A tíu pêi cheăng dêi Khu pêi cheăng tơrŭm kơphế Lam Anh thôn Tuơh Ktu, cheăm Glar, tơring Đăk Đoa, kong pơlê Gia Lai, trêi hngêi lêk gât khêi drêng lâi xuân châ xut krúa lĕm, rơngiâp. Kố cho tíu pơxiâm pêi cheăng dêi “mâu kuăn pơlê pêi chiâk hơniâp ro a tơnêi Glar”. Vâi hluăn ing tơdroăng ki chĕn liăn ngân, châ rêh ối tung tơdroăng ki hơniâp lĕm, ƀă pêi lo xêh mâu kế tơmeăm ƀă pôu râng dêi hnoăng ƀă mâu ngế ki roê kâ kế tơmeăm.

Tung kơ’lo kơphế ki châ tiô pơkâ 3 hơlŏng Tơdroăng rêm to cheăm môi to kế tơmeăm OCOP ai inâi dêi khu pêi cheăng tơrŭm, ngoh Suân, hdroâng kuăn ngo Bơhnéa, chôu vế rôh nah:

“Drêng lâi xuân chĕn. Hơnăm ki lâi xuân laih nôu chiâng ai laih kuăn, rế ton mê chĕn rế hên. Hên ngế vâi tê hngêi tê tơnêi vâ mơdrếo chĕn. Nhŏng o tung pơlê bô bố xuân khéa. Nah kế ki lâi xuân ai pơkeăng, rêm ngế pơrá ai môi túa ki châi tamo rế hía rế râ, mê nếo ‘mêi ‘na hyôh kong prâi. Tiah ngin rơhêng vâ hơ’lêh túa tơmiât tơrêm rơpŏng hngêi, pêt mơjiâng klâi athế krúa ăm kong prâi tơnêi tíu, krúa ăm plâi tơnêi kố, mê á pơkâ tơrŭm ƀă khu pêi cheăng tơrŭm pêi kơphế krúa”.

Pêt tiô pơkâ ki châ mơnhên lâp plâi tơnêi ‘na kơphế krúa, rak tơniăn ivá ăm ngế ki pêt ƀă rak vế hyôh kong prâi (khê̆n cho UTZ), sap ing hơnăm ki apoăng, kơxô̆ liăn ‘no hrê apoăng hiăng kơdroh lối 50% tâng vâ pơchông ƀă hdrối. Túa pêi kố krá tơniăn drêng kuăn pơlê hdroâng kuăn ngo Bơhnéa a tơring Đăk Đoa hlo ngăn hlo ƀă mâ, châ pêi tơrêm kơpâu kơphế tum ki Khu pêi cheăng tơrŭm Lam Anh roê xo ƀă yă kơnâ tâk péa hdroh troh 3 hdroh tâng vâ pơchông ƀă yă kơchơ roê.

Bu klêi kơ’nâi 2 hơnăm, kơpong pêt kơphế krúa hiăng mơdêk ƀăng tơnêi pêt tâk troh 100 hdroh. Ngoh Uê, ngế ki cheăng tung Khu pêi cheăng tơrŭm Lam Anh đi đo hbrâ rơnáu troh a rêm to chiâk pêt kơphế hnê kih thuât ăm vâi krâ nhŏng o, vâ bô bố xuân châ rêh ối ivá mo lĕm, hơniâp:

“Sap ing hơnăm 2020, 100 rơpŏng xuân veăng tung tơdroăng kố. 100 rơpŏng lăm ngăn kơdrum, hnê tối ăm vâi krâ nhŏng o pôi tá xôh pơkeăng kơdê nhâ, pơkeăng tâ tung kơƀin ki tơnêi têa mơdât, athế xúa mâu kơtôu, kông hnông dêi mâu kế tơmeăm pêt pro phon. Á xuân lăm hnê, lăm troh a hngêi ki lâi vâi xuân tiô”.

Vâ rak vế tơniăn tíu tê ăm mâu ngế ki cheăng tung khu tơrŭm ƀă yă kơnâ, mê athế tối troh tơdroăng ki ngăn tung la ngiâ dêi Kăn pơkuâ khu pêi cheăng tơrŭm, ngoh Lê Hữu Anh. Lê Hữu Anh kot mâ hơnăm 1986 cho ngế ki ai tuăn tơmiât hơ’lêh kân má môi xua hdrối nah, rơpŏng ngoh cho tíu ki tê phon rơvât, pơkeăng xôh kơdê oâ hdrong kân má môi a tơnêi Glar.

Châ hlo tơdroăng ki kuăn pơlê roê hên luâ râ pơkeăng hoă hok vâ xôh ăm dêi loăng kơphế, ngoh mơhnhôk vâi krâ nhŏng o pơtê lôi tơdroăng ki hmâ ki ton vâ pêt kơphế krúa, krá tơniăn, rak vế ivá rơdêi ăm kuăn pơlê xuân cho tơdroăng ki pro ăm ai kloăng kơphế tíu kố mơ-eăm lăm troh a hên kong têa tung lâp plâi tơnêi:

“Tâng tá hâi ai Khu pêi cheăng tơrŭm, tá hâi ai tơdroăng ki pro, tá hâi ai tơdroăng ki hơ’lêh môi tiah kố mê kuăn pơlê ki pêi chiâk pơrá pêt tiô túa tơmiât, tiô troăng ki ton, tiô tiah hmâ. Á veăng tơrŭm tung kố mê gá hơ’lêh, hơ’lêh tro ‘ló ƀă á athế mơnhên mê cho tơdroăng pêi ki ton xŏn. Á pro pơkâ ton xŏn, krá tơniăn, gá xuân tơtro”.

Sap ing mâu kăn pơlê ki pêi chiâk ki lĕm kô ai môi kơvâ pêi chiâk deăng kong kế, môi pơlê pơla ivá rơdêi. Cho hơniâp khât, túa pêi chiâk deăng pôu râng dêi hnoăng, krá tơniăn kố dế ré hía rế tơdjâk troh lâp lu, sap ing mâu ngế ki ai hiâm mơno mơ-eăm môi tiah “mâu kuăn pơlê ki kơniâp ro” a cheăm Glar, ăm ngin tơdroăng ki loi tơngah ‘na mâu kơpong thôn pơlê nếo xông tơtêk krá ton.