Sap ing kơxo má, vâi krâ nhŏng o dêi 3 to pơlê cho ƀuôn Pa, ƀuôn Năng ƀă ƀuôn Hoang hiăng xâp dêi ếo pơtâk hdroâng kuăn ngo tơkŭm vêh troh a hngêi mơhno túa lĕm tro pơlê pơla pơlê Pa – tíu ki tơkŭm po Hâi Leh tơrŭm tâi tâng hdroâng kuăn ngo dêi kơpong kuăn pơlê rêh ối cheăm Čư̆ Prao, tơring MDrak, kong pơlê Dak Lak. Péa pâ troăng cho mâu hlá cơ hơlŏng trĭng dế kơneăng tung khía, idrâp chêng koăng, idrâp hơdruê hơniâp ro rế pro ăm hiâm mơno mơngế rế phiu ro hâk vâ tâ. Ai mâ a hngêi mơhno túa lĕm tro ƀuôn Pa sap ing kơxo má, pôa Y Li Niê, kăn ƀuôn Hoang tối:

“Nôkố hiăng ro, pái to pơlê tơkŭm môi tíu hlo phiu ro khât, rế châ hmâng ƀai hơdruê, xoâng, tŏn chêng koăng, ai drôu xiâm, rế vâ rôh nhŏng o châ trâm rơtế ƀă dêi rơpó ôu drôu xiâm”.

Nếo kơhnhon xuăng klêi ƀai kơxuâng dêi tơná, nâ H’Nhuyn Ksơr a ƀuôn Năng, cheăm Čư̆ Prao ăm ‘nâi, hâi kố khu ki kơhnhon xuăng dêi pơlê phiu ro xua châ xuăng ăm vâi krâ nhŏng o ngăn. Hlo vâi krâ nhŏng o troh hên, hâk vâ ngăn tơrêm kơ mâu ƀai hơdruê, xuâng dêi khu, mê tơdroăng ki phiu ro rế hlo tâk hên tâ:

“Hâi kố, á kơhnhon xuăng ƀai “Em đẹp như hoa Pơlang”, rơhêng vâ ƀai kố xuăng klêi vâ ngin chôu pâ troh khôi túa tơlá dêi mơngế Rơđế dêi tơná vâ pơtó đi đo ăm xo ah hmôi”.

Tiô pôa Y Linh Niê, kăn phŏ Măt trâ̆n Tơnêi têa Việt Nam cheăm Čư̆ Prao, ƀuôn Pa, ƀuôn Năng ƀă ƀuôn Hoang ai 346 rơpŏng ƀă 1.440 pơ’leăng mâ mơngế. Pái to pơlê ai 5 hdroâng kuăn ngo tung rơpŏng hngêi mâu hdroâng kuăn ngo Việt Nam rơtế rêh ối tơdjuôm, tung mê, hdroâng kuăn ngo Rơđế châ lối 90%. Rêm hơnăm, hmâ a hâi tơrŭm tâi tâng hdroâng kuăn ngo, khu kăn pơkuâ cheăm tơkŭm po tơdroăng koh tơbâ a rêm pơlê, laga, hơnăm kố Vi ƀan hnê ngăn cheăm hiăng pơkâ tơkŭm po tơkŭm kơpong kuăn pơlê rêh ối vâ mơnhông hiâm mơno tơrŭm dêi mâu hdroâng kuăn ngo a cheăm. Tơdrêng a mê hlối bro rôh tơ’lêi ăm vâi krâ nhŏng o châ trâm mâ, tơpui tơno rơxuâng:

“Hâi lơ 18/11, rêm hơnăm hmâ tơkŭm po tơdroăng mơđah, peăng tơdroăng leh a mâu kơpong kuăn pơlê rêh ối. Rêm hơnăm tiô khôi túa tơlá tŏn chêng koăng mê ôu drôu xiâm, mê nếo kơhnhon xuăng. Kơpong kuăn pơlê rêh ối phiu ro khât”.

Veăng a Hâi Leh Tơrŭm hdroâng kuăn ngo a kơpong khu tơrŭm kuăn pơlê rêh ối dêi cheăm Čư̆ Prao, tơring MDrak, pôa Y Ƀiêr Niê, kăn phŏ pơkuâ ngăn Đảng kong pơlê Dak Lak ăm ‘nâi, nôkố, a hên pơlê a kong pơlê Dak Lak dế tơkŭm po hên tơdroăng mơhno túa lĕm tro, hơdruê xoâng koh tơbâ 92 hơnăm Hâi Tơrŭm hdroâng kuăn ngo (18/11/1930 – 18/11/2022). Tơdroăng cheăng kố hiăng chiâng Hâi leh kân dêi kơpong kuăn pơlê rêh ối ƀă hên tơdroăng cheăng pêi pro ai pơxúa, hơniâp ro ‘na mơhno túa lĕm tro khôi hmâ dêi mâu rơpŏng hngêi mâu hdroâng mơngế Việt Nam veăng kum mơdêk mơjiâng khu tơrŭm tâi tâng hdroâng kuăn ngo:

“Ki xiâm dêi hâi leh cho vâ vâi krâ nhŏng o pin mơdêk mâu khôi túa lĕm tro dêi hdroâng kuăn ngo ƀă tơpui tơno, hriâm ƀối mâu tơdroăng ki lĕm tro. Tung tơdroăng mê mơni kô chiâng vâ tŏng kum mâu troăng hơlâ pơkâ ki nếo vâ hnê tối ăm vâi krâ nhŏng o hlê plĕng tơ’nôm, ing mê vâi tơrŭm tơdroăng rêh ối dêi pơlê pơla ƀă luât dêi tơnêi têa vâ mơjiâng pơlê cheăm rế hía rế tơniăn lĕm tâ”.

Tung mâu hâi hdrối kố nah, a lâp lu mâu pơlê cheăm dêi kong pơlê Dak Lak xuân hiăng tơkŭm po Hâi mơdĭng Tơrŭm tâi tâng hdroâng kuăn ngo, ƀă tơdroăng ki veăng ai mâ dêi khu râ kăn Đảng, khu kăn pơkuâ cheăm, tơring, kong pơlê. Ki xiâm môi tiah a kơpong tơrŭm kơxô̆ 5, cheăm Ea Bar, tơring Ƀuôn Đôn hâk phiu châ veăng tơdah mâu pôa Phạm Minh Tấn, kăn phŏ pơkuâ ngăn Đảng kong pơlê, pôa Y Giang Gry Niê Knơng, ngế cheăng tung khu pơkuâ ngăn Đảng kong pơlê, kăn hnê ngăn Vi ƀan Măt trâ̆n Tơnêi têa Việt Nam kong pơlê, ƀă kăn pơkuâ mâu khu râ, kơvâ cheăng, khu râ Đảng, khu kăn pơkuâ kong pơlê.

Tơpui akố, pôa Phạm Minh Tấn, kăn phŏ pơkuâ ngăn Đảng Dak Lak tơmâng xo ƀă khĕn kơdeăn mâu ivá veăng kum dêi kuăn pơlê kơpong kuăn pơlê rêh ối kơxô̆ 5 tung pêi pro mâu tơdroăng tơ’noăng pâ nhuô̆m tơnêi têa, xuân môi tiah mâu rôh mơhnhôk xua khu râ Đảng, khu kăn pơkuâ, Măt trâ̆n Tơnêi têa ƀă mâu khu râ tơbleăng tung pơla hdrối nah. Tơdrêng amê, hlối rơhêng vâ khu râ Đảng, khu kăn pơkuâ, Măt trâ̆n Tơnêi têa Việt Nam, mâu râ ƀă kuăn pơlê 5 thôn pơtối mơdêk hiâm mơno tơrŭm, tơkâ luâ mâu xơpá, pơloăng mơnúa vâ mơnhông mơdêk cheăng kâ, mơjiâng kơpong kuăn pơlê rêh ối tơxông tơtêk, tơdroăng rêh ối kuăn pơlê rế hía rế phâi tơtô, hơniâp ro.