Pêi pro troăng hơlâ bro kơdrum tiô túa pơkâ, pôa Trần Anh Lang, a thôn Mỹ Sơn, cheăm Duy Phú, tơring Duy Xuyên, kong pơlê Quảng Nam djâ troăng ahdrối ‘mêng rơnêu pêi kơdrum dêi rơpŏng, rơdâ vâ chê 2 ha vâ pêt mâu hdrê loăng ki tê kơnâ liăn môi tiah: krui ƀŏng, krui ngeăm, alâi ƀă hên ki ê.

Pôa Trần Anh Lang ăm ‘nâi, hdrối nah kơdrum kố ki hên cho pêt mâu hdrê ki iâ khế, tê ôh tá châ liăn hên. Châ khu kăn pơkuâ cheăm tơmâng ngăn tŏng kum, pôa Lang hiăng pơxiâm ‘mêng rơnêu pêi dêi kơdrum tiô túa nếo.

Nôkố, kơdrum dêi pôa Trần Anh Lang hdrê loăng plâi kơtóu lĕm ƀă pro pơxúa tơƀrê ‘na pêi lo liăn. Pôa Trần Anh Lang ối pêt tơvât mâu hdrê ki iâ hâi môi tiah prá, tiăn, kơchâi krúa, hlối păn ká vâ pêi lo tơ’nôm liăn.

“Mơjiâng bro klêi kơdrum tiô pơkâ, má môi cho tơƀrê ‘na liăn ngân rơpŏng hngêi, tơdrêng amê hlối hnê túa ki pêi cheăng kâ ăm mâu rơpŏng ki ê. Tơnêi têa tŏng kum ăm pin drêng pêi kơdrum tiô pơkâ cho 5 rơtuh liăn ƀă kơdrum ki kố hiăng pro pơxúa tơƀrê khât ‘na liăn ngân pêi lo”.

Ôh ti xê to krê rơpŏng pôa Trần Anh Lang, sap ing pêi pro túa pơkâ kơpong kuăn pơlê rêh ối thôn pơlê nếo tiô túa pơkâ, hên rơpŏng kuăn pơlê a cheăm Duy Phú, tơring Duy Xuyên, kong pơlê Quảng Nam hiăng hơ’lêh túa tơmiât, túa pêi vâ pro chiâng ai mâu kơdrum ki ai kong kế, nhâ loăng, têa, tơnêi tơníu krúa lĕm, veăng kum mơdêk pêi pêt kế tơmeăm, mơnhông cheăng kâ mơdêk pêi lo liăn.

Jâ Trần Thị Dương, Kăn hnê ngăn Vi ƀan cheăm Duy Phú, tơring Duy Xuyên ăm ‘nâi: Troh nôkố tâi tâng cheăm hiăng rơnêu lĕm, mơjiâng bro 70 kơpong kơdrum, tâi tâng ƀăng tơnêi ai 15 ha, tung mê, 10 to kơdrum tiô túa pơkâ. Túa pơkâ kơdrum pêi tiô túa nếo châ kơchuâ chêh ƀă pêt loăng tiô pơkâ, rế hía rế pro pơxúa tơƀrê cheăng kâ, mơdêk pêi lo liăn ăm kuăn pơlê pêi chiâk. Tiô jâ Trần Thị Dương, troh nôkố kơxô̆ rơpŏng kơtiê dêi cheăm ối 4,88%, pêi lo liăn rêm ngế châ lối 47 rơtuh liăn tung môi hơnăm.

“Mâu túa pơkâ kơdrum pêi tiô túa nếo hiăng mơdêk ki hlê plĕng ăm kuăn pơlê, ing mê, mâu rơpŏng ki a chê hriâm tâp pêi pro tiô ƀối pêi châ tiô tơnêi tơníu dêi kơdrum vâ pêt mâu túa hdrê loăng ki pro pơxúa tơƀrê ‘na liăn ngân, ki kal tâ cho bro chiâng kong prâi tơnêi tơníu rêh ối krúa lĕm. Khu kăn pơkuâ cheăm kum hdrê pêt, po lâm hnê khoa hok kih thuât ăm kuăn pơlê, vâi krâ nhŏng o bu xing xoăng tơnêi ƀă rak ngăn xo”.

Pakĭng kum rêm rơpŏng 5 rơtuh liăn tơbleăng túa pơkâ pêi kơdrum tiô túa pơkâ, tơring Duy Xuyên, kong pơlê Quảng Nam mơdêk rơdêi hnoăng cheăng hnê tối, mơhnhôk kuăn pơlê mơdêk ki hlê plĕng rak vế mơgrúa lĕm kong prâi tơnêi tơníu. Tơdrêng amê hlối tiâ mơnhên, ăm hdrê loăng pêt ki nếo plâi kơtóu lĕm vâ mơdêk ki kơnía tung pêi chiâk deăng kơpong pei chiâk deăng, thôn pơlê tiô troăng ôm hyô kong kế nhâ loăng têa ƀă châ lăm ngăn.

Pôa Đặng Hữu Phúc, kăn phŏ hnê ngăn Vi ƀan tơring Duy Xuyên, kong pơlê Quảng Nam ăm ‘nâi: Mâu hơnăm hdrối nah, kơvâ pêi chiâk deăng ƀă khu kăn pơkuâ cheăm tơring tŏng kum kuăn pơlê lối 1 rơtal liăn vâ ‘no liăn mơjiâng bro kơdrum tiô pơkâ. Ing mê, hiăng pro hơ’lêh sap ing tơdroăng ki hlê plĕng troh tơdroăng pêi pro dêi rêm ngế kuăn pơlê tung mơnhông cheăng kâ kơdrum ki bro lĕm ăm tơnêi tơníu thôn pơlê, ai ivá rêh ối tơniăn.

“ ‘Na ki tơƀrê ƀă mâu kơdrum ki pêi tiô pơkâ, pakĭng bro tâ tá tơnêi tơníu ngiât, krúa lĕm, tơdrêng amê hlối tơrŭm kum kuăn pơlê krí xo dêi kế tơmeăm ing kơdrum ki mê, hơ’lêh tơdroăng rêh ối cheăng kâ dêi rơpŏng hngêi. Sap ing kơxô̆ liăn pơkâ dêi tơnêi têa mơjiâng thôn pơlê nếo, tung mê ai tŏng kum mâu tơdroăng pơkâ ăm mâu rơpŏng kuăn pơlê vâ pêi dêi kơdrum mơjiâng tơnêi tơníu kong prâi, kum tơdroăng reh ối cheăng kâ ăm mâu rơpŏng kuăn pơlê. Kơxô̆ liăn ‘no kố hiăng mơdêk tơƀrê khât ƀă rêm to kơdrum pêi tiô pơkâ”.

Nôkố, kong pơlê Quảng Nam ai 170 kơpong kuăn pơlê rêh ối thôn pơlê nếo tiô túa pơkâ ƀă lối 250 túa pơkâ pêi kơdrum tiô túa nếo. A rêm to kơdrum, kuăn pơlê xúa khoa hok kih thuât môi tiah krâ ‘măn kơmăi tôh têa ki chiâng tiê ing hngế, lơ xúa hdrê pêt ki nếo tung pêi pêt ăm tơƀrê ‘na liăn ngân.

Rêm ngế, rêm kơdrum kố pêi châ liăn sap ing 150 troh 200 rơtuh liăn tung môi hơnăm. Pôa Hồ Quang Bửu, kăn phŏ hnê ngăn Vi ƀan kong pơlê Quảng Nam ăm ‘nâi: Tơdroăng ki mơjiâng kơpong kuăn pơlê rêh ối tiô túa pơkâ, mơjiâng bro kơdrum pêi tiô pơkâ pơxiâm pro pơxúa tơƀrê, bro ivá vâ tơmiât troh ivá pêi chiâk deăng krúa, kế tơmeăm pêt tung tơnêi deăng hưh cơ, rế hía rế mơjiâng tơnêi tơníu kong prâi kong kế krá tơniăn.