Pơla kong dế tô ó khât, chơ pơla kong dế vâ pơhlêh rơnó, veăng pơlât Khoa Ngoại ‘na pâ ƀă pơlât, pro kơbrĕn  hlối mơdêk vêh lĕm ivá, rak ngăn pơlât ‘na mơhum kuăn ngá ƀă pơlât mâu kơdrâi ki mơhum kuăn ngá- Hngêi pơkeăng tơring Kon Braih, hlo thăm rế hâ ho mơngế. Hơ-ui ‘nâng ‘nâi tơdroăng châi tamo dêi mơngế ki pơlât, ƀok thái pơkeăng cheăng hên kơvâ inâi cho Y Hồng Nga, tơpui chôa, pơ‘lâng pêi khăm ăm tơrêm ngế. Nâ ăm ‘nâi, vâ khăm châ ‘nâi tro tơdroăng châi, pơlât vâ rĕng prêi, tơdrêng ƀă tơdroăng cheăng pêi, ki kal thế mơngế ki pơlât mê môi tuăn loi kơ pin tơpui.

“Á cho môi ngế ƀok thái pơkeăng, á cho mơngế Rơteăng á hlê hên mơngế ki troh lăm khăm pơlât a kố to mâu ki xơpá, la a xuân mơ-eăm pro tơ’lêi hlâu vâ khăm pơlât tơtro ăm mâu ngế ki châi tamo cho mâu kuăn ngo. Cho môi ngế ƀok thái pơkeăng a ‘nâi nhên tơdroăng cheăng tơná ki apoăng thế pê klêi hnoăng cheăng ki râ kơpêng pơcháu, ƀă mơngế châi tamo a di đo ngăn vâi krâu khât, mơ-eăm pơlât i khât vâ vâi rĕng prêi lê̆m ‘’.

Kot mâ tung rơpŏng hngêi ai pâ cho mơngế Rơteăng, nôu cho mơngế Xuêăn ƀok thái Y Hồng Nga hơ-ui ƀă mâu ngế ki tamo cho kuăn ngo. Vâ veăng kum mâu ngế châi tamo tung pơla pơlât, ƀă hnoăng tơná cho kăn hnê ngăn Chi đoân hngêi pơkeăng tơring Kon Braih, Y Hồng Nga, hiăng hnê tối ăm mâu đoân viên tung tíu pêi cheăng mơhnhôk ing hên khu vâ tơkŭm ai khu kum ‘na hmê kâ, hbru hmân ếo tê kơtê... kum mâu ngế châi tamo.

Pakĭng mê, mâu rôh leh tơbâ môi tiah hâi Mơjiâng Đoân Droh rơtăm kŏng sản Hồ Chí Minh lơ 26/3, Hhâ pro tơleăng lĕm Peăng hdroh tơnêi têa lơ 30/4, Hâi mô đô̆i rong râ hlâ hía lơ 27/7...  Chi đoân xuân tơkŭm pêi mâu tơdroăng cheăng tơbâ, veăng kum kuăn pơlê ki xơpá. Điều dưỡng Nguyễn Trần Mỹ Hạnh ăm ‘nâi, tung mâu tơdroăng cheăng dêi droh rơtăm Hngêi pơkeăng tơring Kon Braih đi đo mơhno hnoăng cheăng pêi dêi Kanw pơkuâ hnê ngăn Chi đoân:

“Nâ Nga cho môi ngế ai hiâm mơno lĕm, ‘nâi pêi tâi hnoăng cheăng tơná ƀă mơngế ki tamo. Pakĭng tơdroăng cheăng pêi dêi tơná, nâ Nga đi đo mơ-eăm hriâm mâu tơdroăng ki nếo. Nâ Nga kơhnâ, mơ-eăm pêi ‘nâng tung tơdroăng cheăng Đoân mơhnhôk thế pêi. Nâ Nga cho môi ngế  djâ troăng a hdrối ăm mâu vâi ngoh nâ o tung Chi đoân Hngêi pơkeăng pêi ƀối’’.

Tiô ƀok thái pơkeăng Nguyễn Luận, Phŏ pơkuâ Hngêi pơkeăng tơring Kon Braih tối, xua ôh tá tŭm, ối kal ai 15 ngế Ƀok thái pơkeăng mê tung mâu hâi tro tơná pêi cheăng a Hngêi pơkeăng pêi cheăng tơƀrêi hlối tơchĕng hên tung tuăn ngôa. Ƀok thái pêi cheăng hlối gak ngăn hlối pêi tŭm tơdroăng pơlât ngăn mâu tơdroăng châi sap pơlât ‘na châ chăn klêa kliâm, pâ pơlât mâu rong râ, pơlât ngăn vâi kơdrâi mơhum kuăn ‘nĕng, ‘na vâi hdrêng, klêi mê pơlât tơdrêng mơngế ki râ hlối hnê mơhno pêi ing hơngế ƀă mâu ngế ki tamo râ lơ rong râ hâi teăm troh a hngêi pơkeăng pơlât tơdrêng a mâu hngêi pơkeăng cheăm.

Laga ƀok thái pơkeăng Y Hồng Nga ôh tá xê to pê klêi hnoăng cheăng tơná, mê ối djâ troăng ahdrối tung mâu tơdroăng cheăng pêi dêi hngêi pơkeăng. Ƀok thái pơkeăng Luận, ăm ‘nâi:

“Ƀok thái pơkeăng Y Hồng Nga đi đo tơmâng khât troh ivá khăm pơlât ăm mâu ngế châi tamo, hnê ăm mâu ngế ki tamo ‘na thế rak dêi ivá tơná tung pơla koi pơlât a hngêi pơkeăng  ƀă drêng hiăng vêh ing hngêi pơkeăng troh a hngêi. ‘Na tơdroăng, mơhnhôk cheăng mê Ƀok thái pơkeăng Y Hồng Nga cho môi ngế Kăn pơkuâ hnê ngăn Chi đoân dêi Hngêi pơkeăng kơhnâ khât tung mâu tơdroăng cheăng, malối tung tơdroăng pleăng mơheăm, khăm, pơlât tê kơtê ăm kuăn pơlê’’.

Ƀok thái pơkeăng Y Hồng Nga hiăng ‘nâi ivá pêi cheăng dêi tơná tung tơdroăng khăm pơlât ƀă ai hên ngế mơjo pâ ƀă mâu vâi pú a Hngêi pơkeăng tơring Kon Braih, kong pơlê Kon Tum. Nâ púi vâ kô ai rôh châ lăm hriâm, chuyên khoa I - kơvâ ngăn vâi kơdrâi mơhum kuăn vâ tuăn ngôa tơná rế rơkê plĕng tung pêi cheăng khăm pơlât mâu ngế châi tamo a Hngêi pơkeăng tơring Kon Braih i tro tâ.