Kot mâ ƀă xông kân a chê têa krông Dà Rơyồng ki têm rơpiât pá kơdâm ngo Brah Yàng kân krip, pôa K’Brệp (75 hơnăm) châ kuăn pơlê Kala Kròt hâk mơjo pôk pôa pro krâ pơlê. Pôa ối cho ngế ki rơkê, mê khoh châ pôk inâi ngê̆ nhân yân yan ưu tú ‘na tĕn pong, chêa, kơreăng, dĭng, kơtup tiô túa tơlá dêi mơngế K’Ho.

Mâu tơmeăm môi tiah pong, chêa, kơtum, kơtŏn, dĭng, kơtup pro ƀă kơlá, phêa xua kơpeăng kŏng pôa pro ga cho lĕm krá kâk păng ‘nâng, krá lĕm ƀă ai hên túa ngê̆ thuât ki tơtro. Ôh ta xê to tĕn mơjiâng tơmeăm khoăng tung rơpŏng hngêi, mâu tơmeăm ki pôa tĕn mơjiâng mê pơrá châ kuăn pơlê hâk vâ. Hơnăm nah, cheăm ai po lâm hnê ‘na cheăng tĕn pong, chêa ăm mơngế kuăn ngo K’Ho, pôa K’Brệp cho ngế ki hnê vâ chê 100 ngế mơhriâm tĕn. Pôa tối ăm ngin ‘nâi:

“Tơná á hmâ tĕn hên mâu tơmeăm, trối ing pong, chêa, kơtum, kơtŏn, dĭng, kơtup ƀă hên mâu tơmeăm ki ê. Drêng vâi krâ-nhŏng o kal vâ tăng rôe mâu tơmeăm ki mê, á tê tiô tơdroăng ki kal vâ dêi vâi krâ-nhŏng o vâ ai kơxô̆ liăn rêh kâ ối hâi kố hâi tá. Vâ pơtối rak vế cheăng tĕn hmôu, jiâ, mê nôkố, a pơlê cheăm hiăng mơjiâng khu ki tĕn mơjiâng mâu tơmeăm xúa, hriâm dêi pó pơla mâu vâi krâ ki rơkê vâ tĕn mơjiâng mâu tơmeăm ki lĕm mơnâ mâ, krá kâk, tơtro tiô tơdroăng pói rơhêng vâ dêi vâi krâ-nhŏng o, tăng tíu ki vâ tê dêi tơmeăm tê ƀă yă ki tơtro iâ”.

Ôh ta xê to ngế ki rơkê tĕn tơmeăm, mê pôa K’Brệp ối cho ngế ki djâ troăng ahdrối tung mơnhông pêi cheăng kâ-pêi lo liăn ngân, kế tơmeăm. Cho ngế ki apoăng tung thôn ki kố khên pơhlêh tuăn tơmiât tung pêi chiâk pêi deăng, pôa mơ’no dêi liăn ngân pêi pêt, rak ngăn 5 ha deăng kơphế hdrê nếo. Dế nôkố, rêm hơnăm rơpŏng pôa châ xo dêi 12 tâ̆n kơphế kloăng. Pakĭng mê, ối châ xo kơxô̆ liăn ing plâi sầu riêng ƀă plâi ƀơr ki pêt tơvât tung kơdrum kơphế. 2 ha klâng báu châ xo lối 8 tâ̆n báu. Hlo pôa rơkê tung cheăng kâ, hên rơpŏng hngêi tuing thôn pơ’lâng hriâm ƀă pêi pro tuâ bối. Pôa K’BRao, ối a thôn Kala Kròt tối ăm ‘nâi:

“Pôa K’Brệp cho ngế ki djâ troăng ahdrối tung pêi chiâk pêi deăng. Tung tơdroăng pêt ƀă rak ngăn hdrê loăng kơphế, pôa cho ngế ki xúa khoa hok kih thuât tung pêi chiâk pêi deăng ki ahdrối ‘nâi xúa phon rơvât, xúa pơkeăng kơdê oâ hdrong, tôh têa ƀă hên mâu tơdroăng ki ê. Kơnôm tiah mê, kơdrum kơphế dêi rơpŏng pôa hiăng châ dâi lĕm. Tung tơdroăng ki pêt báu klâng xuâ môi tiah mê, pôa xuân cho ngế ki rơkê tung pêi chiâk pêi deăng mê a thôn Kala Kròt pôa cho ngế ki châ xo dêi hên báu má môi. Krâ pơlê cho mơngế ki châ kuăn pơlê loi tơngah, ing tơdroăng rêh ối, tơpui kâ ta troh a túa pêi cheăng kâ”.

Pêi pro Hnoăng cheăng xiâm tung mơjiâng thôn pơlê nếo, pôa K’Brệp-Krâ pơlê cho ngế ki apoăng mơhnŏng pleăng dêi tơnêi vâ pro troăng prôk. Rơpŏng pôa hiăng pleăng dêi lối 300 met karê tơnêi pá ngiâ hngêi, tah lôi kơnâng kâng, klo tah lôi mâu xiâm loăng kơphế vâ po rơdâ troăng prôk tơdjêp pơla mâu thôn. Pôa xuân ối pleăng dêi lối 1.000 met karê tơnêi vâ po rơdâ troăng prôk mot tung kơpong tơnêi pêi chiâk pêi deăng. Pêi pro ƀối pôa, lâp thôn kố rơtế veăng ‘no dêi ivá cheăng, ai ngế ‘nâ pleăng tơnêi, ai ngế veăng pêi, ai ngế gum kế tơmeăm, prêi, xơmong, gât vâ pro thôn pơlê. Lâp thôn hiăng veăng tơlo dêi lối 600 rơtuh liăn vâ pro troăng ƀê tong, mơjiâng pro mâu tơmeăm ki hdoăng têa krúa lĕm.

Pôa K’Brèo, ối a thôn Kala Kròt tối ăm ngin ‘nâi: ing tơdroăng ki loi tơngah dêi krâ pơlê mê troh nokố, tâi tâng mâu troăng prôk tơdjêp, tơkoh pơla mâu thôn pơlê pơrá pro mơjiâng krá kâk lĕm:

“Hdrối nah, troăng prôk tung thôn pơlê a rơnó mêi hngêi kố to tơnêi trâp, a rơnó tôu mơdrăng troăng to kơtâk kơlung kơlăng, prôk lăm pá puât, maluâ tơdroăng ki pơto mâu báu, alâi, pôm, plâi djiân troh a hngêi. Chôu phut kố, hiăng ai troăng ƀê tong krúa lĕm, tơdroăng chơ kơphế, ƀơr, sầu riêng ga tơ’lêi hlâu ƀă tơniăn, kế tơmeăm pêi lo châ pơto ƀă châ tê mơ’no dêi hlâu hlĕng”.

Pakĭng tơdroăng ki mơhnhôk mơjiâng thôn pơlê nếo, krâ pơlê K’Brệp ối kơhnâ khât tung tơdroăng hnê tối ‘na troăng hơlâ, troăng tơdjâ dêi Tơnêi têa; veăng lăm tơleăng tơdroăng ki tơhôu tơhêng tung pơlê pơla. Pôa K’Hữu, Kăn ƀô̆ cheăm Bảo Thuận, kong pơlê Lâm Đồng tối ăm ngin ‘nâi, krâ pơlê hiăng veăng gum kal kân khât tung tơdroăng gum ăm pơlê rak vế krá tơniăn tơdroăng ki mơjiâng troăng hơlâ tiô túa lĕm tro:

“Pôa K’Brệp-Krâ pơlê cho ngế ki châ kuăn pơlê loi nhoăm ƀă ai tơdjâk hên rêm tơdroăng ăm pơlê pơla. ‘Na tơdroăng ki mơhnhôk vâi krâ-nhŏng o rak vế, pêi pro mâu tơdroăng ki mơjiâng thôn pơlê nếo, pôa cho ngế ki ai rơkong tơpui, djâ troăng ahdrối tung tơdroăng pro mơjiâng troăng prôk, mơjiâng tíu hdoăng têa, kơnôm tiah mê, ngiâ méa thôn pơlê rế hía rế lĕm krúa, mâu troăng hơlâ tung thôn pơlê hiăng tơdrăng, tơbăng lĕm. Pôa ối cheăng tung Hô̆i đong Giáo xứ Kala cho Kăn Hô̆i đong, rơkong tơpui dêi pôa tung hngêi khôp xuân châ pơtroh ăm vâi krâ-nhŏng o, xua mê, tơdroăng ki mơnhông thôn pơlê nếo, mơjiâng tơdroăng rêh ối nếo châ rak vế, pêi pro kơhnâ krâu khât ƀă hiăng châ tơƀrê păng ‘nâng”.

Ƀă tơdroăng ki châ kuăn pơlê loi tơngah ƀă hiâm mơno dêi tơná, mê pôa K’Brệp-Krâ pơlê dế rak vế ƀă pơtối mơnhông hnoăng cheăng dêi kuăn ngo K’Ho, ƀă veăng gum pro pơhlêh hên ngiâ méa thôn pơlê Kala Kròt. Pôa tơxâng cho tíu ki hngiân ‘na hiâm tuăn, cho ngế djâ troăng ahdrối vâ kuăn cháu pêi pro ƀối tiô kơ hnoăng mơjiâng, mơnhông thôn pơlê rế hía rế phâi tơtô ƀă tơniăn hơniâp.