‘No dêi kŏng pơchốu troăng ki vâi hiăng ok ƀê tong lĕm krúa, tơkâ luâ mâu thôn, pơlê, pôa K’Keo, krâ pơlê, a ƀuôn Hàng Làng, cheăm Gung Reh, tơring Di Linh, kong pơlê Lâm Đồng phiu ro ăm ‘nâi, ngiâ méa thôn pơlê dêi cheăng hiăng hơ’lêh hên khât tâng vâ pơchông ƀă hdrối nah. Kơnôm ai troăng prôk tơ’lêi hlâu, kế tơmeăm pêi lo ing chiâk deăng ôh tá tro khu roê hjip yă xếo, kơtăn pơla mâu pơlê ƀă kơpong tíu xiâm gá hiăng achê mê tơdroăng rêh ối liăn ngân ƀă hiâm mơno dêi kuăn pơlê hiăng châ mơdêk hên khât tâng pơchông ƀă hdrối.

Châ tơdroăng kố cho kơnôm ing tơdroăng ki tơmâng ngăn ‘no liăn dêi Đảng ƀă Tơnêi têa tung rêm kơvâ, tung mê, ai tơdroăng pơkâ dêi tơnêi têa ‘na mơjiâng thôn pơlê nếo.

“Hlê plĕng kố cho tơdroăng pêi ƀă pơxúa mê ahdrối dêi vâi krâ nhŏng o mê vâi krâ nhŏng vâi môi tuăn pêi pro. Tung pơla hdrối kố nah, vâi krâ nhŏng o hiăng kum hdrê pêt, ƀăng tơnêi ƀă veăng ‘no ivá liăn ngân vâ rơtế ƀă tơnêi têa mơjiâng thôn pơlê nếo. Tơnêi têa vâi tŏng kum ƀă vâi krâ nhŏng o mê vâi veăng kum ivá vâ pro troăng mot tung mâu kơpong pêi chiâk, mơjiâng bro troăng prôk tung thôn pơlê. Pro tiah lâi mơjiâng thôn pơlê, ai troăng prôk lăm, vâ tơ’lêi hlâu mơnhông cheăng kâ, kum ăm ngiâ méa thôn pơlê rế hía rế lĕm tâ”.

Ôh ti xê to a ƀuôn Hàng Làng, cheăm Gung Reh, mê tơdroăng mơjiâng thôn pơlê nếo hiăng pro pơxúa tơƀrê khât ăm tâi tâng mâu thôn pơlê dêi tơring Di Linh, kong pơlê Lâm Đồng. A pơlê Duệ, cheăm Đinh Lạc, klêi kơ’nâi châ mơnhên cho pơlê rơkê tiô túa, vâi krâ nhŏng o a tíu kố hiăng kơhnâ tâ tung tơdroăng ki tơdjuôm ivá rơtế ƀă khu kăn pơkuâ mơjiâng ƀă pêi pro mâu tơdroăng pơkâ thôn pơlê nếo mơdêk.

Tiô pôa M’Hiu Nguyên, kăn pơkuâ chi ƀô̆ pơlê Duệ, xuân xua kuăn pơlê hlo ki kơnía khât dêi tơdroăng mơjiâng thôn pơlê nếo pro pơxúa ăm dêi tơná, ăm pơlê cheăm tơná bô bố xuân veăng pêi pro kơhnâ. Tung mê, tơdroăng Hâi tơdrốu thôn pơlê nếo hiăng ƀă dế châ tơdjâk rơdêi, kum ngiâ méa dêi thôn pơlê ngăn hiăng môi tiah dêi môi kơphô̆ tíu xiâm: ai on tơhrik bâ eăng, ai rơxế lăm xo xok, troăng prôk tung thôn pơlê kân rơdâ ƀă đi đo ngiât lĕm, krúa. Pôa M’Hiu Nguyên, tối:

“Nôkố a thôn Duệ hiăng ƀă dế pêi pro hlo kơhnâ ƀă tơƀrê khât. Kăn ƀô̆ ƀă kuăn pơlê pơrá tơdjuôm ivá pêi pro hâi tơdrốu thôn pơlê nếo. Ki nhên, troăng mot tung thôn pơlê đi đo ngiât, krúa, lĕm, xok vâi lăm gô̆m krúa, pul on bâ ăng tâ tá thôn, ki hên cho mâu troăng prôk tung thôn pơrá hiăng ok ƀê tong ngiâ méa thôn pơlê hiăng hlo hơ’lêh. Tối tơdjuôm tơdroăng rêh ối dêi kuăn pơlê mê hiăng rế hía rế châ mơnhông tâ”.

Di Linh cho tơring ai kuăn pơlê cho hdroâng kuăn hên, lối tơdế, tung mê ki hên cho mơngế K’Ho. Troh nôkố, lâp tơring hiăng ai 18/18 to cheăm pêi klêi thôn pơlê nếo, 2 to cheăm pêi klêi thôn pơlê nếo mơdêk ƀă 1 to cheăm pêi klêi thôn pơlê nếo tiô túa pơkâ. Pôa Vũ Đức Nhuần, Kăn phŏ hnê ngăn Vi ƀan tơring Di Linh ăm ‘nâi, vâ pơtối tơbleăng tơƀrê tơdroăng mơjiâng thôn pơlê nếo pơla hơnăm 2021 – 2025, Khu pơkuâ ngăn Đảng tơring Di Linh hiăng mơjiâng tơdroăng pơkâ 04 pêi pro tơdroăng hâi tơdrốu mơjiâng thôn pơlê nếo a tâi tâng mâu thôn pơlê.

Klêi vâ chê 1 hơnăm tơbleăng pêi pro, tơdroăng kố hiăng tơdjâk rơdêi tung mâu rơxông kuăn pơlê ƀă kăn ƀô̆ đảng viên. Tung mê, hnoăng cheăng dêi kuăn pơlê tung tơdroăng mơjiâng thôn pơlê nếo hiăng rế hía rế châ tối rơdêi ƀă ƀă mơdêk tơƀrê. Kố châ ngăn cho tơdroăng ki kal vâ tơring pêi klêi mâu tơdroăng ki kal ƀă tŭm vâ châ mơnhên cho tơring thôn pơlê nếo a hơnăm 2024. Pôa Vũ Đức Nhuần, tối:

“Tơdroăng pơkâ 04 hâi lơ 18 khế 1 hơnăm 2023 dêi Khu pơkuâ ngăn Đảng tơring cho môi tơdroăng pơkâ tŭm tâi tâng ‘na mơjiâng thôn pơlê nếo. Pơcháu tơdroăng pơkâ ăm rêm to cheăm, rêm to thôn vâ mơjiâng mâu tơdroăng pơkâ ‘na thôn pơlê nếo. Maluâ tơring ai 9 tơdroăng pơkâ ‘na thôn pơlê nếo mê xuân athế pêi klêi. Tung pơla hdrối nah mê hmâ hâi 7, hâi tĭng xoăng mâu cheăm vâ séa ngăn, mê nếo rơtế bă vâi krâ nhŏng o pêi pro mâu tơdroăng ki kal môi tiah kui tah trâp a troăng hdoăng têa, hnê vâi krâ nhŏng o ‘na tơdroăng ki hơ’lêh kơxô̆. Hiăng pro chiâng tơdroăng tơdjâk kân tung vâi krâ nhŏng o ‘na hnoăng cheăng dêi tơná tung mơjiâng thôn pơlê nếo”.

Ôh ti xê to mơ-eăm pêi klêi thôn pơlê nếo, tơring Di Linh ối pơkâ tơdroăng tung hơnăm 2025 kô pêi pro mâu tơdroăng pơkâ thôn pơlê nếo mơdêk, ƀă iâ hlái ai 8 to cheăm pêi klêi thôn pơlê nếo mơdêk ƀă 5 to cheăm pêi klêi thôn pơlê tiô pơkâ. Tung tơdroăng ki mơdêk ivá tơrŭm tâi tâng hdroâng kuăn ngo, xo kuăn pơlê pro khu xiâm, ƀă cho khu ki kal tung pêi pro tơdroăng mơjiâng thôn pơlê nếo, tơngah khât tơring Di Linh kô rĕng pêi klêi mâu tơdroăng pơkâ mơ’no, veăng kum mơjiâng kong ngo Di Linh rế hía rế kro mơdrŏng.