Ối tung rơpŏng kơtiê, ôh tá ai tơnêi pêi kâ, kơnốu hlâ kơtăn kố 3 hơnăm xua châi tamo, nâ H’Rung Mlô (hmâ khê̆n cho nôu Trâm) a ƀuôn Ea Kjoh A, cheăm Ea Drông, pơlê kong krâm Ƀuôn Hồ môi ngế păn dêi 2 ngế kuăn dế hriâm. Hlo tơdroăng xơpá mê, nâ hiăng châ tŏng kum môi to ro kơdrâi ƀă péa to hdrê pu pái vâ păn. Rơtế ƀă mê, ing tơdroăng tơkêa “Tơná mơ-eăm” nâ châ vâi hnê ăm kih thuât păn roăng vâ mơnăn păn kố chiâng kân lĕm.

“Á châ tŏng kum păn ro ƀă pu pái tiô rơpŏng kơtiê, tơdroăng rêh ối malối xơpá, ôh tá ai troăng ki lâi vâ mơnhông cheăng kâ. Mê xuân loi tơngah kô ai tŭm ivá vâ pêi cheăng kâ, păn roăng tơmeăm vâ ai liăn păn roăng kuăn hriâm”.

“Tơná mơ-eăm” cho tơdroăng tơkêa xua khu tơrŭm tŏng kum hbrâ ví kơklêa kơtiê lâp plâi tơnêi ƀă tŏng kum tơdrêng (CARE lâp plâi tơnêi) a Việt Nam tơrŭm ƀă Tíu xiâm tŏng kum pơlê pơla ƀă mâu tíu pêi cheăng tŏng kum dế tơbleăng a Dak Lak. Tiah mê, tung 2 hơnăm 2023 – 2024, tơdroăng tơkêa kố tơmiât troh mơdêk tŏng kum tơdroăng rêh ối cheăng kâ ăm rơpŏng kuăn pơlê ki pêi chiâk pêi deăng, malối cho vâi kơdrâi hdroâng kuăn ngo a 2 to cheăm Ea Drông ƀă Čư̆ Bao, pơlê kong krâm Ƀuôn Hồ.

Tiô jâ Vũ Lan Hương, Rak ngăn tơdroăng tơkêa dêi khu tơrŭm CARE lâp plâi tơnêi a Việt Nam, tơdroăng tơkêa kố kô tŏng kum tơdrêng ăm dâng 4 rơpâu ngế kuăn pơlê tiô tơdroăng “râng kŏng mơhno tơdroăng cheăng”, sap ing bro kơdroăng, hơ’lâk kế kâ, hbrâ mơdât pơreăng ăm mơnăn păn; troh mâu tơdroăng ki pro tơdâng ‘no hrê, kơdĭng liăn ngân. Hnê mơjiâng ƀă rak vế mâu túa pơkâ kơdĭng, mơhnhôk tơlo liăn ing pơlê pơla vâ ai liăn ăm vâi krâ nhŏng o mung. Khu tơrŭm mâu tơdroăng cheăng trâm mâ, hmâ ƀă mâu tíu ki roê, siê chêh vâ mơdêk ki kơnía dêi kế tơmeăm. Hngế tâ nếo cho tơmiât troh mơjiâng mâu kế tơmeăm OCOP.

Jâ Vũ Lan Hương ăm ‘nâi, tung 2 hơnăm, tơdroăng tơkêa pơkâ vâ kum pro hơ’lêh tơdroăng rêh ối ăm dâng 15 rơpâu ngế ƀă tơdjâk ki kơnía hên tâ ăm pơlê pơla, ƀă mâu ngế ki châ kơjo kum cho vâi kơdrâi hdroâng kuăn ngo.

“Tung tơdroăng tơkêa kố mê ngin kô ai 3 tơdroăng cheăng ki xiâm, apoăng cho mâu tơdroăng cheăng ki ai tơdjâk troh mơdêk ivá ‘na mơnhông tơdroăng cheăng kâ, tung mê ai tá mâu tơdroăng ki tơdjâk troh kih thuât pêt mơjiâng kế tơmeăm ƀă păn mơnăn mơnoâ. Tŏng kum vâ vâi krâ nhŏng o chiâng vâ mơdêk ki hlê plĕng tơdjâk troh rak ngăn liăn ngân ƀă châ mung liăn ngân xúa tung pêi cheăng kâ dêi vâi.

Cho tơdroăng ki kal khât vâ mơnhông pêi cheăng kâ krá tơniăn, mê cho athế châ hmâ ƀă kơchơ mơdró, athế châ tê kế tơmeăm ƀă tung 3 tơdroăng mê kô ai mâu tơdroăng cheăng ki rơtế prôk ƀă kuăn pơlê vâ pro tiah lâi vâ chiâng mơdêk tơdroăng tơrŭm pơla mâu ngế cheăng tung pơlê pơla ƀă mơdêk rơkong tơpui ƀă hnoăng cheăng dêi vâi kơdrâi tro tâ tung tâi tâng túa sap ing pêt mơjiâng tá troh tê”.

Čư̆ Bao ƀă Ea Drông cho 2 to cheăm ki pêi chiâk deăng, ƀă lối 80% pơ’leăng mâ mơngế cho kuăn pơlê hdroâng kuăn ngo, tơdroăng rêh ối dêi vâi krâ nhŏng o ối trâm hên xơpá. Pôa Võ Văn Sự, ngế pơkuâ ƀơrô cheăng kâ pơlê kong krâm Ƀuôn Hồ ăm ‘nâi, ing séa ngăn ăm hlo 2 to cheăm kố ai hên tơdroăng ki tơ’lêi hlâu vâ păn ro ƀăe pu pái. Xua mê, tơdroăng tơbleăng tơdroăng tơkêa tơngah kô po ăm rôh tơ’lêi vâ kuăn pơlê mơnhông mơdêk cheăng kâ tơƀrê tâ.

“ ‘Na tơdroăng rêh ối dêi Ƀuôn Hồ tối tơdjuôm ƀă péa to cheăm kố tối krê ‘na hyôh kong prâi, tơnêi tơníu cho tơ’lêi hlâu vâ păn péa túa hdrê ki kố, Malối cho hơ’nêh mâm pu pái nôkố yă tê a kơchơ gá xuân tơniăn, tíu tê mê xuân tơniăn há. Mê tơdroăng ki tơbleăng tơdroăng tơkêa kố cho tơtro ƀă péa to cheăm kố. Tơngah tiah kố apoăng kô cho tơdroăng ki hlê plĕng ‘na tơdroăng cheăng păn roăng mơnăn mơnoâ dêi hdroâng kuăn ngo, kum xut tah hrâ mơnguâ kơtiê xơpá, mơdêk tơdroăng rêh kâ ối dêi kuăn pơlê. Ƀă sap ing tơdroăng tơkêa kố kô tơdjâk troh pơlê pơla hên tâ”.