Nếo a chê kố, Hô̆i đong mơnhên tối, klâ xoăng tíu pơxá tơmeăm OCOP kong pơlê Dak Lak hiăng tơbleăng inâi 25 to tơmeăm châ tiô pơkâ tơmeăm OCOP 3 ƀă 4 hơlŏng râ kong pơlê tung hơnăm 2022 ối tung Tơdroăng rêm to cheăm môi kế tơmeăm pơla hơnăm 2021 – 2025, mơdêk tâi tâng kế tơmeăm OCOP a kong pơlê kố tâk troh 143 to tơmeăm.

Tung kơxô̆ 25 to tơmeăm OCOP nếo châ mơnhên rôh kố ai 7 to tơmeăm châ pơrá OCOP 4 hơlŏng ƀă 18 tơmeăm châ pơxá 3 hơlŏng. Mâu kế tơmeăm ki châ pơkâ OCOP kô châ Vi ƀan hnê ngăn kong pơlê Dak Lak hbru ăm mơ-éa mơnhên, châ xúa inâi mơnhên tơmeăm OCOP Việt Nam ƀă pơxá hơlŏng in a tơdrong tơmeăm tiô pơkâ. Tơdroăng ki mơnhên klâ xoăng pơxá ki kơnía tung 3 hơnăm.

Vâ mơdêk ki kơnía kế tơmeăm pêi lo ing chiâk deăng kong pơlê, tung la ngiâ ah, kong pơlê Dak Lak pơtối mơ-eăm tŏng kum khu pơkuâ OCOP mơdêk ki dâi lĕm, tŏng kum mâu khu mơdró kâ, khu pêi cheăng tơrŭm tơdjêp tê, tăng khu tê mơdró, po rơdâ kơchơ. Pôa Huỳnh Ngọc Dương, Kăn phŏ pơkuâ Khu ngăn kơmăi kơmok ƀă tê mơdró kong pơlê Dak Lak ăm ‘nâi:

“Mâu kế tơmeăm veăng tung kố pơrá châ pơxúa mâu tơdroăng tŏng kum dêi kong pơlê. Má 2, cho mâu kế tơmeăm châ pơkâ OCOP 3 troh 4 hơlŏng ngin ai mâu hlá mơ-éa tơpui tơno ăm mâu khu pơkuâ dêi mâu khu ngăn cheăng kơmăi kơmok ƀă mâu kong pơlê tung lâp tơnêi têa ƀă mâu kơ koan pơkâ mơdêk tê mơdró dêi khu ngăn cheăng kơmăi kơmok ƀă tê mơdró mê pro tơ’lêi vâ tơdjêp ƀă khu ki tê ƀă mâu tíu tê kế tơmeăm a kong pơlê vâ mơdêk rơdêi tơdroăng ki ê”.

Hâi lơ 14/8 pơla hdrối kố nah, Ƀơrô cheăng xing xoăng tơdroăng thôn pơlê nếo kong pơlê Dak Lak hiăng tơkŭm po Rôh hôp hnê tối, tơbleăng tơdroăng rêm cheăm môi kế tơmeăm hơnăm 2023.

Rôh hôp mơnhên tối mâu kế tơmeăm OCOP hiăng rĕng tối nhên tíu ối, châ kơchơ tê mơdró tơdah xo hên, kum kuăn pơlê pêi chiâk po rơdâ túa pêt mơjiâng, mơdêk ki kơnía git dêi kế tơmeăm, ing mê, veăng kum pơ’lêh tơdroăng cheăng kâ, mơdêk pêi lo liăn, tơdroăng rêh ối dêi kuăn pơlê ƀă pêi pro tơƀrê khu tơdroăng pơkâ “cheăng kâ ƀă tơkŭm po pêt mơjiâng kế tơmeăm” tung tơdroăng pơkâ tơnêi têa ‘na cheăm thôn pơlê nếo.

Pakĭng tơdroăng klêi kơ’nâi pêi châ, tơdroăng OCOP a Dak Lak xuân ối ai mau tơdroăng ki ối ‘ro môi tiah: mâu troăng hơlâ tŏng kum ƀă khu pơkuâ dêi mâu kế tơmeăm OCOP ối iâ, túa pơkâ kế tơmeăm OCOP ối iâ, hnoăng cheăng pơkâ mơdêk tê mơdró ối iâ êt, ôh tá tơdâng tơ’mô, tá hâi kâi châ ai tơdroăng ki rơdêi, lĕm vâ mơjiâng bro um méa, ki kơnía ‘na tê mơdró.

A rôh hôp mâu kăn hiăng châ tối tơbleăng ‘na tơdroăng “Tơdroăng rêm to cheăm môi tơmeăm, ki rơkê tung tơnêi têa ƀă a kong têa ê ‘na mơnhông cheăng kâ kơpong thôn pơlê”, “Mâu tơdroăng ki kal rơkê plĕng klêi kơ’nâi 5 hơnăm tơbleăng tơdroăng OCOP a Dak lak”, “Ki khât dêi Tơdroăng OCOP. Hnoăng cheăng pôu râng dêi khu pơkuâ tơdroăng kal kí tng tơbleăng tơdroăng OCOP. Ƀai hriâm ki rơkê, troăng hơlâ ki kal tung hơnăm 2023 – 2025”.

Tơpui a rôh hôp, pôa Nguyễn Thiên Văn, Kăn phŏ hnê ngăn Vi ƀan kong pơlê Dak Lak tối nhên, ƀă túa pơkâ “Ki lĕm chiâng ai inâi”, rơtế ƀă tơdroăng mơ-eăm dêi mâu troăng hơlâ tŏng kum ƀă mâu khu pơkuâ dêi kế tơmeăm OCOP malối cho mơdêk ‘na ivá pơkuâ ngăn, uâ pơliê ƀă tê mơdró kế tơmeăm:

“Tơdroăng ki veăng kum dêi khu râ Đảng khu kăn pơkuâ kong pơlê tung tŏng kum ăm mâu khu pơkuâ xuân môi tiah mơjiâng  bro kế mâu kế tơmeăm pro pơxúa dêi kong pơlê tơná, ai mâu tơdroăng cheăng tung la ngiâ mơjiâng bro kế tơmeăm ƀă mơnhông kơchơ mơdró vâ kế tơmeăm ai tíu ối bro chiâng ai hên tơdroăng tơ’lêi vâ mơnhông cheăng kâ rêh ối pơlê pơla ăm kuăn pơlê tung tăng cheăng pêi, ƀă pêi lo liăn”.

Kăn phŏ hnê ngăn Vi ƀan kong pơlê Dak Lak xuân pơkâ thế kơ koan ki ai tơdjâk troh kal tơkŭm hnê mơhno, tŏng kum ăm mâu kế tơmeăm hiăng châ kĭ veăng tung Tơdroăng OCOP dêi mâu tơring, pơlê kong krâm, pơlê kong kơdrâm tung hơnăm 2023 tiô pơkâ nếo dêi Khu xiâm pơkâ OCOP tơnêi têa; rĕng tơkŭm po mâu lâm hnê hriâm ăm kăn ƀô̆ pơkuâ ngăn tơdroăng OCOP rêm râ ƀă mâu khu pơkuâ veăng tung tơdroăng ‘na pêt, mơjiâng bro, mơjiâng túa túa pơkâ tê mơdró, mơjiâng inâi, marketing ƀă tơbleăng, mơnhông tơmeăm ăm mâu tíu ki pêt, mơjiâng veăng tung Tơdroăng OCOP hơnăm 2023; mơdêk hnoăng cheăng tối tơbleăng, hnê tối ‘na Tơdroăng OCOP.