnêi tơníu pêt tơmeăm drêng tơkŭm kong pơlê Ninh Thuận, mâu tơmeăm krê kong ngo ai tơ’nôm tíu tơdjêp tung kơchơ mơdró, malối cho tơrŭm tung mâu rôh tơkŭm po tơdroăng, po mơdĭng, ôm hyô. Hên tơmối drêng troh a Nam Trung bộ hiăng vâ ‘nâi plĕng troh mâu plâi kâ krê dêi cheăm. Tiê̆n sih Đặng Quý Nhân, Ƀơrô cheăng xing xoăng cheăng Thôn pơlê nếo Tơnêi têa, Khu xiâm ngăn chiâk deăng ƀă Kong prâi tối tiah kố:

“Mâu cheăm kal mơnhông ki rơdêi ‘na mâu tơmeăm pêi lo krê dêi tơná. Rơhêng vâ mơnhông pêt tơniăn mê athế ai troăng hơlâ mơjiâng kơpong pêt krá ton, ai xiâm kối tíu pêt hleăng nhên ƀă ai tơdroăng hnê mơhno ‘na tơnêi tơníu. Drêng mê, mâu khu mơdró kâ ƀă khu pêi cheăng tơrŭm kô hbrâ rơnáu pêt lo kế tơmeăm chiâng ton khế hơnăm, mơdêk ki kơnâ ƀă mơdêk pêi lo liăn ăm vâi krâ kuăn pơlê ki pêi chiâk. Tơdroăng tơrŭm mâu kế tơmeăm OCOP vâ tê ăm tơmối trohcheăm xuân kal châ tơtrŏng”.

Tung pơla hdrối nah, kơnôm Tơdroăng tơnêi têa pơkâ ‘no liăn mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo, kong pơlê Khánh Hòa hiăng tŏng gum mâu khu pêi cheăng tơrŭm ‘no liăn pro hngêi ki uâ pơli, mơdi, hnôu ‘măn rak, hnê chêh inâi kơpong pêt, rế hía rế pêi pro klêi túa mơjiâng pro. Ai mâu túa pơkâ pêi mơnúa ngăn ăm tơmối troh a kơdrum ƀă roê tơmeăm tơdrêng a kơdrum hlối hiăng pro pơxúa tơƀrê khât. Pôa Nguyễn Ngọc Sơn, phŏ kăn pơkuâ Khu ngăn Hdroâng kuăn ngo ƀă tơdroăng Loi tĭng tiô khôp kong pơlê Khánh Hòa ăm ‘nâi:

“Nôkố, a kơpong kong ngo kong pơlê Khánh Hòa, vâi krâ kuăn pơlê hiăng pơxiâm pơhlêh sap ing túa pêt tiah hmâ chiâng pêt xúa khoa hok – kong ngê̆ vâ mơdêk tơ’nôm ki lĕm dêi hdrê loăng, mơnăn păn. Laga, pin athế mơ-eăm tơkŭm po lâm hnê hriâm, vâ kuăn pơlê hlê nhên tiah lâi cho pơxiâm pêi cheăng, pơxiâm tơdroăng tê mơdró, tơmiât pêi rơkê. Drêng hiăng ‘nâi nhên mâu túa pơkâ mê vâi nếo ai túa tơmiât ƀă pêi mâu túa pơkâ kố tung xo ah hmôi”.

Tiah mê, tâng pơhlêh sap ing túa tơmiât pêt iâ pêt ‘ngré chiâng tơmiât pro mâu tơmeăm tro ƀă kơchơ tê mơdró, tơmeăm pêi lo ing chiâk deăng OCOP kong ngo kong pơlê Khánh Hòa kô chiâng ivá mơ-eăm mơnhông krá tơniăn tung pơla rôh po rơdâ tơnêi tơníu pêt ƀă ‘mâi mơnhông ôm hyô nôkố.