Tung môi toăng hngêi tâl ki tiah hmâ, tơdrăng lĕm, pôa Kơ Să Ha El rah xo kơbong ki a tơdế, cho leăn vâ kơtúa um Pôa Hồ ƀă hên mâu ƀăng kơdeăn khĕn, tung mê, ai Mê dai 30 hơnăm Đảng. Pôa hiăng pêi hên tơdroăng cheăng ki kal dêi pơlê cheăm, hdrối nah, hiăng pro Kăn pơkuâ hnê ngăn Đảng ủi cheăm Dà Chais, klêi mê, Kăn hnê ngăn Kuăn pơlê pêi chiâk tơring Lạc Dương. Pôa pro Phŏ Hnê mơhno cheăng kal kí dêi Khu pơkuâ hnê ngăn cheăng Đảng tơring Lạc Dương, kong pơlê Lâm Đồng ton nah, ƀă hiăng pơtê cheăng ing hơnăm 2022.

Ƀă tơdroăng ki rơkê hnối châ kuăn pơlê loi tơngah, drêng vêh pơtê a pơlê, pôa Kơ Să Ha El pơtối châ rah xo pro Kăn pơkuâ hnê ngăn Chi ƀô̆ thôn Dà Blah, cheăm Lạc Dương. Pôa hơniâp ro hơ’muăn tối ‘na tơdroăng ki pơhlêh dêi pơlê cheăm.

“Hdrối nah, kuăn pơlê a tíu kố kơtiê xahpá pá ó khât, ôh tá ai troăng prôk, tơdroăng pêi chiâk pêi deăng xuân ôh tá rơhéa. Troh a hơnăm 1992, kơnôm khu kăn pơkuâ hnê ngăn ai tơdroăng gum hdrê loăng kơphế, ing mê hiăng pơhlêh phá tơ-ê tung tuăn tơmiât dêi vâi krâ-nhŏng o. Ngin mơhnhôk, krếo thế vâi krâ-nhŏng o ôh tá ko ‘nhê kong, mơhnhôk kuăn pơlê pêt hdrê loăng kơphế, loăng plâi hồng, păn hên kơpôu ro vâ kơ ai kế tơmeăm, liăn ngân”.

Klêi kơ’nâi pêi pro Hnoăng cheăng xiâm tơnêi têa mơjiâng thôn pơlê nếo, rơpŏng đảng viên Kơ Să Ha El djâ troăng ahdrối. Pôa hiăng rơtế ƀă khu lăm tối  mơhnhôk kuăn pơlê ai tuăn ‘nâi rơdâ, veăng pleăng dêi tơnêi kơdrum tơná pro troăng, mơjiâng mâu tơmeăm khoăng ki pro pơxúaa ăm kuăn pơlê. Ki nhên, rơpŏng pôa hiăng pleăng dêi lối 20 met tơnêi kơnâ châ rơtal liăn vâ tơnêi têa ‘mâi rơnêu, bro tơ’nôm i lĕm troăng kân tơnêi têa kơxô̆ 27C. Dế kố, tơnêi têa ối pơkâ thế po rơdâ têa tum Rơhoa, rơpŏng pôa hiăng pleăng dêi 2 sao tơdế tơnêi deăng kơphế.

Ƀă hiâm mơno ki djâ troăng, pêi pro ahdrối ƀă mâu tơdroăng ki pleăng tơnêi, rơpŏng pôa Kơ Să Ha El, mơngế đảng viên hiăng djâ troăng bâ eăng tung pơlê pơla, tơdjuôm ivá mơjiâng thôn pơlê nếo ƀă kơhnâ khât tung pêi chiâk pêi deăng vâ mơdêk tơdroăng rêh kâ ối nếo. Hơnăm nah, tâng vâ riân ngăn tơdroăng pêi cheăng kâ dêi thôn Dà Blah, rêm ngế pêi kâ châ lo 45 rơtuh liăn. Tung thôn ki kố ôh pa ai rơpŏng kơtiê, bu ối iâ rơpŏ ng ki vâ chê kơtiê. Jâ Cil Pam K’Quyên, Kăn pơkuâ hnê ngăn Chi ƀô̆ thôn Dà Blah, cheăm Lạc Dương tối ăm ngin ‘nâi:

“Ƀă ngin, pôa Kơ Să Ha El cho ngế ki djâ troăng bâ, cho ngế ki pêi pro ahdrối, prôk ahdrối. Pôa cho ngế ki loi tơngah khât dêi kuăn pơlê ‘na tơdroăng cheăng dêi Đảng, rơkong tơpui dêi pôa hên ngế rơhêng vâ tơmâng, kuăn pơlê hmâng ƀă pêi pro ƀối”.

Cheăm Lạc Dương dế kố xua tơ’mot 3 to cheăm hdrối nah, cho Dà Sar, Dà Nhim, Dà Chais dêi tơring Lạc Dương. Tâi tâng tơnêi kong kế akố vâ chê 830 km karê. Lạc Dương hiăng chiâng cheăm ki kân rơdâ má môi dêi kong pơlê Lâm Đồng, pơ’leăng mâ mơngế kuăn ngo ai lối 82%. Pôa Ya Tiong-Kăn pơkuâ hnê ngăn Đảng ủi cheăm Lạc Dương tối ăm ngin ‘nâi, hneăng hơnăm 2025-2030, cheăm pơtối mơdêk ivá cheăng chiâk deăng cho hnoăng pêi pro ki xiâm, ki tơpôu râng tơdroăng rêh ối-cheăng kâ, klêi mê, po mơjiâng mâu tơdroăng ôm hyô vâ pơhlêh túa cheăng kâ, tê mơdró lo liăn tiô chal nếo. Vâ châ ƀlêi chiâng hnoăng cheăng tiô Tơdroăng pơkâ dêi Đảng, pơtối mơdêk tơdroăng rêh ối cheăng kâ dêi kuăn pơlê, cheăm hiăng thăm mơnhông hnoăng cheăng, pôu râng mâu tơdroăng cheăng dêi rêm ngế cheăng tung Đảng ủi, thăm mơdêk hnoăng cheăng ki rơkê tơtro djâ troăng ahdrối, pêi pro ahdrối dêi mâu ngế đảng viên tụng pơlê cheăm ai mơngế kơdrâm mơngế kuăn ngo.

“Thôn pơlê ki kố ai hên mâu ngế đảng viên ki hiăng hên hơnăm, ki rơhêng vâ tối trối pôa Kơ Să Ha El, maluâ pôa hiăng pơtê cheăng tiô tơdroăng pơkâ dêi tơnêi têa, laga nôkố, xua tơdroăng ki pôu râng hnoăng cheăng, xua hiâm mơno mơjo pâ nhŏng o, pơlê pơla, mê pôa xuân ối pơtối pleăng dêi hnoăng cheăng tơná ƀă khu kăn pơkuâ hnê ngăn pơtối dêi hnoăng mơnhông pêi cheăng kâ-rêh ối pơlê pơla dêi Lạc Dương kố”.

Pôu râng dêi hnoăng cheăng, tá tuăn tá mơno dêi đảng viên Kơ Să Ha El hiăng thăm mơnhông krá kâk hiâm tuăn dêi kuăn pơlê ƀă Đảng, ing mê, lân rơdâ ăm tơdroăng ki mơnhông mơdêk, tơdjiuôm ivá mơjiâng pơlê pơla Lạc Dương, kong pơlê Lâm Đồng rế hía rế châ xông tơtêk.