Sap ing kơxo má, lối hrĭng ngế kuăn pơlê a cheăm tơkăng kong Ia Rvê hiăng tơkŭm troh a tíu pêi cheăng dêi cheăm veăng tung tơdroăng “Rơnó Hơngui tíu tơkăng kong hơtô hiâm mơno kuăn pơlê” ƀă hên tơdroăng cheăng pêi ai pơxúa, môi tiah: “Hâi kơxuô kơƀăn tơxông”, “tơkŭm khăm pơlât, hbru pơkeăng tê kơtê, khăm ngăn ivá ăm kuăn pơlê”, “kơbong ki mơđah tê tơmeăm 0 liăn” ƀă mâu tơdroăng ki xah hêi tiô chal krâ nah tiô khôi túa tơlá a tíu kố.

Troh veăng tung tơdroăng kố ƀă châ khăm ƀă hbru pơkeăng tê kơtê, pôa Trần Kế Toán, a thôn 11, cheăm Ia Rvê phiu ro ăm ‘nâi, tơdroăng kố hiăng bro lĕm ăm tơdroăng tơrŭm pơla khu lêng ƀă kuăn pơlê hơniâp ro rơnó Hơngui tơdah Têt, mơ-eăm tâ nếo tung mơnhông cheăng kâ, pơlê pơla, mơjiâng kơpong tơkăng kong rế tơ’nôm krá rơdêi:

“Tơkŭm po tơdroăng “Rơnó Hơngui tíu tơkăng kong hơtô hiâm mơno kuăn pơlê a pơlê” kố cho pơxúa khât, mơhno tối tơdroăng tơmâng ngăn dêi Đảng, Tơnêi têa, mâu kăn pơkuâ ƀă kố xuân mơhno tơdroăng ki tơrŭm pơla khu lêng ƀă kuăn pơlê. Tâi tâng rêm ngế kuăn pơlê akố pơrá phiu ro, mơhnhôk vâi krâ nhŏng o kuăn pơlê ‘mâi mơnhông tơdroăng xơpá, mơ-eăm mơnhông cheăng kâ rêh ối pơlê pơla, xut tah hrâ mơnguâ kơtiê”.

Đăi tă Phạm Hữu Chiến, kăn pơkuâ hnê ngăn Đảng, kăn pơkuâ xiâm Đảng Mố đô̆i gak tơkăng kong dêi kong pơlê Dak Lak ăm ‘nâi, tơdroăng “Rơnó Hơngui tơkăng kong hơtô hiâm mơno kuăn pơlê a pơlê” châ tơkŭm po rêm hơnăm vâ veăng hơlêm mâu tơdroăng ki xơpá, kum kuăn pơlê mâu hdroâng kuăn ngo a kơpong tíu tơkăng kong ai Têt phâi tơtôu. Hơnăm kố,tơdroăng kố diâp 3 toăng hngêi “hngêi hơtô tíu tơkăng”; kơxuô 2.800 ‘noăng kơƀăn tơxông ngiât; hbru 220 hnoăng tơmeăm ăm mâu rơpŏng ki ai hnoăng tơnêi têa, rơpŏng ai tơdroăng rêh ối xơpá; tơdrêng a mê hlối hbru ăm 57 ngế muăn hok tro dế châ Mố đô̆i gak tơkăng kong tŏng kum tung tơdroăng “Chông djâ hvêa chêng o troh hngêi trung” ƀă “Kuăn roăng mố đô̆i gâk đông a tơkăng kong”; khăm, pơlât ivá, hbru pơkeăng tê kơtê ăm dâng 300 ngế.

Đăi tă Phạm Hữu Chiến tối nhên, tơdroăng kố rế cho hnoăng tŏng kum rế cho tơdroăng ki mơnê dêi Mố đô̆i gâk tơkăng kong ƀă vâi krâ nhŏng o a tíu tơkăng kong:

“Tơdroăng “Rơnó Hơngui tíu tơkăng kong tơtôu hiâm mơno kuăn pơlê a pơlê” ối cho tơdroăng ki pâ mơnê kuăn pơlê mâu hdroâng kuăn ngo kơpong tíu tơkăng kong tung hnoăng cheăng mơjiâng, rak ngăn, rak vế hnoăng pơkuâ tơnêi tơníu, gak kring tíu tơkăng kong tơnêi têa tung mâu hơnăm hdrối nah. Tơdroăng kố châ tơkŭm po a cheăm Ia Rvê hâi kố cho tơdroăng cheăng ki pơxiâm ăm tơdroăng cheăng dêi kăn ƀô̆, lêng Mố đô̆i gak tơkăng kong dêi kong pơlê a 4 to cheăm tơkăng kong, tơdjuôm ivá xua môi rơnó hơngui hơtô, môi rơnó Têt tơkŭm ăm kuăn pơlê mâu hdroâng kuăn ngo tíu tơkăng kong”.

Phiu ro drêng troh veăng a tơdroăng “Rơnó Hơngui tơkăng kong hơtô, hiâm mơno kuăn pơlê a pơlê” rơtế ƀă kăn ƀô̆, lêng ki krâ kơlŏng ngiât ƀă vâi krâ nhŏng o kuăn pơlê cheăm Ia Rvê, pôa Y Ƀiêr Niê, Kăn phŏ pơkuâ hnê ngăn Đảng kong pơlê Dak Lak ăm ‘nâi, tơdroăng kố cho cho hâi mơdĭng dêi kuăn pơlê mâu hdroâng kuăn ngo a tíu tơkăng kong; bro chiâng tơdroăng cheăng ai pơxúa, ai hên ki dâi lĕm ‘na mơhno túa lĕm tro hdroâng kuăn ngo, pro pơxúa hơniâp, tơdroăng ki hâk phiu ăm vâi krâ nhŏng o drêng rơnó Hơngui troh.

Pôa Y Ƀiêr Niê khĕn kơdeăn mâu kăn ƀô̆, lêng gâk tơkăng kong dêi kong pơlê hiăng đi đo tối nhên châ hnoăng cheăng dêi khu lêng tơplâ, đô̆i lêng hnoăng cheăng, khu lêng pêi cheăng kâ, a lâi kal ai mố đô̆i, tơdroăng cheăng klâi xơpá ai mố đô̆i. Mố đô̆i gâk tơkăng kong dêi kong pơlê rế pêi klêi hnoăng cheăng rak ngăn hnoăng pơkuâ tơnêi tơníu, gâk kring tơkăng kong tơnêi têa, rế cho khu lêng djâ troăng ahdrối veăng kơdroh tah hrâ mơngoâ kơtiê, rak ngăn ivá châ chăn kuăn pơlê, mơnhông cheăng kâ rêh ối pơlê pơla a cheăm tơring tơkăng kong ki ối hên xơpá:

“Ki kơnía khât ki tơdroăng “Rơnó Hơngui tíu tơkăng kong hơtô, hiâm mơno kuăn pơlê a pơlê” pro pơxúa khât cho mơhno hnoăng cheăng, hiâm mơno, tơdroăng pâ mơnê dêi mâu lêng mố đô̆i gak tơkăng ƀă kuăn pơlê dế hâi măng rơtế ƀă Mố đô̆i gak tơkăng kong pêi cheăng, bro “tơneăn tâp hdró” tíu tơkăng kong; tối nhên ‘na tơrŭm pơla khu lêng ƀă kuăn pơlê tơrŭm, tâk péa hdroh ivá rơdêi, tơdroăng loi tơngah, hiâm mơno khŏm mơ-eăm rơtế ƀă dêi rơpó rak vế krá rơdêi hnoăng pơkuâ tíu tơkăng kong dêi Tơnêi têa”.