Kuăn pơlê a cheăm Quảng Điền, tơring Krông Ana, kong pơlê Dak Lak hiăng hmâ ƀă ngiâ méa môi ngế kơdrâi cho thiê̆u tă kŏng an hmâ lăm pơtrui tâ tá cheăm sap ing 5 chôu 30 phut kơxo má rêm hâi. Pôa Trần Văn Hữu, a đô̆i 5, thôn 2, cheăm Quảng Điền tối: kuăn pơlê akố ki hên cho pêi chiâk klâng mê tơdroăng ki riu kơxo má, tơkŭm ôu kơphế, tơpui tơno dêi ƀă rơpó mê nếo lăm klâng.

Mâu hơnăm hdrối mê hía nah, tơdroăng ki tơkŭm klêi mê djâ dêi rơpó xah ƀai, kok liăn pro ôh tá tơniăn. Hên rơpŏng chiâng chê̆n liăn xua ing tơdroăng ki xah ƀai kâ liăn. La 3 hơnăm vêh ngi kố, mâu tíu ki xiâm ‘na tơdroăng ki xah ƀai mê hiăng kơdroh, tơdroăng gâk kring tơniăn tung cheăm rế hía rế châ hơ’lêh.

 “Sap ing hâi ki Thảo lăm troh akố pro kăn pơkuâ kŏng an ƀă mâu kŏng an tơring pơ’lêh lăm troh akố mê tơdroăng gâk kring, rak tơniăn tung lâp pơlê pơla. Kŏng an akố vâi xuân rơtế ƀă kuăn pơlê, lăm ối ƀă kuăn pơlê, tơmâng rơkong tơpui dêi kuăn pơlê.

A pơlê, a tôh mê nếo khu ki rak ngăn thôn akố xuân ‘nâi nhên tơdroăng a cheăm pơlê ƀă tơdrêng amê hlối pơkâ kơtăng tiô túa ki nhên mê tơdroăng ki gak kring, mâu ngế ki pro xôi akố mê ôh tá hlo xếo”.

Ngế ki pôa Hữu tối troh mê cho Thiê̆u tă Lê Nguyễn Hiếu Thảo – Ngế pơkuâ kŏng an cheăm Quảng Điền. Cho ngế hdroâng kuăn ngo Thái, kot mâ hơnăm 1986, hdrối nah, nâ Thảo hiăng pêi cheăng châ 13 hơnăm a Kŏng an tơring Krông Ana tung Đô̆i gâk kring mê nếo pêi tung Đô̆i Kăn sat rak ngăn hlá mơ-éa ‘na tơniăn tung pơlê pơla.

Sap ing mơ’nui hơnăm 2019, nâ pâ vêh a cheăm tiô tơdroăng pơkâ dêi Khu xiâm ngăn kŏng an ƀă châ Kŏng an tơring Krông Ana loi tơngah pơtroh, rak vế pro kăn pơkuâ Kŏng an Quảng Điền.

Nâ Thảo xuân cho kăn ƀô̆ kơdrâi ki má môi tung 5 ngế kŏng an châ pơtroh lăm pêi cheăng a cheăm.

Drêng xo dêi hnoăng cheăng, nâ Thảo hiăng rơtế ƀă mâu dêi vâi pú lăm troh a cheăm vâ ‘nâi nhên tơdroăng. Mê po mơjiâng túa pơkâ pêi cheăng, pêi cheăng tơdrêng ƀă mâu thôn, pơlê vâ séa ngăn mâu ngế ki pro xôi, mâu tíu ki ki tơkŭm ối pro tơdroăng ôh tá tro a cheăm. Hmâ lăm pơtrui, séa ngăn a mâu thôn pơlê ki tơkoh ƀă dêi rơpó; tơkŭm hnê tối ăm kuăn pơlê ƀă hên tơdroăng.

Rơtế a mê, kŏng an cheăm ối tơkŭm lăm troh a hngêi pôu kơ-êng, mơhnhôk kuăn pơlê lơ hbru tơmeăm ăm mâu rơpŏng ki ai tơdroăng rêh ối xơpá, mâu ngế ki tơmiât lĕm vêh dêi ngi pơlê klêi kơ’nâi kroăng phâk.

Nâ Nguyễn Mỹ Hạnh a thôn 4, cheăm Quảng Điền ăm ‘nâi, kơnôm ing tơdroăng ki tơmâng ngăn mơhnhôk dêi kŏng an cheăm, klêi kơ’nâi mơgêi tơdroăng ki kroăng phâk kơnốu nâ hiăng mot tơrŭm ƀă pơlê pơla, mơ-eăm pêi cheăng kâ.

 “Drêng vêh ing tíu kroăng phâk mê ngoh hiăng tơrŭm ƀă pơlê pơla, veăng pêi cheăng kâ lĕm, malối cho hiăng ‘nâi mơ-eăm hên tơdroăng. Malối rôh ki vêh a pơlê mê khu kăn pơkuâ mê nếo mâu kŏng an cheăm pơrá cho mâu nhŏng o ki lĕm rơkê, vâi đi đo mơhnhôk, vâi kum ‘na hiâm mơno gá hên khât”.

Ôh ti xê to a chê kuăn pơlê, hlê plĕng nhên cheăm pơlê, Thiê̆u tă Lê Nguyễn Hiếu Thảo ối hmâ tơbleăng tơkŭm po mâu tơdroăng ki tŏng kum kế tơmeăm, tŏng kum kuăn pơlê. Drêng pơreăng COVID-19 tâ tú rơ-iêo, kŏng an cheăm Quảng Điền hiăng krếo thế mâu khu ki ai hiâm mơno hơ-ui veăng tơlo lối chât rơpâu tâ̆n kơchâi drêh, kế tơmeăm xúa pơtroh ăm khu ki hbrâ mơdât pơreăng a Pơlê kong kân Hồ Chí Minh ƀă mâu kong pơlê peăng hdroh.

Nâ Thảo ối mơhnhôk ƀă tơkŭm po 12 rôh tơdroăng ki tŏng kum troh mâu ngế pêi cheăng kum kuăn pơlê, pôu hbru tơmeăm ăm mâu rơpŏng ki ai hnoăng ƀă kăch măng, rơpŏng châ tơnêi têa tŏng kum, rơpŏng ai tơdroăng rêh ối xơpá ƀă tâi tâng kơxô̆ liăn kơnâ lối 200 rơtuh. Krếo thế veăng tơlo liăn vâ tŏng kum kơxô̆ liăn pơlât ăm môi ngế kăn ƀô̆ cheăm ki ai tơdroăng rêh ối xơpá.

Mâu tơdroăng pêi kố dêi kŏng an cheăm Quảng Điền châ kuăn pơlê mơnhên tối khât, kăn pơkuâ cheăm tơmâng xo, khê̆n kơdeăn. Thươ̆ng tă Lê Văn Tuấn, ngế ki pơkuâ Kŏng an tơring Krông Ana mơnhên tối:

“Nâ Thảo hiăng pêi pro tro hnoăng cheăng dêi ngế ki pơkuâ kŏng an râ cheăm. Nâ kơhnâ, tá hiâm mơno ƀă tơdroăng cheăng. Tung 3 hơnăm hdrối nah, nâ Thảo xuân châ Đảng ủy, kăn pơkuâ Kŏng an tơring Krông Ana ƀă Đảng ủy, Vi ƀan hnê ngăn cheăm Quảng Điền mơnhên tối khât ƀă châ kuăn pơlê a cheăm Quảng Điền tơmâng xo, pâ nhuô̆m, rak vế tŏng kum hên ăm Kŏng an cheăm Quảng Điền tung tơdroăng ki pêi pro hnoăng cheăng kal kí a cheăm pơlê”.

Ƀă mâu ivá veăng kum tung pơla pêi dêi hnoăng cheăng, Thiê̆u tă Lê Nguyễn Hiếu Thảo hiăng hâk tơngăm cha xo Hlá mơéa khê̆n kơdeăn dêi Kăn pơkuâ Kŏng an kong pơlê Dak Lak xua hiăng kơhnâ rơkê tung hnoăng cheăng hơ’lêh chêh pro hlá mơéa; Hlá mơéa khê̆n kơdeăn dêi Vi ƀan hnê ngăn tơring Krông Ana ‘na hnoăng cheăng ki rơkê tung tơ’noăng pâ nhuô̆m tơnêi têa hneăng hơnăm 2015 – 2020; Ƀâng khê̆n kơdeăn dêi Kăn xiâm pơkuâ Kŏng an ‘na hnoăng cheăng ki kơhnâ rơkê tung cheăng tơrŭm, tơkŭm po ƀă veăng tung rôh tơ’noăng um ngê̆ thuât, Video clip inâi “Mâu ngế lêng pôu râng dêi hnoăng cheăng rak vế tơdroăng rêh ối tơniăn” hơnăm 2022.

Thiê̆u tă Thảo tối, ƀă nâ, pro kŏng an cho tơdroăng ki hâk vâ sap ing ối tơxĭn. Xua mê, maluâ tơkâ luâ hên mâu tơdroăng xơpá la nâ rế hâk vâ ƀă hâk tơngăm ƀă mơngiơk ếo dế xâp ƀă xuân pơtối pleăng dêi hnoăng vâ rak vế tơdroăng ki tơniăn ăm kuăn pơlê.

“Kơvâ cheăng á rah xo mê cho tơdroăng cheăng ki á hâk vâ. Tung la ngiâ, á bu rơhêng vâ á kô tí tăng ‘nâi plĕng ƀă kô ai mâu tơdroăng tơchĕng tơmiât rơkê vâ tơdjuôm ivá vâ ăm kuăn pơlê ƀă cheăm kố châ mơdât tơdroăng ki pêi pro ôh tá tro tung pơlê pơla tiô túa ki tơtro má môi. Ƀă rơhêng vâ tung la ngiâ kuăn pơlê xuân ối môi tiah dế nôkố, mơ-eăm tâ nếo, tơdjuôm ivá ƀă khu kŏng an cheăm tung tơdroăng tơ’noăng tâi tâng kuăn pơlê rak vế gâk kring Tơnêi têa”.

Tơdroăng ki kơhnâ tá hiâm mơno dêi thiê̆u tă Lê Nguyễn Hiếu Thảo hiăng châ kuăn pơlê tơmâng xo ƀă mơnhên tối khât. Ing mê veăng kum tơrŭm krá tơdroăng ki tơrŭm pơla kuăn pơlê ƀă kŏng an, rêm ngế kuăn pơlê xuân chiâng môi ngế kŏng an, cho kŏng tơdjêp xŏn vâ rơtế tơdjuôm ivá hbrâ mơdât mâu ngế pro xôi, rak vế tơniăn ăm pơlê cheăm.