Po tung pơla 3 hâi, sap ing hâi lơ 29/11 troh hâi lơ 1/12/2023 a pơlê kong kơdrâm Kon Tum, kong pơlê Kon Tum, Hâi mơdĭng Mơhno túa lĕm tro, Tơ’noăng ivá ƀă Ôm hyô mâu hdroâng kuăn ngo kơpong Tây Nguyên rôh má I, hơnăm 2023 vâ koh pơ-ô pơ-eăng mâu tơdroăng ki kơnía git ‘na mơhno túa lĕm tro tiô khôi hmâ tơniăn lĕm dêi mâu hdroâng kuăn ngo kơpong Tây Nguyên, tơdrêng a mê hlối mơđah tơbleăng, mơhnhôk tơdjêp ôm hyô.

Hâi mơdĭng xua Khu xiâm ngăn Mơhno túa lĕm tro, Tơ’noăng ivá ƀă Ôm hyô tơrŭm ƀă mâu Khu xiâm, kơvâ cheăng Tơnêi têa ƀă 5 kong pơlê kơpong Tây Nguyên, mê cho: Kon Tum, Gia Lai, Dak Lak, Dak Nông ƀă Lâm Đồng tơkŭm po. Veăng tung hâi po mơdĭng ai dâng 1 rơpâu ngế ngê̆ nhân, diễn viên, khu tơ’noăng kuăn pơlê ƀă mâu kăn mâu hdroâng kuăn ngo dế rêh ối a 5 to kong pơlê kơpong Tây Nguyên.

Tơpui a leh ƀă hnê mơhno a hâi po mơdĭng, teăng mâ Đảng, Tơnêi têa, Đăi tươ̆ng Tô Lâm, Ngế cheăng tung Khu xiâm kal kí, Ngế xiâm ngăn ‘na kŏng an tối nhên: Đảng ƀă Tơnêi têa pin đi đo tơmâng ngăn khât mơnhông tâi tâng ƀă krá tơniăn kơpong Tây Nguyên. Sap ing hơ’lêh nếo troh nôkố hiăng pơkâ hên tơdroăng, hnê mơhno, mơgêi ‘na tơdroăng kố.

Hâi lơ 6/10/2022 Khu xiâm pơkuâ tơdroăng kal kí hneăng 13 hiăng pơkâ Kơxô̆ 23 ‘na mơnhông cheăng kâ rêh ối pơlê pơla ƀă rak vế tơniăn pơlê pơla cheăm bêng, gâk kring kơpong Tây Nguyên troh hơnăm 2030, troăng ngăn troh hơnăm 2045, tung mê, mơnhên ‘Mơjiâng tơdroăng mơhno túa lĕm tro Tây Nguyên rơkê, rak vế ‘na túa lĕm tro mâu hdroâng kuăn ngo, môi tuăn tung hên tơdroăng, ngăn nhuô̆m mâu ki kơnía git túa lĕm tro phá tơviah pơla mâu hdroâng kuăn ngo, ngăn kố cho ivá ăm mơnhông ƀă tơrŭm kong têa ê dêi kơpong”:

“Pơtối pro hơ’lêh Pơkâ 13 dêi Đảng ƀă tơdroăng tung la ngiâ mơnhông túa lĕm tro hơnăm 2030, Hâi mơdĭng Mơhno túa lĕm tro ƀă Ôm hyô mâu hdroâng kuăn ngo kơpong Tây Nguyên rôh má I hơnăm 2023 kô chiâng tíu tơkŭm, ai tơdjâk, cho rôh vâ kuăn pơlê mâu hdroâng kuăn ngo Tây Nguyên trâm mâ, tơpui tơno, hnê tối ăm dêi rơpó mâu tơdroăng ki rơkê, veăng kum mơđah tơbleăng um méa, kuăn mơngế, ki lĕm krip tơdrŏm ƀă túa lĕm tro mâu hdroâng kuăn ngo ki hơniâp lĕm dêi kơpong tơnêi Tây Nguyên troh vâi pú tung tơnêi têa ƀă a kong têa ê, po rơdâ rôh tơdah xo ‘no liăn cheăng, tơ’mot mơnhông ôm hyô kơpong Tây Nguyên tối tơdjuôm, kong pơlê Kon Tum tối krê”.

Klêi Leh pơxiâm po, peăng Mơdĭng ƀă Tơdroăng ngê̆ thuât ai inâi “Kong kân rơdâ Tây Nguyên - Ki lĕm krip dêi tơdroăng tơkŭm” vâ ‘măn chôu hên tơdroăng ki tơƀrê ƀă ôh tá chiâng piu tung hiâm mơno kuăn pơlê ƀă tơmối. Rơtế ƀă dâng 600 ngế ngê̆ nhân, diễn viên, khu tơ’noăng mâu hdroâng kuăn ngo 5 to kong pơlê tơbleăng ‘na túa lĕm tro mơngiơk Tây Nguyên, tung leh pơxiâm po, rôh apoăng kuăn pơlê châ ngăn, châ hmâng rôh tôu hơkâ mơdĭng “Idrâp ngo ngối Tây Nguyên” xua 500 ngế lêng Học viện Cảnh sát Nhân dân tôu ƀă rôh hlŭm khiê̆n dêi vâ chê 100 ngê lêng dêi Khu veăng a leh Kŏng an Kuăn pơlê, Khu pơkuâ ngăn Kăn sat Kơ đô̆ng.

Sap ing cheăm Tà Nung, pơlê kong kơdrâm Đà Lạt, kong pơlê Lâm Đồng troh kong pơlê Kon Tum veăng tung hâi mơdĭng, ngê̆ nhân Ka Thế, hdroâng K’Ho hâk ro tối:

“Mơnê Khu tơkŭm po hiăng pro ai tíu xah hêi kố. Kố cho tíu ki tơkŭm tâi tâng mâu ngế ki rơkê ‘na túa lĕm tro dêi tâi tâng mâu hdroâng kuăn ngo nhŏng o a kơpong tơnêi Tây Nguyên kố. Kố cho tíu tơkŭm vâ trâm mâ, mơđah tơbleăng túa lĕm tro vâ ‘nâi tơ’nôm mâu khôi túa tơlá, mâu tơdroăng ki hơniâp lĕm dêi rêm hdroâng kuăn ngo. Ngin djâ vế troh akố ếo pơtâk, mâu ƀai hơdruê rơngê dêi mơngế K’Ho, ƀă mâu kế kâ vâ á ăm vâi pú mơnúa kâ ngăn”.

Hâi mơdĭng Mơhno túa lĕm tro, Tơ’noăng ivá ƀă Ôm hyô mâu hdroâng kuăn ngo kơpong Tây Nguyên rôh má I, hơnăm 2023 châ tơkŭm po a pơlê kong kơdrâm Kon Tum po hên tơdroăng mơđah tơbleăng. Tung mê, tơdroăng mơhno túa lĕm khôi hmâ mê cho 6 tơdroăng ki xiâm: mơđah rôh Mơdĭng túa lĕm tro mâu hdroâng kuăn ngo; mơđah tơbleăng kế tơmeăm khôi hmâ túa lĕm dêi mâu tơring cheăm; mơđah pế pơchên kế kâ khôi hmâ; po hơdruê, xuăng ngê̆ thuât kuăn pơlê ƀă mơđah sâp ếo pơtâk mâu hdroâng kuăn ngo kơpong Tây Nguyên; tơbleăng ki lĕm tro mâu tơdroăng ki lĕm dêi mâu hdroâng kuăn ngo kơpong Tây Nguyên tung pơlê pơla mơhno túa lĕm tro mâu hdroâng mơngế Việt Nam; mơđah tơbleăng um ngê̆ thuât mơngiơk túa lĕm tro mâu hdroâng kuăn ngo kơpong Tây Nguyên rơtế ƀă tơdroăng mơnhông dêi tơnêi têa.

Tơdroăng tơ’noăng ivá kuăn pơlê ai 5 môn tơ’noăng, mê cho: Trut loăng, hrot kơxái, pĕng mơnĕng, hếo trăng rơmâ ƀă kơ’nŏng kơxâk. Tơdroăng ôm hyô tơbleăng troh kuăn pơlê ƀă tơmối hên tíu ki lĕm dêi kong pơlê Kon Tum.

Pakĭng ki xiâm mơjiâng tơnêi tíu tơrŭm tơdjêp túa lĕm tro, tơbleăng, mơđah troh kuăn pơlê ‘na khôi túa lĕm tro dêi hdroâng kuăn ngo Tây Nguyên, Hâi mơdĭng Mơhno túa lĕm tro, tơ’noăng ivá ƀă ôm hyô mâu hdroâng kuăn ngo kơpong Tây Nguyên rôh má I ối cho rôh vâ ăm ôm hyô Tây Nguyên tối tơdjuôm ƀă kong pơlê Kon Tum tối krê “kơneăng”.

Ki khât, nôkố, mâu kong pơlê Tây Nguyên pơrá hiăng mơjiâng mâu tíu, kế tơmeăm, tơdroăng ôm hyô; ai tơdroăng tơdjêp pơla mâu tíu troh ki chía ro. Klêi rơnó mơdĭng kố, tơ’nôm môi hdroh nếo mâu mơngiơk Tây Nguyên châ hên hĭn pú hmâ a chê hngế ‘nâi troh, pro tơ’nôm mâu rôh tơ’lêi nếo ăm ôm hyô a tơnêi Tây Nguyên pơtối châ mơnhông.