Nôkố, kơpong hdroâng kuăn ngo ƀă peăng kong ngo hiăng ƀă dế cho “ki xiâm ‘na tơdroăng kơtiê dêi lâp tơnêi”. Ki nhên, pêi lo liăn rêm ngế dêi rơpŏng hdroâng kuăn a hên tíu bu dâng 40 – 50% rêm ngế pêi lo tung kơpong; kơxô̆ pơ’leăng mâ mơngế hdroâng kuăn ngo châ 14,7% la kơxô̆ rơpŏng kơtiê châ vâ chê 60% tung tâi tâng kơxô̆ rơpŏng kơtiê dêi lâp tơnêi têa.

Ƀă tơdroăng pơkâ ‘Pro kơdroh kơtăn ‘na kơlo rêh, pêi lo liăn dêi kơpong hdroâng kuăn ngo ƀă peăng kong ngo tâng pơchông ƀă rêm ngế tơdjuôm dêi lâp tơnêi; troh hơnăm 2025 kơdroh 50% kơxô̆ cheăm, thôn, pơlê ki malối xơpá; troh hơnăm 2030 ôh tá ai xếo cheăm, thôn, pơlê, kơtâu ki xơpá”, Kuô̆k hô̆i hiăng kĭ pơkâ tâi tâng kơxô̆ liăn lối 137 rơpâu rơtal vâ pêi pro Tơdroăng pơkâ dêi tơnêi têa ‘na mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong pơla hơnăm 2021 – 2030, ƀă 10 tơdroăng tơkêa, 14 kơpong tơdroăng tơkêa ƀă 36 tơdroăng ‘no liăn cheăng, tŏng kum nhên tung hneăng má 1 sap ing nôkố troh tâi hơnăm 2025.

Tơdroăng ki nếo tung tơkŭm pêi pro cho ki teăng tơdroăng tŏng kum tơdrêng, tŏng kum ai tơdroăng pơkâ ăm hdroâng kuăn ngo, Tơdroăng kố tơkŭm hriăn ngăn ƀă po rơdâ mâu túa pơkâ mơnhông mơdêk tiô tơdroăng ki kơnía, mơjiâng kơpong pêt kế tơme ăm vâ tí tăng mâu kế tơmeăm ki hiăng ai hlâu pơxúa tiô troăng hơlêh mâu hdrê pêt, mơnăn păn châ tơƀrê, tăng cheăng pêi, mơdêk pêi lo liăn ăm rơpŏng kuăn pơlê, kơdroh kơtiê krá tơniăn.

Tơdrêng amê hlối mơdêk hiâm mơno pơxiâm vâ pêi cheăng tung hdroâng kuăn ngo ngăn tung tơdroăng ki ai hlâu, ki rơdêi ƀă kong kế ki ai hlâu ai a kong pơlê. Tiô Tiê̆n sih Hà Việt Quân, Tôh mơjiâng pro tơdroăng tơkêa tâi tâng ƀă Tơdroăng pơkâ tơnêi têa mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo pơla hơnăm 2021 – 2030.

“Chiâng vâ tối cho rôh apoăng sap nah tá hâi chói ai kơvâ hnoăng cheăng hdroâng kuăn ngo hiăng châ hlo Đảng ƀă Tơnêi têa khŏm mơ-eăm tơkŭm ivá ‘no liăn ăm kơpong kố, vâ pro hơ’lêh tơdroăng tiô túa ki tâi tâng. Tiah mê tơdroăng ki lâi kal má môi tung xúa liăn kố, tơdjâk troh tơdroăng ki athế hơ’lêh túa xúa liăn tung mơnhông mơdêk cheăng kâ kơpong hdroâng kuăn ngo, mê cho rôh apoăng ngin ngăn kơpong kố cbo kơpong ki ‘no liăn mơnhông vâ ai troăng hơlâ ‘no liăn, ôh ti xê hmôu pơ pêi pro tiô troăng hơlâ tối cho tŏng kum môi tiah hneăng hdrối”.

Ƀă tơdroăng pơkâ mơdêk ki rơkê plĕng ƀă hơ’lêh tơdroăng pêi cheăng, Tơdroăng kố xuân pơkâ ăm tơdroăng ki kal mơnhông hnê hriâm tơdroăng cheăng ƀă tăng cheăng pêi ăm mâu ngế pêi cheăng kơpong hdroâng kuăn ngo ƀă peăng kong vâ rak tơniăn ƀă mơnhông cheăng kâ ôh tá ối tung tơdroăng pêi chiâk deăng. Tơdroăng kố xuân hiăng kơchuâ chêh krê ăm tơdroăng tơkêa ƀă mơnhông hnê hriâm, mơnhông ki hlê plĕng ăm hdroâng kuăn ngo ƀă peăng kong ngo vâ mơdêk kơlo ki châ xúa ‘na ki hlê plĕng ăm hdroâng kuăn ngo tơtro ƀă mơnhông ôm hyô pơlê pơla ƀă hên ki ê.

Pôa Vũ Dương Châu, kăn ngăn Hdroâng kuăn ngo hneăng hdrối, Vi ƀan Măt trâ̆n Tơnêi têa Việt Nam tối nhên:

“Pin kal tơkŭm pơkâ tơleăng mâu tơdroăng ki hêng hôu, xơpá tâ dêi hdroâng kuăn nôkố, pro ton hên hơnăm, tung 1 péa hdroâng kuăn ngo xo, môi tiah tơdroăng ki pâk chik, ôu kế ki mơdât nôkố, tơdroăng ki xo on veăng tá hâi tro hơnăm, xo on veăng ối môi mơheăm chhá, malối cho kơdroh kơxô̆ rơpŏng kơtiê, mơjiâng bro hngêi trăng troăng klông, tíu xiâm cheăm, pro ivá xiâm ăm mâu kơpong ki ê, malối kal pơkâ tíu kuăn pơlê rêh ối tơkŭm kal ai sap ing 40 rơpŏng tơngi klêng, vâ ví tơdroăng tơnêi tơhnah tơhnâp, têa mơhiu. Má pái cho ‘no liăn kum mâu hdroâng kuăn ngo mơnhông kế tơmeăm, mơdêk rơdêi tơdroăng ki hnê cheăng, tăng cheăng pêi ki ôh tá ối tung pêi chiâk deăng, mơhnhôk mâu khu mơdró kâ veăng, hơ’lêh troăng hơlâ rak ngăn kong. Ƀă tơdroăng ki hnê hriâm mê pin pơtối mơnhông, mơdêk hiâm mơno rơkê ăm kuăn pơlê, hnê mâu ngế pêi cheăng, rak tơniăn rơkê chal 4.0, vâ hdroâng kuăn ngo teăm ‘nâi chal 4.0 kố"

Troh nôkố, kơxô̆ liăn dêi Tơdroăng hiăng châ xing xoăng. Rêm râ mâu kơvâ cheăng mâu kong pơlê kal tơdjuôm ivá, mơdêk rĕng tơdroăng ki tơbleăng mâu tơdroăng ki kal, tơdroăng cheăng dêi Tơdroăng pơkâ kố, tung mê pơkâ bro ƀă mơdêk tơbleăng mâu túa pơkâ mơnhông cheăng kâ tơƀrê; rĕng pêi klêi ƀă ăm xúamâu hngêi trăng troăng klông tung bro, xúa, pro tơ’lêi hlâu hơ’lêh túa ki hlê plĕng, mơdêk rơkê tung rêh ôí, mơdêk pêi lo liăn ăm kuăn pơlê hdroâng kuăn ngo sap ing hơnăm ki apoăng tơbleăng Tơdroăng.

Rơkong tơpui tối dêi pôa Trần Đức Anh, kăn pơkuâ ngăn Đảng ủy cheăm Hương Liên, tơring Hương Khê, kong pơlê Hà Tĩnh:

“Tung pơla hdrối nah, pêi pro tơdroăng pơkâ rak vế hdroâng kuăn ngu Chứt, tơdroăng rêh ối hdroâng kuăn ngo xuân ai hên tơdroăng ki hơ’lêh, maluâ tiah mê tung la ngiâ ah, Đảng ủy khu kăn pơkuâ xuân rơhêng vâ kong pơlê, Tơnêi têa rĕng ai pơkâ pơcháu tơnêi kong ăm hdroâng kuăn ngo vâ hdroâng kuăn ngo ai tíu ki pei cheăng kâ”.

Pakĭng tơdroăng ki ‘mâi rơnêu hngêi trăng troăng klông ki kal mê mơnhông mơdêk cheăng kâ rêh ối pơlê pơla a mâu kong pơlê hdroâng kuăn ngo kal châ tơmâng ngăn mơdêk rơdêi tơrŭm mơjiâng kế tơmeăm tiô tơdroăng ki kơnía, tŏng kum tơdroăng rêh ối hiâm mơno dêi kuăn pơlê rơtế prôk ƀă tŏng kum pơxiâm vâ pêi cheăng, pơxiâm tê mơdró vâ hdroâng kuăn ngo mơeăm pro kro mơdrŏng. Cho hơnăm ki apoăng pêi pro tơdroăng pơkâ tơnêi têa, tơdroăng ‘mâi mơnhông mơdêk cheăng kâ klêi kơ’nâi ai pơreăng COVID-19 loi tơngah kố cho troăng hơlâ rế veăng kum mơdêk cheăng kâ, rế rak tơniăn tơdroăng rêh ối cheăng kâ pơlê pơla.