Cho ngế ki kuăn pơlê pâ nhoăm a thôn Hiệp Đoàn, cheăm Ea MDroh, kong pơlê Dak Lak, pôa Bàn Thôn Nhất ôh ti xê to châ kuăn pơlê nhoăm pâ xua kơhnâ pêi pro tơdroăng ki lĕm tung rêh ối, mê pôa ối ai hên hnoăng veăng ‘no krá kak tung tơdroăng hnê mơhnhôk kuăn pơlê.

Sap tơdroăng hnê troăng hơlâ dêi Đảng, Luât Tơnêi têa troh tơdroăng hnê mơhnhôk kuăn pơlê rak tơniăn dêi pơlê, tah tơlá ton nah ki ôh pá tro, mơjiâng tơdroăng rêh ối lĕm nếo, alâi ai tơdroăng pá, amê ai chêng pôa troh. Tối ‘na hnoăng cheăng tơná, pôa Nhất ăm ‘nâi: Tơdroăng dêi ngế kuăn pơlê pâ nhoăm cho tối ăm kuăn pơlê hlê, pro ăm kuăn pơlê loi, vâ kuăn pơlê pin rơtế ƀă dêi rơpó tơrŭm dêi rơpó, pêi cheăng kâ, rak dêi pơlê hơniâp lĕm:

“Tơdrêng ƀă tôh kring gak, khu rak ngăn thôn ƀă chi ƀô̆ hnê tối ăm  kuăn pơlê rak vế tŭm tơdroăng ‘na luât ƀă rak tơniăn lâp tung thôn pơlê. A hmâ lăm hnê tối ăm kuăn pơlê, cho kuăn ngo rêh ối a pơlê pôi tá rĕng tơmâng loi khu ‘mêi pơlông djâ pro tơdroăng ôh tá tro. Tung pơla á lăm hnê tối kuăn pơlê akố 100% rơpŏng xuân tơmâng pêi pro tro, môi tuăn tiô Đảng”.

Ki khât  ăm hlo, a mâu pơlê ki ai ngế kuăn pơlê pâ nhoăm pêi cheăng kơhnâ, tơdroăng hnê tối kuăn pơlê đi đo tơƀrê krá kak. Ngế kuăn pơlê pâ nhoăm ôh ti xê to veăng ‘no hnoăng tơbleăng lâp lu troh troăng hơlâ ki kân dêi Đảng ƀă Tơnêi têa troh ƀă tơrêm  rơpŏng kuăn pơlê, mê ối kum râ ủy, mâu kăn cheăm tăng ‘nâi plĕng tơdroăng púi vâ dêi kuăn pơlê.

Sap ing mê nah, tơdroăng ‘mâi hơ’lêh troăng hơlâ hnê mơhno kô achê ƀă tơdroăng ki ai khât nhên tâ, pro môi tuăn pơlê pơla ing xiâm. Pôa Lê Văn Chiến, kăn thôn Hiệp Hòa, cheăm Ea MDroh, kong pơlê Dak Lak tối:

“Ngế kuăn pơlê pâ nhoăm a tung thôn ai hnoăng kal khât. Rêm rôh ai mâu tơdroăng hôp, trâm mâ kuăn pơlê dêi Hô̆i đong kong pơlê, Hô̆i đong kuăn pơlê cheăm ƀă tung thôn ai mâu tơdroăng cheăng ki kal mê cho rơkong tơpui, ki kuăn pơlê nhoăm cho rơkong tơpui vâi mê hiăng kum á hên. Kum a pê klêi hnoăng cheăng, cho hnoăng cheăng dêi ngế kăn thôn”.

Tiô jâ Nguyễn Thị Thu Hồng, Kăn hnê ngăn Vi ƀan Kuăn pơlê cheăm Ea MDroh, kong pơlê Dak Lak, tâi tâng cheăm nôkố ai 19 ngế kuăn pơlê pâ nhoăm. Vâi cho mâu kơpeăng kŏng ki xŏn tơdjêp ƀă mâu kăn tung tơdroăng hnê mơhnhôk kuăn pơlê, rak tơniăn pơlê pơla ƀă mơhnhôk mơ-eăm mơnhông tơƀrê pêi cheăng kâ - rêh ối pơlê pơla a pơlê tơná.

Ngế kuăn pơlê pâ nhoăm a Ea MDroh hiăng pơtối rak hnoăng cheăng tơná tung tơdroăng tối ăm ‘nâi mâu tơdroăng, hriâm vâ hlê plĕng luât, vâ hlê troăng hơlâ dêi Đảng, tơnêi têa, troh tơdroăng châ pêi pro tro tơdroăng tơnêi têa tŏng gum tiô luât hiăng pơkâ. Tung la ngiâ, cheăm kô pơtối tơmâng khât pơtối rak vế hnoăng dêi mơngế kuăn pơlê pâ nhoăm rơtế ƀă mơnhông cheăng kâ, kơdroh kơtiê krá ton, rak ngăn kong, mơjiâng thôn pơlê nếo ƀă rak cheăng lêng - kring tơniăn tung cheăm bêng kong pơlê. Jâ Nguyễn Thị Thu Hồng tối:

“Tung la ngiâ, ƀă hnoăng cheăng tơná ƀă tơdroăng cheăng pêi kal khât dêi mâu ngế kuăn pơlê pâ nhoăm, Vi ƀan kuăn pơlê cheăm kô po mâu lâm hriâm, hriâm tơ’nôm vâ rế hlê hên xuân cho tơdroăng hnê tơ’nôm ăm mâu tơdroăng ki hlê plĕng nếo, mâu pơkâ ki nếo vâ vâi hnê ăm kuăn pơlê. Má péa nếo, kô pơtối tơmâng khât tâ nếo, kô tơbleăng mâu ngế ki kuăn pơlê pâ nhoăm ing mê kuăn pơlê kô hriâm ƀă pêi ƀối”.

Ing mâu rơdroăng pêi nhên, ai pơxúa a thôn, pơlê, mâu ngế kuăn pơlê pâ nhoăm - mâu “tíu ki tơngah’’ tung kuăn pơlê mâu hdroâng kuăn ngo a Dak Lak dế veăng rak krá hơlêm “hiâm mơno kuăn pơlê” tung tơdroăng ki kal vâ mơnhông krá kak dêi kong pơlê. Xuân ing tơdroăng tơmâng khât, ‘nâi hnoăng cheăng pêi tơná ƀă ki kuăn pơlê nhoăm pâ mê, khu tơrŭm môi tuăn tâi tâng hdroâng mơngế châ tơbêng krá, tơdroăng gak ngăn a cheăm bêng châ tơniăn, pro xiâm vâ kơpong kuăn ngo a Dak Lak pơtối mơnhông tung mâu hơnăm la ngiâ.