Tơdroăng meăn pro tơmeăm ƀă tơnêi hneăn dêi hdroâng kuăn ngo M’nông a cheăm Yang Tao, tơring Lak, kong pơlê Dak Lak sap ing nah hiăng ai hên ngế ‘nâi. Laga, tiô hâi khế hơnăm tơdroăng cheăng pro tơmeăm tiô túa roh  nah mê hiăng vâ hiât lôi. Hlo tơdroăng mê, drêng tơdroăng pơkâ rêm cheăm môi tơmeăm châ tơbleăng pêi pro a  cheăm, mâu kăn cheăm hiăng mơhnhôk kuăn pơlê chêh inâi veăng pro tơmeăm ing ‘’Tơnêi hneăn tiô khôi hmâ ton nah dêi mơngế M’nông’’ vâ mơnhông mơdêk kơxô̆ liăn pêi lo ăm kuăn pơlêƀă pơtối rak vế, rak tơdroăng pro tơmeăm ƀă tơnêi hneăn a cheăm.

Pôa Y Wu Sruk, Kăn phŏ hnê ngăn Vi ƀan cheăm Yang Tao, tơring Lak ăm ‘nâi:

“Ngin dế pơtối rak vế pơlê pêi pro tơmeăm tiô túa ton nah xuân púi vâ mơnhông mơdêk ƀă châ tê. Nôkố ngin hiăng chêh inâi vâ châ tơbriât pơxá inâi tơmeăm khoăng OCOP. Nôkố ai hên ngế tơmối troh a tơring Lak ai mot ngăn a pơlê pro tơmeăm mê hlo ƀă mâ ngăn mâu ki rơkê meăn pro. Châ  khât tung cheăm ai mâu hơnăm ối nếo tơmiât troăng rơhlâ vâ pêi cheăng mơdêk ôm hyô tung kuăn pơlê.

 Tiô pơkâ dêi khu kăn xiâm Đảng ƀô̆ tơring kô mơjiâng tơring Lak chiâng tíu xiâm ôm hyô ngăn dêi kong pơlê Dak Lak la ngiâ troh hơnăm 2030, mâu ngế rơkê mơjiâng pro mâu tơmeăm pơlê cheăng pro tơmeăm tiô túa ton nah  meăn tơmeăm ƀă tơnêi hneăn hnê ăm tâi tâng rêm pơlê cheăm ki ê ‘nâi ‘na tơmeăm dêi tơná pêi pro ƀă tơnêi hneăn’’.

Ki khât ăm hlo, Tơdroăng rêm cheăm môi tơmeăm hiăng mơhnhôk hên ngế ai tuăn tơmiât ki nếo, mâu tơmeăm pêi lo ki nếo a rêm tíu dêi mâu cheăm tơring. Pôa Hoàng Mạnh Cường, Ngế pơkuâ Kŏng ti pêi cheăng tiô rơnó môi tung khu Kiên Cường, ối a bêng Tân Tiến, pơlê kong kơdrâm Ƀuôn Ma Thuột ƀă tơmeăm “Kơphế kơchiâk xú hŏm Kiên Cường’’ hiăng châ mơnhên tơmeăm OCOP  4 hơlŏng tối: Veăng pêi tơdroăng OCOP cho rôh vâ mâu khu mơdró mơnhông tơmeăm pêi lo lĕm tâ, pêi hên túa lĕm mơnâ mâ, plâi hlối dâi lĕm, mơdêk tơbriât  tê a kơchơ”.

“Ki khât gá ƀă rêm cheăm môi khu, rêm cheăm môi tíu pêi cheăng gá xuân ai tơdroăng hơ’muăn tối krê xêh tâi. Ki khât gá tơdroăng hơ’muăn dêi rêm cheăm môi tơmeăm, rêm khu gá pơrá phá dêi rơpó. Xua ing tơdroăng hơ’muăn mê  gá môi tiah rôh  vâ tối nhên ăm kơ koan rak ngăn, tối nhên ăm kơchơ  tê mơdró, ăm mơngế rôe xúa ‘nâi hlê nhên tâ ‘na ki khât dêi tơmeăm mê.

Xua rêm cheăm môi tơmeăm nôkố vâi ôh tá pâ klâi ‘na ki tơƀrê pakĭng mê tơmeăm pê lo mê gá thế ai pơxúa khât tá tơdroăng ton nah tá túa lĕm tro dêi tiô kơ rêm kơpong cheăm, tơring ki mê. Xua mê, ki hên tơdroăng hơ’muăn tối mê gá ôh tá xê to tơbleăng nhên tơ’nôm tơmeăm tê ôh, amê ối tối tá túa lĕm tro dêi kơpong rêh ối ki mê’’.

Luâ 4 hơnăm tơbleăng pêi tơdroăng rêm cheăm môi tơmeăm, mê troh nôkố, kong pơlê Dak Lak hiăng ai 72 tơmeăm châ mơnhên OCOP râ kong pơlê ing 3 - 4 hơlŏng. Kơxô̆ liăn châ xo ing tê tơmeăm OCOP mê xuân đi đo tâk, kum hên ngế a thôn pơlê ai cheăng pêi a thôn pơlê ƀă kơlo liăn châ xo hên. Sap apoăng pơxiâm pêi, Vi ƀan kong pơlê Dak Lak hiăng kĭ “Tơdroăng tơkêa pêi pro tơmeăm châ mơnhên OCOP dêi kong pơlê troh hơnăm 2025 ƀă troăng rơhlâ troh hơnăm 2030.

Tung mê pơkâ, tâi tâng mâu cheăm tung kong pơlê xuân thế ai tơmeăm OCOP. Troh hơnăm 2025, kô ai 200 tơmeăm châ mơnhên tối OCOP, troh hơnăm 2030 lâp tung kong pơlê kô ai 300 tơmeăm OCOP. Mâu tơmeăm mê thế mơdêk ki tơƀrê, mơdêk hơlŏng ƀă pơtối châ hên mâu tíu vâ rôe tung tơnêi têa ƀă kong têa ê pro pơxúa tơƀrê.

Pôa Nguyễn Hoài Dương, Ngế pơkuâ ngăn ‘na chjiâk deăng ƀă mơnhông thôn pơlê, Kăn ƀơrô xing xoăng tơdroăng cheăng dêi Tơdroăng thôn pơlê nếo kong pơlê Dak Lak ăm ‘nâi:

“Vâ tơmeăm OCOP ai tiô mâu pơkâ kơchơ tê mơdró mê tơnêi têa xuân ai mâu luât pơkâ kơjo kum ‘na tơmeăm hbrâ tơmeăm vâ pơxúa tung pêi chiâk lơ kơjo kum tá ‘na mơjiâng tơmeăm khoăng dêi mâu tíu pêi pêt kơjo kum hnê hriâm. Kố cho mâu tơdroăng ki kal, klêi mê kơjo kum mơdêk tê mơdró, tơmeăm châ tê a kơchơ, tâi tâng kơxô̆ liăn mơjiâng inâi tĕm tem, kơjo kum tí tăng po rơdâ mâu tíu tê rôe tung mơnêi têa ƀă kong têa ê tơbleăng mâu tơmeăm ki mê.

Mê cho mâu tơdroăng OCOP pơla hơnăm vâ troh hiăng ‘nâi nhên ƀă hiăng tơkŭm vâ tŏng kum ăm mâu khu vâ pêi cheăng châ tơƀrê tâ’’.

Tơdroăng rêm cheăm môi tơmeăm dế chiâng tơdroăng vâ mơhnhôk pơtối rak vế ki xiâm vâ mơhnhôk pêi, pêi nếo tơdroăng cheăng kâ thôn pơlê a Dak Lak. Tơdroăng mê xuân dế pro xiâm ki vâ mơdêk ăm tơdroăng mơjiâng thôn pơlê nếo tiô troăng rơhlâ krá tơniăn ing tơdroăng mơhno ki rơdêi ăm tơmeăm pêi lo dêi cheăm tơring kong pơlê. 

Hương Lý