-Koh kơ ngoh Y Phen Niê, ngoh tối ăm ‘nâi túa pêi cheăng dêi ngoh tung tơdroăng cheăng dêi khu ƀă tơdroăng pêi chiâk?

Đảng viên Y Phen:  Cho Kăn hnê ngăn Khu kuăn pơlê pêi chiâk cheăm Dray Sáp ƀă xuân cho mơngế đảng viên, a đi đo pê klêi tŭm tơdroăng cheăng ki pơcháu, đi đo pêi ahdrối ki ê hlo ƀă djâ troăng a hdrối tung tŭm tơdroăng vâ kuăn pơlê pêi ƀối. Vâ kuăn pơlê hlo tơdroăng ki a pêi châ tơƀrê, kuăn pơlê  loi ngah ƀă pêi ƀối.

Á xuân hnê kuăn pơlê pêi cheăng kâ vâ xông tơƀrê tâ, vâ tơdroăng rêh ối rế tơniăn. Tung rơpŏng hngêi xuân djâ troăng ahdrối mơhnhôk hdrối cho kơdrâi kuăn,  klêi mê nhŏng o hdrông hdrê pơlê pơla rêh ối rak tro tiô luât, kơhnâ pêi cheăng kâ, djâ troăng ahdrối ăm kuăn pơlê pêi ƀối. Cho môi ngế đảng viên Đảng kŏng sản Việt Nam a thế djâ troăng a hdrối tung mâu tơdroăng cheăng, hnê ăm kuăn pơlê troăng rơhlâ dêi Đảng, Luât tơnêi têa vâ kuăn pơlê hlê, vâ kuăn pơlê pêi ƀối. Ing mê, kuăn pơlê tơrŭm môi tuăn dêi rơpó tâ, tung tŭm tơdroăng cheăng a pơlê.

-Nôkố ngoh cho môi tung iâ mơngế tung khu kuăn pơlê ki pêi chiâk cheăm Dray Sap pê lo liăn hên châ tơdế rơtal liăn rêm hơnăm sap ing păn mơnăn troh pêt loăng plâi, ngoh hôm ai tơdroăng vâ tối klâi tơdroăng ki tơná pêi cheăng châ môi tiah mê, ô ngoh?

Đảng viên Y Phen: Rơpŏng hngêi a ai lối 5 ha tơnêi pêi loăng plâi mơnhông cheăng kâ. Ngin pêt báu klâng, pêt tiu, kơxu, kơphế... Rêm hơnăm rơpŏng hngêi a pêi xuân châ vâ chê 500 rơtuh, ôh tá riân kơxô̆ liăn ‘no rôe hdrê, phon pơkeăng mơhá hnoăng vâi pêi ki u ối rơpŏng a ối châ xo dêi lối 300 rơtuh liăn... Pakĭng mê, rơpŏng hngêi ai meăn pro 2 to kơdroăng chu rơdâ lối 200 met kơrê, păn 5-6 to chu kăn, mâu chu ai kuăn râk păn vâ tê. Nôkố dâng 50-60 to chu, rêm khu chu tê dâng 4 tâ̆n hơ’nêh.  

-Pakĭng pêi chiâk tê mơdró rơkê, ngoh ối djâ troăng ahdrối tung tơdroăng veăng tơlo liăn tung tŭm tơdroăng ki vâ mơjiâng thôn pơlê nếo a pơlê cheăm. Pâ  ngoh tối tơdroăng ki kal mê?

Đảng viên Y Phen:  Tung tơdroăng mơhnhôk mơjiâng thôn pơlê nếo a xuân djâ troăng ahdrối mơhnhôk kuăn pơlê ƀă mơnhông cheăng kâ, rak tơniăn tung kuăn pơlê, mơjiâng tơdroăng rêh ối phâi tơtô. Ƀă hnoăng cheăng dêi 1 ngế đảng viên a  ngế ki mơhnhôk pêi pro tŭm tơdroăng cheăng, tơnêi têa ƀă kuăn pơlê rơtế pêi, mơjiâng thôn pơlê nếo tơƀrê. A đi đo hnê pơchân kuăn pơlê thế đi đo môi tuăn, hlối mơjiâng kuăn pơlê rế ton rế mơnhông tơƀrê ƀă tơtô tâ.

-Cho Kăn hnê ngăn Khu kuăn pơlê pêi chiâk cheăm Dray Sáp, mâu hơnăm hdrối tơdroăng veăng kum kuăn pơlê ‘na kih thuât, liăn, hdrê pêt... vâ kuăn pơlê mơnhông cheăng kâ kơdroh kơklêa xăm kơtiê pêi pro môi tiah lâi, ô ngoh?

Đảng viên Y Phen: Cho Kăn hnê ngăn Khu kuăn pơlê, a đi đo  tơkŭm ƀă mâu kŏng ti, khu mơdró, mâu kih sư ngăn kuăn pơlê pêi chiâk vâ kơjo kum kih thuât troh kuăn pơlê tung pêi chiâk, pêt tiu kơphế, kơxu, mâu loăng plâi kâ, păn ro, chu, í, pú pái... vâ  kuăn pơlê  achê ƀă khoa hok kih thuât ki nếo má môi nôkố, xúa tung pêi chiâk vâ loăng plâi kơtóu hên, tơƀrê ƀă châ  xo tơ’mot liăn ăm kuăn pơlê. 

Pakĭng mê, a đi đo tơrŭm ƀă mâu khu tơkŭm mung liăn, tăng liăn mung pro tơ’lêi hlâu kum kuăn pơlê ƀă ki xơpá ai liăn ‘no pêi cheăng kâ, rơtế ƀă dêi rơpó  mơnhông  tơƀrê, tăng tơ’nôm kơxô̆ liăn mơnhông mâu rơpŏng hngêi.

-Mơnê kơ ngoh!