Rôh po kơchô a cheăm kong ngo Tu Mrông, kong pơlê Quảng Ngãi (hdrối nah ối tung tơring Tu Mrông, kong pơlê Kon Tum) ôh ti xê to tíu ki tê mơdró mê ối chiâng tíu ki trâm mâ tơpui tơno dêi mơngế Rơteăng a kơpong kong ngo, veăng gum pro pơhlêh túa tơlá pêt mơjiâng tơmeăm tơmiât troh túa pơkâ pêi chiâk pêi deăng krúa. Kơchô phiên châ po tiah hmâ rêm khế môi xôh, tơ’mot rế hía rế hên kuăn pơlê veăng. Klêi kơ’nâi 3 hneăng tơkŭm po, Kơchô phiên Tu Mrông hiăng chiâng tíu, tê mơdró rơkê, gum kuăn pơlê hdroâng kuăn Rơteăng pơhlêh túa tơmiât pêt mâu kế tơmeăm. Nâ Y Khương a thôn Ngọc Leng, cheăm Tu Mrông ăm ‘nâi:

“A rôh po kơchô rôh má 1 vâi krâ kuăn pơlê mê vâi tôu tuăn, drêng jâ tơmeăm lăm tê ôh ti ai kơbố roê. Bu ai tơdrốu, tơpah rơpŏng xo lăm. Troh a rôh ki mê mê môi rơpŏng tê châ 300 rơpâu liăn, vêh tối ăm mâu rơpŏng ki ê. Rôh má 2, rôh má 3 hên kơdrâm tâ, cheăm gum tơ’nôm kế ki vâ ‘măn tơmeăm, vâi krâ kuăn pơlê ro khât”.

Kơchô cheăm Tu Mrông châ pro klêi hâi lơ 20/8/2025 a ƀăng tơnêi vâ chê 1 ha, ai kơpong hngêi tơdrong 500m2 ƀă mâu kế tơmeăm xúa ki ê, tâi tâng kơxô̆ liăn ‘no pro lối 4 rơtal liăn xua UBND tơring Tu Mrông, kong pơlê Kon Tum hdrối nah ‘no liăn pro. Pơtó tơmeăm pro kố, kăn pơkuâ cheăm Tu Mrông hiăng tơbleăng túa “Kơchô phiên 0 liăn ƀă ai liăn”, pro tơ’lêi hlâu vâ kuăn pơlê tê, mơdró kế tơmeăm.

Tiô pôa Dương Đăng Khoa, Phŏ kăn hnê UBND cheăm Tu Mrông, tơdroăng ki tơviah dêi “Kơchô phiên 0 liăn ƀă ai liăn” cho rế pro pơxúa pơlê pơla, rế pro ivá mơnhông cheăng kâ. “0 liăn” cho mâu tơmeăm kế kâ, hmân ếo xua cheăm mơhnhôk tơlo sap ing pơlê pơla veăng gum hdru tê kơtê ăm kuăn pơlê. Ƀă “ai liăn” cho tơmeăm pêi lo ing chiâk deăng, pơkeăng dêi vâi krâ kuăn pơlê châ kuăn pơlê, khu mơdró kâ ƀă khu pêi cheăng tơrŭm vêh roê vâ mơhnhôk pêt mơjiâng. Mâu rôh po kơchô tơkŭm po tiah hmâ rêm khế a hâi lơ 20 rêm khế, tro ƀă mâu tơdroăng tơkŭm po dêi kuăn pơlê môi tiah Têt Trung thu, Hâi vâi kơdrâi Việt Nam 20/10 lơ la ngiâ ah cho Hâi hnoăng cheăng mâu thái cô 20/11. Pôa Dương Đăng Khoa ăm ‘nâi, tung la ngiâ ah, cheăm Tu Mrông tiô tối hdrối kô mơdêk rôh po kơchô rêm khế chiâng péa xôh.

“Pơhlêh túa pêi, tơdroăng ki hmâ pêi, tơdroăng ki hlê plĕng dêi vâi krâ nhŏng o ôh ti xê hlâu, mê ngin pêi tơrêm hvêa, pơcháu kăn ƀô̆ pơkuâ thôn hnê tối, tŏng gum vâi krâ nhŏng o djâ dêi tơmeăm pêi lo troh a kơchô tê. Tơmeăm “0 liăn” kô kơdroh tế hía rế iâ, ƀă tơmeăm pêi lo ing chiâk deăng ƀă pơkeăng ki tê “ai liăn” kô rế tâk.

Tung lâp kong pơlê Quảng Ngãi nôkố ai 181 to kơchô, 3 tíu xiâm tê mơdró, 12 to siêu thĭ. A kơpong peăng kong ngo ƀă kăng kong, rêm to cheăm ai 2 to kơchô. Tơdroăng ki pro klêi kơchô tê mơdró cho pro tơ’lêi hlâu ăm tơdroăng tê tơmeăm dêi cheăm. Hên tơmeăm ki xiâm, malối cho pơkeăng dêi kuăn pơlê hdroâng kuăn ngo hiăng châ tê a mâu kơchô ƀă tíu xiâm tê mơdró, veăng gum mơdêk cheăng kâ liăn ngân ăm thôn pơlê, tơniăn tơdroăng rêh ối ăm kuăn pơlê.