Bú môi măng tĭng klêi rôh hôp, kong pơlê Dak Lak hiăng tơkŭm po hâi leh pơ’lêh kơxô̆ hơnăm 2025 ƀă pơxá ‘’kong ngê̆ kơxô̆ - mơjiâng pro tung la ngiâ’’. Ƀă chiâng kong pơlê ki djâ troăng ahdrối ‘na pơ’lêh kơxô̆ a kơpong Tây Nguyên – Kĭng têa kơxĭ peăng hdroh Tơdê tơnêi têa. Kơ’nâi lối 3 khế tơmot, Dak Lak hiăng pê klêi 100% pơkâ pơ’lêh kơxô̆ a 102 to cheăm bêng, kơxô̆ hồ sơ pro hlá mơ-éa tiô troăng hyôh tung lâp kong pơlê châ 34,5%, râ cheăm châ 37%. Tíu xiâm pêi cheăng pro hlá mơ-éa tơnêi têa péa râ tơdah pro lối 350 rơpâu hồ sơ, ƀă 76% pro tiô troăng hyôh măng Lâp tung kong pơlê ai lối 83% ngế kuăn pơlê châ ăm tài khoản định danh điê̆n tưh kơlo 2, vâ chê 79% hiăng kĭch hoăt xúa.

Mâu tơdroăng ăm hlo mê rôh pơxiâm ki rơdêi dế châ mâu kăn kong pơlê péa râ Dak Lak tung tơdroăng pơ‘lêh kơxô̆, troh tơdroăng cheăng pro hlá mơ-éa achê kuăn pơlê, pêi cheăng tơdrăng ƀă pêi tiô túa nếo nôkố. Pôa Bùi Thanh Toàn, Ngế pơkuâ ngăn ‘na Khoa hok ƀă Kŏng ngê̆ kong pơlê Dak Lak, ăm ‘nâi:

“Pro ti lâi vâ mâu kăn achê kuăn pơlê tâ tung mâu tơdroăng ‘na tơnêi ki kân tâ la ôh tá ối râ tơring mê Khoa hok Kŏng ngê̆ pơ’lêh nếo, hriăn plĕng ki nếo ƀă pơ’lêh kơxô̆ cho troăng hơlâ pêi pro. Kong pơlê kô pơtối ‘no liăn pro tơmeăm khoăng, ‘na kuăn mơngế kô ai môi roh mơhnhôk thế mâu kăn ƀô̆ kong pơlê lăm troh a mâu cheăm, bêng. Pakĭng mê xuân tơ’mot hên ngế ing pa kong ƀă xuân xúa ki rơtế ƀă, veăng gum dêi khu mơdró tung kong pơlê”.

Hneăng ki nếo, Dak Lak pơkâ pêi tâk châ 10,5%  ngăn a rế hên mơngế pêi cheăng rơkê khât, mơnhông khoa hok – kŏng ngê̆ pơ’lêh hriăn plĕng ki nếo ƀă pơ‘lêh kơxô̆, ‘no liăn pêi cheăng tơdâng tơ’mô  tơmeăm khoăng vâ po rơdâ tơrŭm tung kơpong.

Tơdrêng ƀă mâu kăn, kuăn pơlê ƀă khu mơdró a kong pơlê xuân hlo nhên, pơla hơnăm 2025-2030 Dak Lak ôh tá xê to tí tăng hriăn mơjiâng tơmeăm khoăng vâ mơnhông la tơdroăng ki kal tâ cho po rơdâ tuăn tơmiât. Jâ Ngô Tường Vi, Ngế pơkuâ Grup tê rôe tơmeăm ăm kong têa ê krui kơxái Chánh Thu, tối  kô tá mâu tơmeăm ki klâi kong prâi tơniăn ăm pêi châ lo ƀă mâu troăng hơlâ ki nếo, tơdroăng pơkâ, luât nếo:

“Tơdroăng ki kal cho thế ngăn pêi chiâk môi tiah kơvâ cheăng kâ ki rơkê – ngăn a kong ngê̆, ki pơxúa ƀă ki kal tơmeăm pê lo dêi Dak Lak châ tê hơngế tâ, chiâng tơdroăng ki hâk tơngăm dêi tơmeăm pê lo ing chiâk deăng Việt Nam’’.

Ƀă tơdroăng pêi cheăng tơƀrê, Dak Lak kô hlối mơnhông cheăng na khoa hok, kong ngê̆ ƀă pơ’lêh kơxô̆, hlối mơnhông ‘no liăn pro troăng prôk. Pôa Tạ Anh Tuấn, Kăn hnê ngăn Vi ƀan kuăn pơlê dêi kong pơlê Dak Lak ăm ‘nâi, tung pơ’lêh kơxô̆ - tơmeăm khoăng cho ‘’xiâm mơhnhôk pêi‘’ mê troăng prôk kô châ mơhnhôk pêi tơdrêng vâ mơnhông cheăng kâ rêh ối pơlê pơla:

“Kong pơlê tơkŭm liăn vâ pro klêi mâu troăng prôk xiâm malối cho troăng kân tơdrăng lĕm ki tơdjêp Peăng mâ hâi Lo - Peăng mâ hâi Lu dêi kong pơlê, tơdjêp ƀă kơno tuk ƀă plông tơraih tơƀai xuân môi tiah tơdjêp ƀă troăng kân tơdrăng Buôn Ma Thuột - Vân Phong ƀă tơmeăm khoăng ki pro hdrối, môi hvêa prôk kô po troăng tơ’lêi vâ mơnhông tơƀrê nếo ƀă po troăng vâ pro tơmeăm khoăng ki ê”.

Ƀă mâu tơdroăng mơhnhôk mơnhông tơƀrê mê dế thâ pêi vâ rĕng kêi, la mâu rôh ki kân cho ‘no liăn mơjiâng pro tơmeăm khoăng – tê mơdró a Dak Lak dế châ po rơdâ. Pôa Lê Đức Huy, Kăn hnê ngăn Hô̆i đong mâu ngế cheăng tung Kong ti pêi cheăng tiô rơnó Môi tung khu Tê rôe tơmeăm kong têa ê lơ 2/9 Dak Lak, tối:

“Ngin loi khât kô djâ Dak Lak mơnhông luâ tâ tung chal nếo malối cho mâu tơdroăng cheăng pêi tơƀrê. Má môi mâu tơmeăm khoăng mơjiâng pro kô mơnhông mâu tơmeăm khoăng ki tơdjêp ƀă Peăng mâ hâi Lo - Peăng mâ hâi Lu vâ mơnhông ‘na pêi cheăng uâ pơliê pro tơmeăm rế rơdâ tâ, mâu Tíu pêi cheăng ƀă kơmăi kơmok, mâu kơno tuk a kĭng tơnêi xuân môi tiah mâu Kơno tuk a têa kơxĭ vâ châ xo chơ mâu tơmeăm pê lo ing chiâk deăng ƀă ká xi xŏng dêi Tây Nguyên lăm tê hlối ƀă troăng têa kơxĭ a peăng mâ hâi Lo Dak Lak”.  

Klêi hôp kân Đảng ƀô̆ kong pơlê, Dak Lak ôh tá xê to tối ‘na ‘’Pơkâ kơxô̆ pê lo’’ mê dế mơhnhôk pêi cheăng khât, vâ châ tơƀrê nếo – tíu pêi pêi chiâk deăng, cheăng ƀă kơmăi kơmok ƀă têa kơxĭ rơtế ƀă dêi rơpó chôa mơnhông tơƀrê. Drêng tơdroăng pơkâ châ pơ’lêh nhên ƀă tơdroăng pêi pro, drêng tuăn vâ pêi tơƀrê tơbleăng troh tơ rêm ngế kuăn pơlê ƀă khu mơdró, Dak Lak kô ôh ti xê to xiâm kơphế, mê ối cho vâ pơtih ki môi kơpong tơnêi dế mơnhông tơná xông rơdêi ing tơbăng ngo troh a têa kơxĭ kân.