*A rôh hôp, mâu kăn hiăng tơpui tơno ƀă môi tuăn mâu hlá mơ-éa chêh ‘na túa pơkâ pêi cheăng, xoăng tơdroăng cheăng pêi nhên ăm rêm ngế pêi cheăng ƀă mơjiâng 4 Tiêuh ƀan, vâ rak tơniăn tŭm tơdroăng cheăng hnê mơhno, pơkuâ tơdrăng ƀă tơƀrê tung pơla hbrâ rơnáu pôk.

Jâ Cao Thị Hòa An, Kăn hnê ngăn Vi ƀan tâ phĭu kong pơlê Dak Lak tối nhên, tơdroăng cheăng ‘mêng rơnêu tơmeăm khoăng klêi kơ’nâi kong mê têa kân dế cho tơdroăng ki tơvâ tơvân khât. Laga, tơdroăng athế pêi pro tung hbrâ rơnáu pôk xuân kal, tơdjâk troh hên kơ koan, tíu pêi cheăng ƀă cheăm bêng. Xua mê, ƀă hâi khế bu ối lối 3 khế, rêm râ, mâu kơvâ cheăng kal tơkŭm khât, hbrâ rơnáu tơrŭm, tơbleăng pêi hnoăng cheăng tro tơdroăng, tro pơkâ dêi luât pơkâ.

*Kơxê lơ 26/11, Viƀan tâ phĭu kong pơlê Gia Lai hiăng hôp roh má môi. Roh hôp hiăng tơpui tơno, tơbleăng ăm pêi pro mơ-éa chêh hdrối mâu mơ-éa dêi Viƀan tâ phĭu rah xo kong pơlê, tơbleăng xing xoăng hnoăng cheăng ăm 37 ngế; tơpui tơno ‘na kơxô̆ hên iâ, mâu kăn ki veăng mâu khu ngế ki châ rah xo pêi cheăng dêi Viƀan tâ phĭu kong pơlê: pơkâ pêi ‘na pêi pro tơdroăng tâ phĭu xo kăn teăng mâ Kuô̆k hô̆i hneăng má XVI ƀă kăn teăng mâ Hô̆i đong kuăn pơlê mâu râ hneăng hơnăm 2026 – 2031 tung kong pơlê Gia Lai.