Hơnăm 1993, klêi kơ’nâi hiăng bro mố đô̆i klêi vêh dêi a pơlê, pôa Y Tuyên Ƀuôn Krông ối a ƀuôn Drai H’Ling, cheăm Hòa Xuân, pơlê kong kơdrâm Ƀuôn Ma Thuột, kong pơlê Dak Lak kơhnâ veăng tung mâu tơdroăng cheăng dêi pơlê pơla tung mâu tôh tơrŭm Đoân Droh rơtăm, Hô̆i ngăn mố đô̆i hơnăm hiăng krâ a cheăm pơlê. Troh hơnăm 2015, pôa châ pôk pro kăn phŏ pơkuâ chi ƀô̆, ngế pơkuâ ƀuôn Drai H’Ling.

Tung 30 hơnăm pêi cheăng, pôa Y Tuyên Ƀuôn Krông chiâng kông tơdjêp ăm troăng hơlâ dêi Đảng, luât dêi tơnêi têa troh a chê tâ ƀă kuăn pơlê hdroâng Rơđế a cheăm Hòa Xuân tối tơdjuôm ƀă ƀuôn Drai H’Ling tối krê. Maluâ ối a tíu pêi cheăng ki lâi, pôa xuân ôh tá xâu mâu tơdroăng ki xơpá, lăm prôk troh a rêm rơlâ, tơgôu rêm hngêi vâ hnê tối, mơhnhôk vâi krâ nhŏng o pêi pro tro troăng hơlâ dêi Đảng ƀă tơnêi têa.

Pôa Y Tuyên Ƀuôn Krông tối:

“A ƀuôn Drai H’Ling pơ’leăng mâ mơngế ki hên cho hdroâng Rơđế châ lối 93%, tơdroăng ki hriâm ôh tá tơdâng. Ƀă tá tơdroăng ki mơeăm, á đi đo mơhnhôk vâi krâ nhŏng o kuăn pơlê tung pơlê pêi tiô troăng hơlâ ƀă luât dêi Đảng, Tơnêi têa pơkâ mơ’no. Tung pơla hdrối nah, vâi krâ nhŏng o kuăn pơlê xuân hiăng pêi pro tro tâng pơchông ƀă mâu hơnăm hdrối nah mê á hlo phiu ro khât”.

Pôa Y Tuyên Ƀuôn Krông ăm ‘nâi, hdrối nah kuăn pơlê tung pơlê xuân ối rak vế hên khôi túa tơlá ki ôh tá tro, tơdroăng pơkoăng ŏng mế, mơdâm kiâ hmâ tơkŭm po hên hâi, pro mơhrê kế tơmeăm; liăn ngân; ƀă khôi túa tơlá ki pâ tơmeăm drêng pơkoăng, xo hên tơmeăm tung pơla diâp ŏng mế ƀă hên tơdroăng ki ê. Pôa hmâ troh rêm rơpŏng kuăn pơlê vâ tơpui tơno, ‘nâi nhên tơdroăng ki rơhêng vâ, mâu tơdroăng tơmiât ƀă hnê tối vâ mơdêk khât ki hlê plĕng, tah lôi mâu khôi túa tơlá ôh tá tro xếo lo ing tơdroăng rêh ối pơlê pơla. Rơtế amê, pôa Y Tuyên Ƀuôn Krông ối kơhnâ hnê tối kum vâi krâ hơ’lêh túa tơmiât pêi kế tơmeăm tung chiâk deăng, khên tơnôu ‘no liăn mơnhông cheăng kâ. Jâ H’I Ƀuôn Yă (hmâ khĕn cho nôu Bảo) kuăn pơlê tung pơlê tối, vâi krâ nhŏng o hâk vâ ƀă kơ-êng pêi tiô pôa Y Tuyên Ƀuôn Krông xua hiâm mơno kơhnâ, rơkê ƀă pơlê cheăm.

“Pâ Hà pro ngế ki pơkuâ pơlê ngin hiăng ton. Drêng ai mâu troăng hơlâ pơkâ dêi Đảng ƀă Tơnêi têa pơkâ mơ’no mê pôa đi đo tối tơbleăng tơpui tối leăng ăm vâi krâ; drêng ai troăng hơlâ pơkâ ki hơ’lêh, hbru ăm hdrê loăng pêt pôa đi đo hnê khĕn vâi krâ hriâm ƀối ƀă xo hdrê loăng pêt. Vâi krâ nhŏng o ngin mơdoh hên tơdroăng ki pâ nhuô̆m, tơdroăng hâk mơnê kơ ngế ki pơkuâ pơlê”.

Pôa Y Niwa Ƀuôn Yă, Kăn phŏ hnê ngăn Vi ƀan cheăm Hòa Xuân, pơlê kong kơdrâm Ƀuôn Ma Thuột, kong pơlê Dak Lak ăm ‘nâi Y Tuyên Ƀuôn Krông cho môi ngế đảng viên djâ troăng ahdrối. Ƀă hnoăng cheăng cho kăn pơkuâ Chi ƀô̆ hlối cho ngế pơkuâ ƀuôn Drai H’Ling, Y Tuyên Ƀuôn Krông đi đo djâ troăng ahdrối tung mâu tơdroăng.

Sap ing hơnăm 2016 troh nôkố, pôa rơtế ƀă chi ƀô̆ hiăng mơhnhôk vâi krâ nhŏng o tung pơlê veăng tơlo lối 200 rơtuh liăn ƀă lối hrĭng rơpâu hâi pêi cheăng vâ ok ƀê tong lối 2km troăng prôk tung pơlê. Troh nôkố, lối 85% kơxô̆ rơpŏng tung pơlê châ rơpŏng hlê plĕng, rơpŏng ki rơneh kuăn má pái hiăng kơdroh hên, tơdroăng rêh ối hiâm mơno, liăn ngân rế hía rế châ mơdêk.

Pôa Y Niva Ƀuôn Yă, kăn phŏ hnê ngăn Vi ƀan cheăm Hòa Xuân mơnhên tối kơ pôa Y Tuyên Ƀuôn Krông ai hên túa tơmiât rơkê, tí tăng, hơ’lêh nếo túa pêi cheăng vâ ăm tơdroăng pơkâ dêi Đảng mot tung tơdroăng ki ai khât tung rêh ối.

“Pôa Y Tuyên Ƀuôn Krông ƀă tơdroăng ki rơkê tung 15 hơnăm pro ngế pơkuâ pơlê hlối cho kăn phŏ pơkuâ chi ƀô̆ dêi ƀuôn Drai H’Ling xuân cho ngế ki châ kuăn pơlê pôk cho ngế ki kuăn pơlê loi nhuô̆m hiăng 10 hơnăm kố. Ƀă hnoăng cheăng cho ngế pơkuâ pơlê, hlối cho cho kăn phŏ pơkuâ chi ƀô̆ dêi pơlê, pôa hiăng ôh tá la lâi pơtê tơdroăng ki djâ troăng ahdrối, đi đo djâ troăng ahdrối tung tơdroăng mơjiâng thôn pơlê nếo, tơdrêng amê hlối hnê tối, mơhnhôk kuăn pơlê pleăng tơnêi vâ bro troăng, bro mâu troăng prôk, pôa đi đo mơnhên cho kông tơdjêp ki kal pơla khu kăn pơkuâ ƀă kuăn pơlê”.

Pôa Y Tuyên Ƀuôn Krông cho môi ngế đảng viên ki châ kuăn pơlê loi nhuô̆m, ai ivá ƀă kơhnâ khât ƀă hnoăng cheăng. Tơdroăng ki mơ-eăm, môi hiâm mơno dêi pôa hiăng kum mơjiâng khu tơrŭm hdroâng kuăn ngo, pêi pro mâu tơdroăng tơ’noăng pâ nhuô̆m tơnêi têa, mơdêk tơdroăng ki mơnhông ngiâ méa dêi ƀuôn Drai H’Ling.

Bă mâu ivá mơ-eăm tung hnoăng cheăng, pôa Y Tuyên Ƀuôn Krông cho đảng viên pêi klêi rơkê hnoăng, cho ngế ki châ kuăn pơlê loi nhuô̆m tung kuăn pơlê hdroâng kuăn ngo.