Tiô pôa Nguyễn Đức Lợi, Kăn hnê ngăn hnê mơhno má môi Khu chêh hlá tơbeăng Việt Nam, Pri hlá tơbeăng Tơnêi têa hơnăm 2023 pơtối pêi pro hên tơdroăng ki châm tơdrêng tung um tiô troăng hyôh măng ing phân mê châm tơ’noăng dêi Khu chêh hlá tơbeăng Việt Nam ƀă mâu ƀai chêh hlá tơbeăng điên tưh, rơ’jiú, um tơvi, pakĭng tơdroăng châm tơdrêng mâu ƀai hlá tơbeăng in, hlá tơbeăng um.

Tung kơxô̆ 1 rơpâu 827 ƀai ối tung 11 khu tơ’noăng, Hô̆i đong châm điêm apoăng hiăng môi tuăn rah châ 165 ƀai mot tung roh châm má mơ’nui. Kố cho mâu ƀai ki rơkê má môi tá ‘na tơdroăng xiâm ƀă tơdroăng ki chêh, mơdêk mâu tơdroăng ki kal dêi tơnêi têa, rak tơniăn tơdroăng kal kí – troăng tơmiât, tơdroăng ki djâ troăng, tơdroăng ki tơdrăng ai tơdjâk pơlê pơla lĕm tro ƀă ó rơdêi.