Hdrối nah, drô troăng prôk ing kông Nước Lương troh a thôn T6, cheăm Dak Man, tơring Hoài Ân, kong pơlê Bình Định lĕm ó khât. A rơnó mêi hngê, hên tíu a drô troăng kố to hmâ tro têa lân, vâi krâ-nhŏng o prôk lăm trâm hên xahpá. Ing kơxô̆ liăn dêi Tơdroăng Tơkêa bro 4 ‘na mơ’no liăn mơjiâng pro troăng prôk ki xiâm ối tung Tơdroăng ki xiâm dêi Tơnêi têa tung mơnhông pêi cheăng kâ - rêh ối pơlê pơla kơpong hdroâng kuăn ngo ki iâ mơngế, kong ngo, Vi ƀan hnê ngăn tơring Hoài Ân, kong pơlê Bình Định hiăng mơ’no vâ chê 2 rơtal 500 rơtuh liăn vâ ‘mâi rơnêu, po rơdâ troăng prôk ing kông Nước Lương troh a thôn T6 ƀă hnối ok mĕn ƀê tong troăng tơkoh mâu thôn pơlê tung cheăm Đak Mang. Pôa Đinh Văn Thanh, kuăn pơlê a cheăm Đak Mang, tơring Hoài Ân tối ăm ‘nâi, troăng prôk hiăng châ ‘mâi rơnêu, po rơdâ gum ăm tơdroăng prôk lăm, pơto chơ kế tomeăm tơ’lêi hlâu tâ nếo:

“Troăng châ tôh ƀê tong pro nếo gum ăm kuăn pơlê chơ dêi báu ing mâu tơbăng klâng troh a hngêi ối dêi kuăn pơlê. Ai troăng nếo kố, gum ăm vâi krâ-nhŏng o châ prôk lăm tơniăn luâ tâ mâu hơnăm hdrối mê hía nah”.

Tơring Hoài Ân vêh mơnhên tối, ‘no liăn mơjiâng pro troăng prôk cho “ki xiâm” kal kân khât, veăng gum thăm mơnhông pêi cheăng kâ-rêh ối pơlê pơla kơpong ki kơtiê xahpá, kơpong hơngế hơngo. Mâu kơpong ki tơdroăng tơkêa kố châ gum, vâi krâ-nhŏng o pơrá vâ môi tuăn pro tơbăng tơnêi. Pôa Nguyễn Xuân Phong, Kăn phŏ hnê ngăn Vi ƀan tơring Hoài Ân, kong pơlê Bình Định tối ăm ‘nâi, tơring ki kố dế pêi pro adrêng ƀă hnoăng cheăng xiâm dêi tơnêi têa, pơtối mơdêk ki tơ’lêi hlâu dêi tơring, mơjiâng chiâng tíu ki pêi chiâk pêi deăng tiô troăng hơlâ ki kơnâ ƀă veăng gum po rơdâ, thăm mơdêk tơrŭm cheăng ki kơnâ tiô kơ tơdroăng tơrŭm ƀă tê mơ’no dêi kế tơmeăm:

“Pơkâ pêi pro tơdroăng ki mơnhông pêi chiâk pêi deăng ăm kơpong hdroâng kuăn ngo ki iâ mơngế, tŏng gum ‘na túa cheăng, hdrê loăng, hdrê mơnăn ƀă mâu phon, tơmeăm pêi chiâk deăng, gum vâi krâ-nhŏng o châ xúa ki rơkê dêi khoa hok kih thuât. Mâu túa cheăng ki pêt tơvât hdrê loăng ai pơxúa kân khât ăm tơdroăng cheăng kâ kân ăm kơpong hdroâng kuăn ngo vâ ing mê, mơjiâng chiâng tuăn tơmiât ƀă ki hlê plĕng tung tơdroăng thăm mơdêk ki dâi lĕm tơmeăm pêi lo ing chiâk ăm kơpong hdroâng kuăn ngo ing mê vâ pơhlêh tuăn tơmiât, tuăn ‘nâi hlê nhên tung mơdêk ki dâi lĕm dêi tơmeăm pêi lo ing chiâk deăng tiô kơ tơrêm ƀăng chiâk deăng ƀă tơrêm kế tơmeăm. Ing mê, thăm mơdêk pêi lo liăn ngân, mơnhông cheăng kâ rêh ối thôn pơlê, kơdroh  tơdroăng ki kơtiê xahpá a pơlê cheăm”.

Hơnăm 2024, tơdroăng pơkâ ki mơ’no kơxô̆ liăn ing Hnoăng cheăng xiâm tơnêi têa mơnhông pêi cheăng kâ - rêh ối pơlê pơla kơpong hdroâng kuăn ngo ki iâ mơngế ƀă kong ngo dêi kong pơlê Bình Định ai lối 412 rơtal liăn. Troh a hâi lơ 31/5, mâu tơring, cheăm dêi kong pơlê Bình Định hiăng ăm mung châ lối 50 rơtal 700 rơtuh liăn, châ 12,3%. Klêi kơ’nâi pơkâ pêi pro mâu tơdroăng tơkêa bro kố, ki păng  ‘nâng ăm hlo, hnoăng pêi pro mâu tơdroăng kố ối trâm hên xahpá. Vi ƀan hnê ngăn kong pơlê Bình Định pơtối rak vế mâu Tôh ki ngăn ‘na cheăng ai tơdjâk dêi kong pơlê vâ lo lăm ngăn, séa mơnhên tung tơdroăng rak vế, pêi pro, hnê mơhnhôk, tơdjâk, tah lôi mâu tơdroăng ki ối tơvâ tơvân, xahpá, tung pơla pêi pro mâu tơdroăng tơkêa bro dêi Hnoăng cheăng xiâm tơnêi têa.

Pôa Đinh Văn Lung, Kăn pơkuâ hnê ngăn hdroâng kuăn ngo kong pơlê Bình Định tối ăm ‘nâi, khu kố hiăng pơkâ thế mâu tơring, cheăm hbrâ rơnáu ƀă pêi pro đi đo hnoăng hnê tối, thăm mơdêk tơdroăng ki pêi pro mâu tơdroăng tơkêa bro a mâu hnoăng cheăng xiâm dêi tơnêi têa ‘na mơnhông pêi cheăng kâ - rêh ối pơlê pơla kơpong hdroâng kuăn ngo ki iâ mơngế ƀă kong ngo:

“Ai hên troăng hơlâ, xua mê cho mâu ngế ki pêi pro tiô kơ tơdroăng hnê tối athế hlê plĕng. Ki má péa nếo, athế ai hên khu râ, kơvâ cheăng ki ai tơdjâk troh mâu hnoăng cheăng kố vâ vâi hnê tối ăm kuăn pơlê mê vâi nếo châ ‘nâi. Tơdroăng kố ai hên khu râ Đảng xuân hiăng ai pêi pro kơhnâ khât, pôu râng hnoăng cheăng tung hnê mơhnhôk, vâ tiah lâi gum ăm vâi krâ-nhŏng o châ xúa ing tơdroăng ki kố, pơtroh gum ăm kuăn pơlê châ lĕm tro tâ”.