Tơdroăng tơkêa bro 8 ‘na tơpui kâ ‘na pơla kơdrâi kơnốu tung tơdroăng Pơkâ dêi Tơnêi têa, mơhno ki tơmâng khât dêi Đảng ƀă Tơnêi têa. Pơla hơnăm 2021-2025, Tơdroăng tơkêa bro 8 hiăng pêi hlo hên tơbrê. Tơdroăng rak ngăn ƀă tơkŭm pêi châ tơbleăng rĕng, ƀă tơdroăng mơjiâng Khu pơkuâ tơdroăng Tơkêa bro ing Xiâm tơnêi têa troh râ kong pơlê a tâi tâng mâu cheăm bêng. Tíu xiâm tơnêi têa hiăng pơkâ 17 hlá mơ-éa hnê ƀă tơkŭm pêi séa ngăn, tah tơdroăng ki pá, tơvân tơvân teăm tơdrêng.

Kơxô̆ liăn pêi cheăng mơhnhôk tăng châ hên, ƀă kơxô̆ liăn xo vâ pêi cheăng vâ chê 2.000 rơtal liăn, ki hên xo ing Tíu xiâm. Hên tơdroăng pơkâ ki xiâm tơdjâk troh mơjiâng tôh tơbleăng hnê tung kuăn pơlê, kâu lak ƀô̆ dêi tơdroăng pơ’lêh ƀă mơnhông ivá pêi cheăng ăm mâu kăn ƀô̆ kuăn ngo kơdrâi ki pêi châ tơƀrê ƀă luât pơkâ. Mâu túa pêi cheăng “Tíu nhoăm loi” hiăng pơtối rak ki pơxúa, thăm nếo kum tá kơnốu tung mâu tơdroăng pêi pro ki tơdjâk troh.

Mơhé ai mâu tơdroăng hiăng tơƀrê, tơdroăng pêi tơdjuôm tung mâu tơdroăng tơkêa pro tơkŭm ƀă mâu ki ê dêi Tơdroăng Pơkâ Tơnêi têa kơpong kuăn ngo ƀă kong ngo xuân dế trâm hên tơdroăng “xơpá tơvâ tơvân’’ kal châ hlo tơdrăng. Mê cho ki pá tung xing xoăng ƀă xúa liăn ngân pêi cheăng a kong pơlê; cho mâu tơdroăng ki pá vâ ’nâi nhên ngế ki lâi ƀă tơbleăng pêi tơdroăng kal; cho mâu tơdroăng ki ôh tá tro tung tơdroăng hriâm tâp vâ rơkê plĕng tung pêi cheăng lơ mâu ki pá tung pêi tơdjuôm ƀă mâu tơdroăng tơkêa pro ki ê.

‘Na ki pá tung xing xoăng ƀă xúa liăn ngân, mơhé Khu xiâm ngăn liăn ngân ai Tơbleăng tơdroăng 55 pro hlâu vâ kong pơlê xoăng liăn ngân vâ pêi cheăng, la ki khât gá, hên kong pơlê kơpong kuăn ngo ƀă kong ngo trâm xơpá ‘na kơxô̆ liăn xo, chiâng ai tơdroăng xing xoăng liăn ngân ăm tơdroăng Tơkêa bro 8 hâi ai tiô púi vâ. Mâu tôh hnê tối tung kuăn pơlê, mơhé châ mơjiâng ƀă hriâm tâp, la bú châ xo kơxô̆ liăn iâ, ôh tá ai tŭm liăn vâ pơtối pêi cheăng tro khât. Tơdroăng pêi pro pơlê pơla vâ mơhnhôk tơ’nôm liăn xuân ối hên xơpá, hâi ai tiô tơdroăng púi vâ.

‘Na mâu tơdroăng ki tŏng gum kơnốu ƀă kơdrâi mot tung mâu tơdroăng tơkêa chiâng tơdroăng ki ê, sap ing tơdroăng ki rơkê plĕng tiâ mơnhên troăng hơlâ, Tiê̆n sih Phạm Thái Hưng ăm ‘nâi: mâu hlá mơéa hnê mơhno dêi Tơnêi têa ƀă kong pơlê tá hâi châ tơtrŏng khât troh tơdroăng kố tiô túa ki tŭm têk.

“Tung vâ chê 200 kơlo kơxô̆ pơkâ mơ’no dêi tơdroăng pơkâ dêi Tơnêi têa, ai troh 71 kơlo kơxô̆ pơkâ thế kal klâ xoăng tiô kơnốu ƀă kơdrâi, la tơdroăng pêi pro ki khât xuân ối cho tơdroăng ki xơpá. Tơdroăng kố pro ăm cheăng mơdêk pro tơdâng tơ’mô pơla kơnốu ƀă kơdrâi tung kơpong hdroâng kuăn ngo, ki hiăng ôh tá tơniăn, mê chiâng rế ôh tá tơniăn tâ nếo vâ pêi châ tiô pơkâ môi tiah cheăng tung la ngiâ tơnêi têa mơ’no”.

Xuân tiô Tiê̆n sih Phạm Thái Hưng, vâ pêi tơƀrê tơdroăng tŏng gum pơla kơnốu ƀă kơdrâi, rak vế tro mâu tơdroăng pơkâ pêi ‘na pro tơdâng tơ’mô pơla kơnốu ƀă kơdrâi dêi Pơkâ 88 Kuô̆k hô̆i ƀă Cheăng tung la ngiâ tơnêi têa, kal ai mâu tơdroăng ki pơhlêh tung tơdroăng tơpui tơno, hmâ achê. Tung mê, kal tŏng gum kơnốu ƀă kơdrâi mot tâi tâng tung mâu pơkâ kân ƀă tơdroăng pơkâ kŭn dêi Tơdroăng pơkâ pêi dêi tơnêi têa. Tơdroăng kố pâ thế hnê mơhno nhên ‘na troăng hơlâ tŏng gum liăn ngân ƀă túa pêi, sap ing Ƀơrô cheăng Tơdroăng pơkâ dêi tơnêi têa ƀă Vi ƀan Hdroâng kuăn ngo. Kal pơhlêh nếo cheăng hnê mơdêk ivá pêi cheăng. Pơhlêh sap hnê hriâm iâ khế chiâng túa pơkâ mơdêk ivá pêi cheăng tiô hâi khế pơkâ, tơtrŏng troh tơdroăng ki ai khât ƀă ki rơkê. Pakĭng mê, kal thăm pro ƀă um tơvi ngăn a kuăn pơlê; Vêh mơnhên tơdroăng ki kal ‘no liăn pêi cheăng ƀă pơtối rak vế ƀă po rơdâ mâu túa pơkâ pêi tơƀrê.

Tơdroăng ki pơkâ tơleăng mâu tơdroăng ki tá hâi pêi pro klêi kố ôh ti xê to mơnhông tơƀrê tơdroăng cheăng dêi tơdroăng tơkêa 8 mê ối cho tơdroăng ki kal vâ Tơdroăng pơkâ dêi tơnêi têa kơpong hdroâng kuăn ngo ƀă kong ngo pêi pro châ tơdroăng pơkâ pêi tâi tâng ‘na mơnhông krá tơniăn ƀă tơdâng tơ’mô, ôh tá lôi kơbố ki lâi pa rŏng.