A mâu hâi ki mơ’nui măng ting, ngoh A Huyền hmâ hnê mâu vâi o, vâi muăn tung pơlê hriâm tôu prôa, tơrưng, tơdrá rơngê, ting ting Rơteăng. Ngoh ối rơtế ƀă nghệ sĩ Đinh Xuân Đề, cho ca sĩ dêi Đoàn Nghệ thuật kong pơlê Kon Tum ton nah) nôkố cho Quảng Ngãi i hnê tối, mơjiâng mâu tơdroăng mơđah hơdruê xuăng ăm mâu vâi o, vâi muăn a mâu cheăm, gum mâu vâi o ai tuăn mơno kâi chân vâ tơ’noăng a mâu tíu ki kân, ki a’ngêi, ki hơngế tâ. Plá on ki gâk git mê đi đo chếo koh kân ‘nâng tung hiâm mơno dêi ngoh A Huyền, mơhno tơbleăng tơdroăng ki hâk mơnâ git khât dêi ngoh ƀă vâi krâ-nhŏng o a mâu pơlê cheăm pin:

“Tơdroăng ki mơjiâng pro mâu khu prôa, tơrưng, klêi mê lăm mơđah, tôu, rêi prôa dêi hdroâng kuăn ngo mê, mơngế tung rơpŏng hngêi, vâi krâ, nhŏng o, mâu vâi o, mâu vâi muăn tung pơlê xuân veăng vâ môi tuăn ƀă hâk vâ păng ‘nâng. Ôh tá xê krê to vâi krâ-nhŏng o mơngế Rơteăng, mê ối ai tá nhŏng o Xuăn, vâ ối têk djâ dêi kuăn ‘nĕng tơná troh akố i hmâng ƀă mơhriâm tôu chêng, tôu koăng, xah hêi tơrưng. Rơpŏng hngêi á hâk vâ, hnối ăm phêp á ‘na tơdroăng ki á hiăng rah xo tơdroăng ki hriăn plĕng, tôu mơđah chêng koăng, tơrưng dêi kuăn ngo tơná. Xua ga, tơná á xuân trối mâu ngế tung rơpŏng, vâi krâ-nhŏng o tung pơlê pói rơhêng vâ châ pơtối rak vế, kring tơrak dêi khôi túa, vêa vong vâi krâ kuăn ngo tơná, vâ la ngiâ ah ôh ta tro hía”.

Tối ‘na ngoh A Bliêt ối a buôn Kon Wang, cheăm Tân Tiến, kong pơlê Dak Lak ngoh hiăng mơjiâng khu tôu chêng koăng-hơdruê xuăng ăm mâu vâi o hok tro, veăng lăm mơđah hên tơdroăng ki kân, môi tiah Leh tơbleăng kơphế Buôn Ma Thuột, Leh tơbleăng plâi sầu  riêng tơring Krông Pač ƀă hên mâu tơdroăng ki ê. Ngoh xuân hiăng chêh bro, mơđah hên mâu ƀai môi tiah “Í rŏng”, “Idrâp chêng koăng pơlê o” hiăng châ kâ pri ki kân drêng tơ’noăng a mâu tơring (hdrối nah), lơ a kong pơlê. 2 ngế kuăn ngoh xuân pơtối rak vế tơdroăng tôu chêng koăng, tôu tơrưng, klŏng put, hơkâ... tiô tơdrá dêi vâi krâ roh nah dêi rơpŏng hngêi:

“Tung 2 khu tôu chêng koăng ai 28 ngế, tung mê, ai 2 ngế kuăn á hiăng veăng mơhriâm ƀă veăng tôu mâu tơmeăm tung khu. Dế nôkố, ai kuăn hơnăm ki hiăng kân dế hriâm hơnăm má 2 hngêi trung Cao đẳng Văn hoá-Nghệ thuật kong pơlê Dak Lak, kuăn á hriâm ‘na piano, pakĭng mê, xuân hriâm tơ’nôm mâu tơrưng, klŏng put, têng nêng dêi hdroâng kuăn ngo”.

Drêng hiăng ai măng xah hô̆i rế hía rế hên, ngoh A Huyền prế A Bliêt xuân hiăng xúa mâu trang măng môi tiah Facebook, Zalo ƀă hên mâu măng ki ê, vâ mơhno tơbleăng dêi tơdroăng ki tơná hiăng hâk git, vâ mơhno tối ‘na i hiâm mơno tơná hâk vâ păng ‘nâng kơ tơdrá chêng koăng, idrâp tơrưng, têng nêng ƀă hên mâu tơmeăm xah hêi ki ê dêi kuăn ngo vâ pơtroh ăm khu rơxông, hơnăm ối nếo. Ngoh A Huyền tối ăm ngin ‘nâi:

“Ki xiâm dêi tơdroăng tơbleăng mơ’no idrâp-tơdrá, mơhno um tiô túa tơlá roh vâi krâ nah a mâu măng xah hô̆i mê cho vâ thăm ăm ai hên ngế tâ nếo ‘nâi, klê, hlê, plĕng ‘na idrâp-tơdrá dêi vâi krâ roh nah, cho tơmeăm khoăng ki dêi kong ngo kân rơdâ, krip tơdrŏm, mê cho idrâp ki hơniâp ro, tơniâ dêi mâu chêng koăng, tơrưng, ƀă mâu prôa ki ê dêi hdroâng kuăn ngo a Tây Nguyên. Á xuân phiu ro ‘nâng, xua ga châ tơƀrê, tơ’mot hên like, hên ngế rơhêng vâ hmâng, vâ ngăn. Tâng vâ tối păng ‘nâng, cho vâ ‘măn hên tâ nếo mâu ƀai ki á hiăng tôu mơđah chêng koăng, tôu tơrưng tâ tung măng xah hô̆i mê xuân kal ai tơ’nôm mâu kơmăi kơmok ki dâi lĕm tâ vâ koai, vâ xup, vâ tâ ‘măn tung măng, vâ tơbleăng mơ’no ăm vâi krâ-nhŏng o i hmâng. Á pơtối mơhnhôk mâu vâi o, vâi muăn tơkŭm rơngê ting ting, kơhnhon xuăng ƀă hên mâu tơdroăng ki ê hía, drêng mê ah, clip ki á tâ ‘măn tug măng kô pro hên mâu vâi krâ-nhŏng o rơhêng vâ ngăn tâ nếo. Pơla hdrối kố nah, xua mâu vâi pú á ai koai clip tiô kơ tơdroăng ki xah koai tiah mê tê, vâi xup um mâu ƀai ki á mơđah tôu tơrưng, tôu chêng koăng, klêi mê, mâu pú hmâ á tâ ‘măn tung măng xah hô̆i. Vâi krâ-nhŏng o hlo ro, ai pơxúa mê vâi hâk há, vâi kơdeăn kheăn, vâi like hên, tơná á xuân hơniâp ro há, xua hiăng tâ mâu clip ki tơná á mơđah dêi (tó)”.

Rơtế ai hiâm mơno ki hâk vâ, git khât tơdroăng ki tâ ‘măn mâu clip, mâu um tơná drêng mơđah, rêi, tôu mâu prôa dêi kuăn ngo tơná a trang măng xah hô̆i, mê ngoh A Bliêt ai tối tiah kố:

“Á xuân hiăng tâ ‘măn mâu um dêi mâu vâi muăn tôu tơrưng, mâu tơdroăng ki tôu chêng, tôu koăng, rơngê ting ting, um ki vâi kuăn, muăn xuăng ƀă hên hĕng mâu um ki ê a trang măng xah hô̆i. Laga, xua nôkố, ngin ta hâi teăm ai tơmeăm ki dâi khât vâ koai mê xuân tá hâi teăm tâ ‘măn hên tung măng xah hô̆i. Á pói tơngah a la ngiâ kố ah, drêng á châ tê dêi mâu tơmeăm ki á pro, lơ lăm mơđah hên tíu ki lâi ‘ló, drêng hiăng ai liăn mê á kô mơ’no liăn ngân mê vâ rôe kơmăi ki dâi khât păng ‘nâng vâ xup, vâ koai, rak ‘măn mâu ƀai ki tôu chêng koăng, tơrưng, klŏng put, têng nêng, rơngê, ting ting, kơhnhon xuăng ‘măn tung mâu trang măng xah hô̆i ƀă tơdroăng ki xiâm cho vâ mơhno tơbleăng túa lĕm tro tiô khôi hmâ dêi hdroâng kuăn ngo Rơteăng troh ƀă vâi krâ-nhŏng o ki hmâ ngăn măng, mâu nhŏng o tung mâu kopong ki ê pơrá châ ngăn, chiâ hlo, châ ‘nâi”.