Hâi mơ’nui măng tĭng, kơpong long klê Nhà thiếu nhi kong pơlê Dak Lak hơniâp ro tâ mâu hâi tiah hmâ. Idrâp tó tơvât ƀă idrâp têa rơlâu rơlŏn choâ ‘lâng drêng vâ chê 100 ngế o kŭn hâk vâ veăng tung hneăng hriâm ƀă inâi “Hbrâ mơdât klâk têa ƀă tro rong râ ăm vâi hdrêng”. O Nguyễn Phan Phương Linh, 12 hơnăm a cheăm Ea Knuêč hâk ro tối:

“Tơkâ luâ mâu lâm hriâm ƀă châ hriâm tâp ‘na mâu kih năng a tíu klê têa mê á hlo tơná á hiăng khên tơnôu tâ drêng klêh tung têa ƀă ‘nâi mâu kih năng vâ rak vế dêi châ chăn tơná ƀă pú hmâ tung têa”.

Ôh ti xê to a kơpong tíu xiâm, mâu tơdroăng hnê klê têa, hbrâ mơdât klâk têa ối châ po rơdâ troh kơpong hngế hngo dêi kong pơlê Dak Lak. A cheăm Ea M’Droh, tung rơnó pơtê hriâm hơnăm kố, Kâu lak ƀô̆ Xua mâu vâi o pâ nhuô̆m (ối tung tơdroăng pleăng dêi hnoăng tơnêi têa kơpong Tây Nguyên) hiăng tơbleăng po 2 rôh hnê klê tê kơtê ƀă mâu lâm hriâm châ po a mâu thôn, pơlê. Ngoh Mai Văn Chuyền, Pơkuâ Kâu lak ƀô̆ ăm ‘nâi, ƀă túa pơkâ djâ ƀêh klê ukố umê vêh troh a tíu kuăn pơlê ối, tung 5 hơnăm hdrối nah, kâu lak ƀô̆ hiăng tơrŭm ƀă kăn pơkuâ kong pơlê tơkŭm hnê klê tê kơtê ăm vâi hdrêng.

“Lâm hriâm kố ôh ti xê tơ’mot to vâi hdrêng veăng mê ối tá tơdroăng ki tơmâng ngăn dêi nôu pâ, veăng tung mâu rôh thưk hanh mâu kih năng ki pơlât tơdrêng drêng hlo ngế klâk têa. Mâu tơdroăng ki hlê plĕng kố gá kal pơxúa khât ƀă teăm ăm mâu nôu pâ ƀă kuăn pơlê kong pơlê. Ngin rơhêng vâ tiah kố kô châ xo hên tơdroăng tơmâng ngăn dêi mâu vâi nôu pâ, mâu vâi o tá pơlê pơla troh tơdroăng tơdjuôm ivá hbrâ mơdât klâk têa”.

Ôh ti hnê to kih năng, mâu lâm hriâm kố ối cho tíu vâ hdrêng hriâm pât ivá, tơdroăng khên tơnôu, tơrŭm ƀă vâi pú, mơnhông châ chăn ƀă ăm vâi lôi ối hngế ing mâu kế tơmeăm điê̆n tưh tung mâu hâi pơtê ki tôu kơxô. Malối, ƀă mâu túa ki châ hmâ achê, xo vâi hdrêng pro tơdroăng ki xiâm, mâu thái cô cho kih năng sống hiăng gum chôu hriâm chiâng hơniâp ro hâk vâ tâ ƀă tơƀrê tâ. Ngoh Phạm Ngọc Anh, thái hnê kih năng sống a cheăm Krông Ana, kong pơlê Dak Lak tối ki hlê plĕng tung hnê:

“Ƀă vâi hdrêng tung hơnăm ki kố mê mâu vâi hdrêng bu hâk vâ ro drêng ro mê vâi rĕng hlê. Hdrối vâ mot tung ƀai hnê, á kô tơkŭm mâu vâi o tơpui hơniâp ro hdrối vâ mâu vâi o pơxiâm hriâm, mâu vâi o hmâ achê ƀă pin ƀă mâu vâi o kô tơmâng troh ƀai hnê tâ. Klêi hiăng tối mâu tơdroăng ki kal klêi mê á kô tơrŭm ƀă mâu vâi o tiô túa ki krếo thế mâu vâi o vêh tối ƀai hnê vâ ngăn vâi hôm tơmâng, chôu pâ há lơ ôh ƀă tơkŭm po mâu tơdroăng xah hêi ki ai pơxúa”.

Tiô riân ngăn, tung 5 hơnăm hdrối, kong pơlê Dak Lak hiăng ai vâ chê 300 ngế hdrêng hlâ xua klâk têa. Krê to sap ing apoăng hơnăm 2025 troh nôkố, kong pơlê hiăng ai vâ chê ngế klâk têa ki hlâ rong, ki hên cho mâu vâi hdrêng a kơpong thôn pơlê. Ing mâu lâm hriâm ki hơniâp ro a long klê troh mâu rôh hnê klê a pơlê cheăm, rêm rôh hnê, cho môi ƀai hriâm, rêm ngế hdrêng châ hriâm mâu tơdroăng ki klê veăng gum ăm mâu rơnó pơtê hriâm tơniăn tâ, hơniâp ro tâ a kơpong hngế hngo dêi kong pơlê Dak Lak.