Prôk a troăng ƀê tong vâ chê 1km, rơdâ 4m, tơdjêp sap ing pơlê Myah troh kơpong pêi chiâk deăng, pôa Ksor Jinh (kot mâ hơnăm 1950, a cheăm Ia Krai, tơring Ia Grai) ăm ‘nâi, bu kơtăn kố 1 hơnăm, kố cho troăng tơnêi, rơdâ bu 2m, kơtâk ‘mêi a rơnó tôu, trâp hliâk kơtong a rơnó mê pro hên kuăn pơlê kơtong drêng to rơxế chơ kế tơmeăm pêi lo ing chiâk deăng a rơnó mê hngê.

Drêng châ khu kăn pơkuâ cheăm tơbleăng ‘na tơdroăng ki tơnêi têa tŏng kum kuăn pơlê pro troăng ƀê tong, pôa Ksor Jinh hiăng pleăng 100 met karê tơnêi, hên kuăn pơlê tung pơlê tơngah, pleăng xêh lối hrĭng met karê tơnêi vâ pro rơdâ pro troăng:

“Hdrối nah troăng ki kố prôk lăm gá xơpá khât, kuăn ‘nĕng lăm hriâm xuân xơpá, mâu ngế ki kân drêng lăm kơchô roê phái pô tung pong vêh mê troăng prôk trâp hliâk gá xơpá khât. Sap ing rôh trâm mâ kuăn pơlê, cheăm xuân hiăng lăm chu troh a tíu ki ai troăng ‘mêi mê vâ ngăn, cheăm xuân hiăng ai tơdroăng tơkêa pro troăng, klêi mê mơhnhôk vâi krâ nhŏng o pleăng tơnêi, rôu tah mâu xiâm loăng kơphế, loăng plâi hôt vâ po rơdâ troăng, ngin xuân phiu ro pêi tiô ƀối. Troh nôkố troăng kố hiăng châ po rơdâ, hlo kuăn ‘nĕng lăm hriâm xuân hmiên tuăn ƀă tơ’lêi hlâu ăm vâi krâ nhŏng o kuăn pơlê ki pêi chiâk pơto chơ tơmeăm pêi lo ing chiâk deăng, tơdroăng kố pro ăm rêm ngế ro khât”.

Ƀă pơlê Nú, cheăm Ia Khai, tơring Ia Grai, xuân sap ing tơdroăng ki pleăng tơnêi pro troăng, mê apoăng hơnăm 2023, troăng ƀê tong xŏn 800m, rơdâ 4 met hiăng teăm klêi hdrối vâ mot tung rơnó krí plâi hôt. Pôa Rơ Châm H’Monh, ngế ki châ kuăn pơlê loi nhuô̆m pơlê Nú ăm ‘nâi, drêng khu kăn pơkuâ cheăm mơhnhôk vâi krâ nhŏng o pleăng tơnêi, po rơdâ troăng, hên rơpŏng tơtrâ khât xua pleăng tơnêi mê athế ko tah dêi lối hrĭng to xiâm loăng hôt dế krí plâi rêm hơnăm. Pôa H’Monh djâ troăng ahdrối, ko tah dêi 19 to xiâm loăng dêi rơpŏng hngêi, mê mơhnhôk vâi krâ nhŏng o, kuăn ‘nĕng tung hdroâng hdrê pêi tiô ƀối. Sap ing mê, rơtế ƀă tơdroăng mơhnhôk dêi kăn pơkuâ thôn, 20 rơpŏng kuăn pơlê hiăng ko tah dêi 300 to xiâm loăng plâi hôt drô tiô 2 pâ vâ troăng prôk rơdâ lĕm châ bro klêi. Pôa H’Monh ăm ‘nâi:

“Sap ing mơjiâng thôn pơlê nếo, tung pơlê ai hên tơdroăng ki hơ’lêh, châ tơnêi têa tơmâng ngăn, tŏng kum bro po rơdâ troăng prôk. Nôkố, hên troăng prôk tung thôn pơlê châ ok ƀê tong. Krê rơpŏng á xuân hiăng pleăng môi iâ tơnêi ƀă hiăng ko tah dêi to lâi chât xiâm loăng pêt vâ po rơdâ troăng. Ƀă mâu rơpŏng ki ê tâng khu kăn pơkuâ pơkâ thế pleăng tơnêi, ko tah mâu xiâm loăng mê vâi krâ nhŏng o xuân pơrá pêi tiô ƀối, xua kuăn pơlê hlê tơnêi têa xuân rơhêng vâ pro tơ’lêi hlâu vâ kuăn pơlê ai troăng prôk krúa lĕm. Á phiu ro  ƀă mơnê tơdroăng tơmâng ngăn sap ing khu kăn pơkuâ”.

Vâ pêi pro mâu tơdroăng pơkâ tơnêi têa ‘na mơjiâng thôn pơlê nếo ƀă mơnhông mơdêk cheăng kâ rêh ối pơlê pơla kơpong hdroâng kuăn ngo, hên hơnăm kố, khu râ đảng, khu kăn pơkuâ tơring Ia Grai, kong pơlê Gia Lai hiăng krếo thế veăng kum dêi tá khu pơkuâ tơdroăng kal kí, kuăn pơlê ƀă khu mơdró kâ. Tung mê, ki xiâm dêi tơring cho kơjo kum kơpong hdroâng kuăn ngo, kơpong xơpá; kơjo kum bro hngêi trăng troăng klông, pro ivá vâ ăm tơdroăng ki mơnhông mơdêk cheăng kâ, reh ối.

Ing mê, tơdroăng ki pleăng tơnêi pro troăng, vâ pêi pro mâu tơdroăng, châ kuăn pơlê môi tuăn, pêi pro. Krê sap ing hơnăm 2020 troh nôkố, lâp tơring tiô riân hiăng mơhnhôk lối chât rơpâu rơpŏng kuăn pơlê, pleăng tâi tâng lối 20 rơpâu met karê tơnêi. Tung kơxô̆ ki mê, mâu cheăm ki ai hên kuăn pơlê hdroâng kuăn ngo môi tiah Ia Krai, Ia Khai, Ia Yok, Ia O ƀă hên cheăm ki ê cho mâu tíu ki ai hên túa pêi ki ‘ló, tơƀrê. Ing me, kăn ƀô̆, đảng viên, ngế ki châ kuăn pơlê loi nhuô̆m, krâ pơlê ki kơhnâ rơkê đi đo cho khu ngế ki djâ troăng ahdrối tung tơdroăng mơhnhôk, ing mê pro ai tơdroăng ki môi tuăn, tơngah ƀă pêi tiô ƀối dêi kuăn pơlê. Jâ Nguyễn Mai Lương – Kăn hnê ngăn Vi ƀan cheăm Ia Khai, tơring Ia Khai ăm ‘nâi:

“Cheăm hiăng hôp xuân krếo thế krâ pơlê,kăn pơkuâ chi ƀô̆ ƀă malối cho ngế ki châ kuăn pơlê loi nhuô̆m a cheăm. Tung pơla pêi pro,túa pơkâ cho tối đi đo mê vâi kô hlê, hâi kố vâi tá hâi hlê mê kơxo ah ngin pơtối troh hnê tối nếo,hâi kố xoăng ngế ki kố lăm troh mơhnhôk mê kơxo ah xoăng ngế ki ênếo. Tâng rơpŏng ki mê ai hô̆i viên Hô̆i kuăn pơlê pêi chiâk mê ngin nếo krếo Khu ngăn kuăn pơlê pêi chiâk, ngế ki tơrŭm Khu ngăn vâi kơdrâi mê ngin pơtroh hô̆i trưởng chi hô̆i vâi kơdrâi, tơpui tối leăng ăm vâi krâ nhŏng o hlê”.

Hngêi trăng troăng klông hâi kố hiăng krip lĕm hiăng kum tơdroăng ki tê mơdró pơla mâu thôn pơlê, kơpong hngế hngo, kơpong hdroâng kuăn ngo tơ’lêi hlâu tâ, cho ivá vâ đảng ƀô̆, khu kăn pơkuâ ƀă kuăn pơlê kơpong tơkăng kong kơtiê Ia Grai mơeăm mơjiâng tơdroăng reh ối rế hía rế phâi tơtô, tơniăn lĕm.