Tung mâu hâi vâ chê troh Têt Lo hơnăm nếo 2023, prế on veăng ngoh Trần Ngọc Vũ ối a thôn 10, cheăm Tâm Thắng tơring Čư Jut, tơvâ tơvân lo dêi a chiâk ki kân rơdâ 5 ha dêi rơpŏng hngêi vâ chơ djâ dêi loăng kơnâng, ko dêi hên loăng kơphế tiu pơcháu tơnêi ăm tíu pêi cheăng vâ gu pro troăng. Ngoh Trần Ngọc Vũ tối, châ hnê mơhnhôk, prế on veăng ngoh hiăng vâ pleăng dêi lối 11 rơpâu m2 tơnêi, ko tah 300 xiâm loăng kơphế, 250 xiâm tiu ki dế tung hơnăm ai plâi vâ ăm pro troăng.

Tâi tâng tơnêi ƀă tơmeăm khoăng mê kơnâ vâ chê 2 rơtal liăn. Kố cho tơmeăm khoăng ki kân. Mơhé apoăng prế on veăng tơmiât dêi mơjo khât ‘nâng, tơdroăng pleăng tơnêi pro troăng cho troăng hơlâ dêi Tơnêi têa, mâu tơdroăng ki tơchĕng hên hiăng ‘măn pakĭng.

Ngoh Trần Ngọc Vũ tối:

“Rơpŏng hngêi châ mâu kăn mâu cheăm xuân môi tiah mâu tôh lăm hnê tối ‘tơdroăng thế xĕn tơnêi vâi lăm pôu troh a hngêi hnê mơhnhôk thế pleăng tơnêi vâ pro troăng. Prế on veăng hlo tơlêi hlâu há hlối pơxúa ton ta ah tơdroăng pleăng tơnêi, klêi pleăng hiăng ai troăng prôk kơtâu, kuăn pơlê tơ‘lêi prôk lăm, chơ tơmeăm pêi lo ing chiâk, ngiâ méa thôn pơlê kô pơ’lêh tơƀrê. Hlo ki pơxúa tiah mê má tiâ vâ’’.

Xuân pêi pro tơdroăng pleăng tơnêi pro troăng dêi cheăm Tâm Thắng, ngoh Lê Anh Tuấn ối a thôn 8 hiăng pleăng lối.2.000m2 tơnêi ƀă 50 xiâm loăng kơphế, 70 xiâm tiu.

Riân tâi tâng tơnêi mê ƀă tơmeăm khoăng ki pleăng kơnâ troh 700 rơtuh liăn. Ngoh Lê Anh Tuấn ăm ‘nâi, teăng mâ Vi ƀan cheăm tối nhên tơdroăng Tơnêi têa bú pro tơniăn ing apoăng xing xoăng ăm tŭm kơxô̆ liăn mơjiâng pro troăng, ‘na gu tơbăng tơnêi ôh tá xê mơhno xoăng hdrối.

Xua mê, tâng kuăn pơlê ôh tá vâ hriăn pleăng dêi tơnêi mê troăng prôk ti lâi pro vâ kâi kêi. Sap mâu tơdroăng xơpá mê, rơpŏng hngêi môi tuăn pleăng tơnêi vâ pro troăng:

“Tôh hnê tối mơhnhôk kuăn pơlê tối tơbleăng ki pơxúa dêi tơdroăng pleăng tơnêi ăm pro troăng ƀă mơdêk ki rơdêi ăm cheăm, tơná rơpŏng hngêi pin xuân tơmiât ngăn tro há mê hiăng tiâ vâ. Troăng hngêi pin hdrối nah kŭn to trâp, prôk hlâu, hliâk a rơnó mêi, nôkố Tonêi têa ‘no liăn ăm pro troăng kân hiăng tâ hơniâp ro.

Troăng kân prôk tơkâ luâ mê ngăn ‘nhiê tơmeăm lŭp apoăng la ôh tá tro klâi, xo ah hmôi kố châ tăng liăn hên, tơná tơpŏng hngêi á vâ pleăng tơnêi ăm pro troăng, prôk pơxúa djuôm’’.

Pêi pro tiô troăng rơhlâ dêi Vi ban Hô̆i đong tơring Čư Jut, Vi ƀan tơring hiăng mơhno xing xoăng liăn thế pro troăng pakĭng mâu cheăm xŏn 7,5km, tơdjêp ƀă cheăm Tâm Thắng, pơlê kân Ea T’ling ƀă cheăm Trúc Sơn, troăng pơxiâm pro  ing khế 10/2022 ƀă tối kô pro klêi a hơnăm 2024  mê nếo châ xúa.

Tung pơkâ dêi Hô̆i đong tơring ai tối nhên, ki xơpá ‘na liăn ngân, Vi ƀan tơring bú mơhno ăm tŭm kơxô̆ liăn ki mơjiâng pro, ‘na gu tơbăng tơnêi ăm mâu cheăm, pơlê kân hbrâ rơnáu hnê tối mơhnhôk kuăn pơlê pleăng tơnêi.

Pôa Trần Thế Quang, Kăn hnê ngăn cheăm Tâm Thắng ăm ‘nâi, troăng tơkâ luâ cheăm xŏn 3,2km.

Vâ tơdroăng tơkêa bro tơbleăng pêi tro tiô pơkâ, Đảng ủy cheăm mơjiâng tôh veăng kum tơdroăng cheăng hnê tối mơhnhôk mâu rơpŏng ai tơnêi tung kơpong tơdroăng tơkêa bro veăng pleăng tơnêi vâ pro troăng. Troh nôkố, hiăng ai 57/67 rơpŏng vâ pleăng tơnêi ăm pro troăng. 65% tơnêi hiăng châ gu tơbăng klêi, ối 35% nếo kô châ pêi pro tung la ngiâ. Pơla troăng tơkâ luâ cheăm Tâm Thắng kô pro kêi hdrối hâi lơ 3/2.

Tâi tâng kơxô̆ liăn ki kuăn pơlê pleăng tơnêi châ 12 rơtal liăn. Tơdroăng kuăn pơlê pleăng tơnêi, loăng plâi, tơmeăm khoăng pro troăng dêi kuăn pơlê tung kong pơlê chiâng ‘no xêh ngăn tiô tơdroăng tơdroăng pleăng tơnêi, xiâm loăng ki ko ‘nhiê, tơmeăm pro troăng dêi kuăn pơlê  ngăn tiô kơ mơngế vâ pleăng.

Pôa Trần Thế Quang tối:

“Ngin tối nhên ăm kuăn pơlê hlo drêng mâu troăng nếo pro ăm prôk tơkâ luâ klêi hiăng ai troăng nếo yă tơnêi kô châ mơdêk. Tơdroăng pơkâ dêi Vi ƀan tơring xuân ai luât pơkâ tŏng kum kô chôa pơkâ ăm xúa tơnêi a drêng lâi hlo tơtro, ƀă ôh tá êa nâp mâu liăn drêng pơ’lêh hlá mơ-éa mơnhên xúa tơnêi.

Tơdroăng kố vâ ví tơdroăng ki kuăn pơlê hiăng pleăng tơnêi ôh tá êa thế nâp kơxô̆ liăn ki lâi drêng prôk troăng lơ liăn ki nâp drêng pro nếo hlá mơ-éa mơnhên xúa tơnêi ‘’

Tiô pôa Nguyễn Anh Tú, kăn xiâm hnê ngăn Vi ƀan tơring Čư Jut, tơdroăng pleăng tơnêi, loăng plâi, báu, alâi ƀă tơmeăm pro troăng prôk tung mâu hơnăm hdrối ôh tá xê to hlo a cheăm Tâm Thắng, mê ối hlo hên a mâu cheăm, pơlê kân tung tơring. Tơdroăng kuăn pơlê pleăng chât met karê tơnêi kơnâ chât rơtal liăn pro troăng prôk hiăng ƀă dế veăng ‘no hnoăng pêi pro khât a tơdroăng pơkâ ‘na mơjiâng tơring rêh ối cheăng kâ tiô túa nếo dêi Čư̆ Jut a hơnăm 2025.