A Hngêi mơhno túa lĕm tro ƀuôn Mduk, bêng Ea Kao, kong pơlê Dak Lak, lối chât ngế kuăn pơlê krâ ai, hdrêng ai châ mâu đoàn viên, hlối cho tôh viên tôh kong ngê̆ kơxô̆ pơlê pơla mơeăm hnê túa ki chêh tài khoản VNeID. Kơ’nâi cài đặt hiăng klêi, rêm ngế tiê kơmăi, chêh pro mâu tơdroăng kal sap ing mâu mơéa krê tung ứng dụng. Jâ H’Mai Mlô, môi ngế kuăn pơlê tung pơlê, tối:

“Hdrối nah tá hâi châ mâu vâi muăn hnê ăm mê xuân tôu tuăn khât, xua á ôh ti ‘nâi ki klâi ôh, mê nếo nhăng piu. Nôkố hiăng chêh mâu tơdroăng kal tung kơmăi. Hlo tơná hâi piu khât, la dế hriâm choâ ‘lâng”.

Ing mâu rôh hriâm pơhlêh kơxô̆” môi tiah kố hiăng chiâng hmâ a hên bêng, cheăm dêi Dak Lak, sap ing kong pơlê tơbleăng pêi 100 hâi “Hnê kuăn pơlê hriâm pơhlêh kơxô̆” sap ing tơdế khế Pah. Lối 2 rơpâu tôh kong ngê̆ kơxô̆ pơlê pơla hiăng châ mơjiâng, ƀă lối 3.500 ngế kăn ƀô̆, đoàn viên, mâu ngế ki pleăng dêi hnoăng hơnăm ối nếo hbrâ rơnáu tơgôu rêm hngêi, râng kŏng hnê cheăng”, vâ gum kuăn pơlê hmâ ƀă kong ngê̆.

Ôh ti xê pơtê to a tơdroăng “hnê chư” po tăng mâu tơdroăng ki apoăng, mâu tôh kong ngê̆ kơxô̆ pơlê pơla ối po ăm mâu rôh hriâm pơhlêh kơxô̆ a hngêi mơhno túa lĕm tro thôn, pơlê lơ tíu pêi cheăng dêi cheăm. Kuăn pơlê djâ phôn râng kŏng troh, châ hnê ăm túa ki cài đặt ƀă xúa mâu ứng dụng chêh mâu tơdroăng a tíu cheăng, tăng ngăn tơdroăng ‘na tơnêi tơníu, nâp liăn on tơhrik điê̆n tưh, mơdrếo liăn mâ. Ngoh Y Sion Knul, ngế ki pơkuâ ngăn Đoàn cheăm Ea Na, kong pơlê Dak Lak, ăm ‘nâi:

“Tơdjâk troh ‘mot tơkŭm, vâi krâ kuăn pơlê tôu tuăn khât drêng chêh pro mâu mơéa, hồ sơ mơéa. Ngin gum vâi tung tâi tâng mâu tơdroăng ki kố, ing nâp hồ sơ a tíu dịch vŭ công troh xúa VNeID dêi Khu xiâm ngăn Kŏng an. Malối ƀă vâi krâ kuăn pơlê hdroâng kuăn ngo, cheăng kố châ tŏng gum đi đo, vâ kơdroh hâi prôk lăm ăm vâi krâ kuăn pơlê”.

Rơtế prôh ƀă khu ki pleăng dêi hnoăng, hên khu mơdró kâ viễn thông ki kân xuân veăng gum ivá ăm tơdroăng “Hnê kuăn pơlê hlâ ‘na tơdroăng pơhlêh kơxô̆”. Mâu tíu hriâm châ krâ ‘măn mâu kơmăi kơmok, troăng kơxái pơtroh, phần mềm AI ki tơ’lêi hlâu, tơ’lêi xúa, gum kuăn pơlê po ngăn ƀă pro rĕng tâ. Pôa Nguyễn Văn Thản, phŏ kăn pơkuâ VNPT Dak Lak, tối:

“Ngin hiăng pơtroh kăn ƀô̆ veăng tung mâu tôh kong ngê̆ kơxô̆ pơlê pơla a bêng, cheăm, thôn, pơlê, tôh kơphô̆. Rơtế ƀă khu kăn pơkuâ cheăm, pơlê ngin hiăng po mâu lâm hnê hriâm kih năng kơxô̆ ăm kăn ƀô̆, kong chưk, viên chưk, vâ vâi hnê ăm kuăn pơlê ƀă khu mơdró kâ. Ki xiâm cho vâ rêm ngế kuăn pơlê pơrá chiâng vâ pêi, hlê ƀă xúa mâu tơdroăng ‘na pơhlêh kơxô̆ tung rêh ối rêm hâi”.

Pôa Bùi Thanh Toàn, Kăn pơkuâ Khu ngăn Khoa hok ƀă Kong ngê̆ kong pơlê Dak Lak, ăm ‘nâi: 100 hâi hnê ‘na pơhlêh kơxô̆ cho hvêa prôk ki apoăng vâ pơhlêh kơxô̆ chiâng tơdroăng ki hmâ rêm hâi dêi rêm ngế kuăn pơlê. Drêng hiăng ‘nâi po ngăn, ‘nâi xúa, ‘nâi chêh pro ing troăng hyôh internet, mâu troăng hơlâ pơkâ pêi ki nếo gá kô troh ƀă kuăn pơlê, ôh ti lôi kơbố ki lâi pa rŏng.

“Ngin hiăng xoăng mâu khu ngế ƀă tơbleăng pêi tơdroăng cho 100 hâi. Ki xiâm cho vâ hnê ăm kuăn pơlê ‘na kih năng, túa ki rơkê plĕng ‘na pơhlêh kơxô̆, ôh ti xê to a kơpong tíu pêi cheăng mê ối tơdjâk troh kuăn pơlê hdroâng kuăn ngo kơpong hngế hngo. Drêng hiăng hmâ ah, kuăn pơlê kô ‘nâi xúa mâu tơdroăng tung kơmăi tĭnh vâ pro mâu tơdroăng cheăng kâ, tê mơdró ƀă chêh pro mâu mơéa gá kô tơ’lêi hlâu tâ”.

Sap ing mâu rôh “râng kŏng hnê cheăng” troh tơhrâ dêi kăn pơkuâ ƀă khu mơdró kâ, tơdroăng ki hnê ăm kuăn pơlê ‘na pơhlêh kơxô̆ dế gum kong ngê̆ ôh ti phá tơviah xếo ƀă rêm ngế kuăn pơlê. Ƀă klêi rêm hâi, a Dak Lak ai tơ’nôm hên ngế chiâng rơkê ‘na pơhlêh kơxô̆, pro chiâng môi pơlê pơla ‘nâi xúa pơhlêh kơxô̆ tŭm têk, rơkê ƀă tơƀrê. Kố cho tơdroăng ki apoăng vâ kong pơlê mơjiâng kăn pơkuâ kơxô̆, pơlê pơla kơxô̆, cheăng kâ kơxô̆.